เตรสม ปริจฺเฉท

มหินฺทาคมโน

๑. มหามหินฺทตฺเถโร โส, ตทา ทฺวาทสวสฺสิโก;

อุปชฺฌาเยน อาณตฺโต, สงฺเฆน จ มหามตี.

๒. ลํกาทีปํ ปสาเทตุํ,

กาลํ เปกฺขํ วิจินฺตยี;

‘‘วุฑฺโฒ มุฏสิโว ราชา,

ราชา โหตุ สุโต’’ อิติ.

๓. ตทนฺตเร ญาติคณํ, ทฏฺฐุํ กตฺวาน มานสํ;

อุปชฺฌายญฺจ สงฺฆญฺจ, วนฺทิตฺวา ปุจฺฉ ภูปตึ.

๔. อาทาย จตุโร เถเร, สงฺฆมิตฺตาย อตฺรชํ;

สุมนํ สามเณรญฺจ, ฉฬาภิญฺญํ มหิทฺธิกํ.

๕. ญาตีนํ สงฺคหํ กาตุํ, อคมา ทกฺขิณาคิรึ;

ตโต ตตฺถ จรนฺตสฺส, ฉมฺมาสา สมติกฺกมุํ.

๖. กเมน เวทิสคิรึ, นครํ มาตุเทวิยา;

สมฺปตฺวา มตรํ ปสฺสิ, เทวี ทิสฺวา ปิยํ สุตํ.

๗. โภชยิตฺวา สปริสํ, อตฺตนาเยว การิตํ;

วิหารํ เจติยคิรึ, เถรํ อาโรปยี สุภํ.

๘. อวนฺติรฏฺฐํ ภุญฺชนฺโต, ปิตรา ทินฺนมตฺตโน;

โส อโสก กุมาโร หิ, อุชฺเชนีคมนา ปุรา.

๙. เวทิเส นคเร วาสํ, อุปคนฺตฺวา ตหึ สุภํ;

เทวินฺนาม ลภิตฺวาน, กุมารึ เสฏฺฐิธีตรํ.

๑๐. สํวาสํ ตาย กปฺเปสิ, คพฺภํ คณฺหิย เตน สา;

อุชฺเชนิยํ กุมารํ ตํ, มหินฺทํ ชนยี สุภํ.

๑๑. วสฺสทฺวยมติกฺกมฺม, สงฺฆมิตฺตญฺจ ธีตรํ;

ตสฺมึ กาเล วสติ สา, เวทิเส นคเร ตหึ.

๑๒. เถโร ตตฺถ นิสีทิตฺวา, กาลญฺญู อิติ จินฺตยิ;

ปิตรา เม สมาณตฺตํ, อภิเสก มหุสฺสวํ.

๑๓. เทวานํปิยติสฺโส โส, มหาราชา’นุโภตุ จ;

วตฺถุตฺตยคุเณ จาปิ, สุตฺวา ชานาตุ ทูหโต.

๑๔. อาโรหตุ มิสฺสนคํ, เชฏฺฐมาสสฺสุ’โปสเถ;

ตทเหว คมิสฺสาม, ลํกาทีปวรํ มยํ.

๑๕. มหินฺโท อุปสงฺกมฺม, มหินฺทตฺเถร มุตฺตมํ;

ยาหิ ลํกํ ปสาเทตุํ, สมฺพุทฺเธนา’สิ พฺยากโต.

๑๖. มยมฺปิ ตตฺถุปตฺถมฺภา, ภวิสฺสามา’ติ อพฺรวิ;

เทวิยา ภคินี ธีตุ-ปุตฺโต ภณฺฑุก นามโก.

๑๗. เถเรน เทวิยา ธมฺมํ, สุตฺวา เทสิตเมว ตุ;

อนาคามิผลํ ปตฺวา, วสิ เถรสฺส สนฺติเก.

๑๘. ตตฺถ มาสํ วสิตฺวาน, เชฏฺฐมาสสฺสุ’ โปสเถ;

เถโร จตูหิ เถเรหิ, สุมเนนา’ถ ภณฺฑุนา.

๑๙. สทฺธึ เตน คหฏฺเฐน, น รโต ญาติเหตุนา;

ตสฺมา วิหารา อากาสํ, อุคฺคนฺตฺวา โส มหิทฺธิโก.

๒๐. ขเณเนว อิธาคมฺม, รมฺเม มิสฺสก ปพฺพเต;

อฏฺฐาสิ วิลุกูฏมฺหิ, รุจิรมฺพตฺถเล วเร.

๒๑. ลํกาปสาท คุเณน วิยากโต โส;

ลํกาหิตาย มุนินา สยิเตน อนฺเต;

ลํกาย สตฺถุสทิโส หิตเหตุ ตสฺสา;

ลํกามรูหิ มหิโต’ภินิสีทิ ตตฺตาติ.

สุชนปฺปสาทสํเวคตฺถาย กเต มหาวํเส

มหินฺทาคมโน นาม

เตรสโม ปริจฺเฉโท.