โสฬสม ปริจฺเฉท

๑. ปุเร จริตฺวา ปิณฺฑาย, กริตฺวา ชนสงฺคหํ;

ราชเคหมฺหิ ภุญฺชนฺโต, กาเรนฺโต ราชสงฺคหํ.

๒. ฉพฺพสทิวเส เถโร, มหาเมฆวเน วสี;

อาสฬฺหสุกฺกปกฺขสฺส, เตรเส ทิวเส ปน.

๓. ราชเคหมฺหิ ภุญฺชิตฺวา, มหารญฺโญ มหามติ;

มหา’ปฺปมาทสุตฺตนฺตํ, เทสยิตฺวา ตโต จ โส.

๔. วิหารกรณํ อิจฺฉํ, ตตฺถ เจติยปพฺพเต;

นิกฺขมฺม ปุริมทฺวารา, อคา เจติยปพฺพตํ.

๕. เถรํ ตตฺถ คตํ สุตฺวา, รถํ อารุยฺห ภูปติ;

เทวิโย เทฺว จ อาทาย, เถรสฺสานุปทํ อกา.

๖. เถรา นาคจตุกฺกมฺหิ, นหาตฺวา รหเท ตหึ;

ปพฺพตาโรหณตฺถาย, อฏฺฐํสุ ปฏิปาฏิยา.

๗. ราชา รถา ตโท’รุยฺห, สพฺเพ เถเร’ภิวาทยิ;

อุเณฺห กิลนฺเต กึราช, อาคโตสี’ติ อหุเต.

๘. ตุมฺหากํ คมนาสงฺกี, อาคโตมฺหี’ติ ภาสิเต;

อิเธว วสฺสํ วสิตุํ, อาคตมฺหา’ติ ภาสิย.

๙. ตสฺสูปนายิกํ เถโร, ขนฺธกํ ขนฺธโกวิโท;

กเถสิ รญฺโญ ตํ สุตฺวา, ภาคิเนยฺโย จ ราชิโน.

๑๐. มหาริฏฺโฐ มหามจฺโจ, ปญฺจปญฺญาสภาตุหิ;

สทฺธึ เชฏฺฐกนิฏฺเฐหิ, ราชานมภิโต ฐิโต.

๑๑. ยาจิตฺวา ตทหุ เจว, ปพฺพชุํ เถรสนฺติเก;

ปตฺตารหตฺตํ สพฺเพปิ, เต ขุรคฺเค มหามตี.

๑๒. กนฺตกเจติยฐาเน, ปริโต ตทเหว โส;

กมฺมานิ อารภาเปตฺวา, เลณานิ อฏฺฐสฏฺฐิโย.

๑๓. อคมาสิ ปุรํ ราชา, เถรา ตตฺเถว เต วสุํ;

กาเล ปิณฺฑาย นครํ, ปวิสนฺตา’นุกมฺปกา.

๑๔. นิฏฺฐิเต เลณกมฺมมฺหิ, อาสฬฺหิปุณฺณมาสิยํ;

คนฺตฺวา อทาสิ เถรานํ, ราชา วิหารทกฺขิณํ.

๑๕. ทฺวตฺตึสมาฬกานญฺจ, วิหารสฺส จ ตสฺส โข;

สีมํ สีมาติโค เถโร, พนฺธิตฺวา ตทเหว โส.

๑๖. เตสํ ปพฺพชฺชาเปกฺขานํ, อกาสิ อุปสมฺปทํ;

สพฺเพสํ สพฺพปฐมํ, พทฺเธ ตุมฺพรุมาฬเก.

๑๗. เอเต ทฺวาสฏฺฐิ อรหนฺโต, สพฺเพ เจติยปพฺพเต;

ตตฺถ วสฺสํ อุปคนฺตฺวา, อกํสุ ราชสงฺคหํ.

๑๘. เทวมนุสฺสคณคณิตํ ตํ,

ตญฺจ คณํ คุณวิตฺถตกิตฺตึ;

ยานมุปจฺจ จ มานยมานา,

ปุญฺญจยํ วิปุลํ อกรึสูติ.

สุชนปสาทสํเวคตฺถาย กเต มหาวํเส

เจติยปพฺพตวิหารปฏิคฺคหโก นาม

โสฬสโม ปริจฺเฉโท.