ทฺวาทสม ปริจฺเฉท

นานาเทสปสาโท

๑. เถโร โมคฺคลิปุตฺโต โส, ชินสาสน โชตโก;

นิฏฺฐาเปตฺวาน สํคีตึ, เปกฺขมาโน อนาคตํ.

๒. สาสนสฺส ปติฏฺฐานํ, ปจฺจนฺเตสุ อเวกฺขิย;

เปเสสิ กตฺติเก มาเส, เตเต เถเร ตหึ ตหึ.

๓. เถรํ กสฺมีรคนฺธารํ, มชฺฌนฺติกมเปสยิ;

อเปสยี มหาเทว-ตฺเถรํ มหิสมณฺฑลํ.

๔. วนวาสึ อเปสยิ, เถรํ รกฺขิตนามกํ;

ตถา’ปรนฺตกํ โยน-ธมฺมรกฺขิตนามกํ.

๕. มหารฏฺฐํ มหาธมฺม-รกฺขิตตฺเถร นามกํ;

มหารกฺขิต เถรํ ตํ, โยน โลกมเปสยิ.

๖. เปเสสิ มชฺฌิมํ เถรํ, หิมวนฺตปเทสกํ;

สุวณฺณภูมึ เถเร เทฺว, โสณมุตฺตร เมว จ.

๗. มหามหินฺทตฺเถรํ ตํ, เถร อิฏฺฏิยมุตฺติยํ;

สมฺพลํ ภทฺทสาลญฺจ, สเก สทฺธิวิหาริเก.

๘. ลํกาทีเป มนุญฺญมฺหิ, มนุญฺญํ ชินสาสนํ;

ปติฏฺฐาเปถ ตุเมฺห’ติ, ปญฺจ เถเร อเปสยิ.

๙. ตทา กสฺมีรคนฺธาเร, ปกฺกํ สสฺสํ มหิทฺธิโก;

อรวาโล นาคราชา, วสฺสํ กรกสญฺญิตํ.

๑๐. วสฺสา เปตฺวา สมุทฺทสฺมึ, สพฺพํ ขิปติทารุโณ;

ตตฺร มชฺฌนฺติกตฺเถโร, ขิปฺปํ คนฺตฺวา วิหายสา.

๑๑. อรวาลทเหวาริ-ปิฏฺเฐ จงฺกมนาทิเก;

อกาสิ ทิสฺวา ตํนาคา, รุฏฺฐารญฺโญ นิเวทยุํ.

๑๒. นาคราชา’ถรุฏฺโฐ โส, วิวิธา ภิสิกา’กริ;

วาตา มหนฺตา วายนฺติ, เมโฆ คชฺชติ วสฺสติ.

๑๓. ผลนฺตฺย’สนิโย วิชฺชุ, นิจฺฉรนฺติ ตโต ตโต;

มหิรุหา ปพฺพตานํ, กูฏานิ ปปตนฺติ จ.

๑๔. วิรูปรูปา นาคา จ, ภึสาเปนฺติ สมนฺตโต;

สยํ ธุปายติ ชลติ, อกฺโกสนฺโต อเนกธา.

๑๕. สพฺพํ ตํ อิทฺธิยา เถโร, ปฏิพาหิย ภึสนํ;

อโวจ นาคราชํ ตํ, ทสฺเสนฺโต พลมุตฺตมํ.

๑๖. สเทว โกปิ เจ โลโก, อาคนฺตฺวา ตาสเยยฺย มํ;

น เม ปฏิพโล อสฺส, ชเนตุํ ภยเภรวํ.

๑๗. สเจ’ปิ ตฺวํ มหึ สพฺพํ, สสมุทฺทํ สปพฺพตํ;

อุกฺขิปิตฺวา มหานาค, ขิเปยฺยาสิ มโม’ปริ.

๑๘. เนว เม สกฺกุเณยฺยาสิ, ชเนตุํ ภยเภรวํ;

อญฺญทตฺถุ ตเว‘ว’สฺส, วิฆาโต อุรคาธิป.

๑๙. ตํสุตฺวา นิมฺมทสฺส’สฺส, เถโร ธมฺมมเทสยิ;

ตโต สรณสีเลสุ, นาคราชา ปติฏฺฐหิ.

๒๐. ตเถว จตุราสีติ-สหสฺสานิ ภุชงฺคมา;

หิมวนฺเตว คนฺธพฺพา, ยกฺขา กุมฺภณฺฑกา พหู.

๒๑. ปณฺฑโก นาม ยกฺโข ตุ, สทฺธึหาริต ยกฺขิยา;

ปญฺจสเตหิ ปุตฺเตหิ, ผลํ ปาปุณิ อาทิกํ.

๒๒. ‘‘มา’’ทานิ โกธํ ชนิยิตฺถ, อิโต อุทฺธํ ยถาปุเร;

สสฆาตญฺจ มา’กตฺถ, สุขกามาหิ ปาณิโน.

๒๓. กโรถ เมตฺตํ สตฺเตสุ, วสนฺตุ มนุชา สุขํ;

อิติ เตนา’นุสิฏฺฐา เต, ตเถว ปฏิปชฺชิสุํ.

๒๔. ตโต รตนปลฺลงฺเก, เถรํ โส อุรคาธิโป;

นิสีทาปิย อฏฺฐาสิ, พีชมาโน ตทนฺติเก.

๒๕. ตทา กสฺมีรคนฺธาร-วาสิโน มนุชา’คตา;

นาคราชสฺส ปูชตฺถํ, มนฺตฺวา เถรํ มหิทฺธิกํ.

๒๖. เถรเมวา’ภิ วาเทตฺวา, เอกมนฺตํ นิสีทิสุํ;

เตสํ ธมฺมมเทเสสิ, เถโร อาสิวิโสปมํ.

๒๗. อสีติยา สหสฺสานํ, ธมฺมาภิสมโย อหุ;

สตสหสฺส ปุริสา, ปพฺพชุํ เถรสนฺติเก.

๒๘. ตโตปฺปภุปติ กสฺมิร-คนฺธารํ เต อิทานิปิ;

อาสุํ กาสาว ปชฺโชตา, วตฺถุตฺตยปรายนา.

๒๙. คนฺตฺวา มหาเทวตฺเถโร, เทสํ มหิสมณฺฑลํ;

สุตฺตนฺตํ เทวทูตํ โส, กเถสิ ชนมชฺฌโค.

๓๐. จตฺตาลีส สหสฺสานิ, ธมฺมจกฺขุํ วิโสธยุํ;

จตฺตาลีส สหสฺสานิ, ปพฺพชึสุ ตทนฺติเก.

๓๑. คนฺตฺวา’ถ รกฺขิตตฺเถโร, วนวาสึ นเภ ฐิโต;

สํยุตฺตมนมตคฺคํ, กเถสิ ชนมชฺฌโค.

๓๒. สฏฺฐิ นรสหสฺสานํ, ธมฺมาภิสมโย อหุ;

สตฺตตึส สหสฺสานิ, ปพฺพชึสุ ตทนฺติเก.

๓๓. วิหารานํ ปญฺจสตํ, ตสฺมึเทเส ปติฏฺฐหิ;

ปติฏฺฐาเปสิ ตตฺเถวํ, เถโร โส ชินสาสนํ.

๓๔. คนฺตฺวา’ปรนฺตกํ เถโร, โยนโก ธมฺมรกฺขิโต;

อคฺคิกฺขนฺโธปมํ สุตฺตํ, กเถตฺวา ชนมชฺฌโค.

๓๕. สตฺตตึส สหสฺสานิ, ปาเณ ตตฺถ สมาคเต;

ธมฺมามตมปาเยสิ, ธมฺมา ธมฺเมสุ โกวิโท.

๓๖. ปุริสานญฺจ สหสฺสญฺจ, อิตฺถิโย จ ตโต’ธิกา;

ขตฺติยานํ กุลาเยว, นิกฺขมิตฺวาน ปพฺพชุํ.

๓๗. มหารฏฺฐมิสี คนฺตฺวา, โส มหาธมฺมรกฺขิโต;

มหานารทกสฺสปวฺหํ, ชาตกํ กถยี ตหึ.

๓๘. มคฺคผลํ ปาปุณึสุ, จตุราสีติ สหสฺสกา;

เตรสนฺตุ สหสฺสานิ, ปพฺพชึสุ ตทนฺติเก.

๓๙. คนฺตฺวาน โยนวิสยํ, โส มหาธมฺมรกฺขิโต อิสิ;

กาฬการาม สุตฺตนฺตํ, กเถสิ ชนมชฺฌโค.

๔๐. ปาณสต สหสฺสานิ, สหสฺสานิ จ สตฺตติ;

มคฺคผลํ ปาปุณึสุ, ทส สหสฺสานิ ปพฺพชุํ.

๔๑. คนฺตฺวา จตูหิ เถเรหิ, เทเสสิ มชฺฌิโม อิสิ;

หิมวนฺตปเทสสฺมึ, ธมฺมจกฺกปวตฺตนํ.

๔๒. มคฺคผลปาปุณึสุ, อสีติปาณ โกฏิโย;

วิสุํ เต ปญฺจรฏฺฐานิ, ปญฺจเถรา ปสาทยุํ.

๔๓. ปุริสสตสหสฺสานิ, เอเกกสฺเสว สนฺติเก;

ปพฺพชึสุ ปสาเทน, สมฺมาสมฺพุทฺธ สาสเน.

๔๔. สทฺธึ อุตฺตรเถเรน, โสณตฺเถโร มหิทฺธิโก;

สุวณฺณภูมึ อคมา, ตสฺมึ ตุ สมเย ปน.

๔๕. ชาเต ชาเต ราชเคเห, ทารเก รุทฺทรกฺขสี;

สมุทฺทโต นิกฺขมิตฺวา, ภกฺขิตฺวา ปน คจฺฉติ.

๔๖. ตสฺมึ ขเณ ราชเคเห,

ชาโต โหติ กุมารโก;

เถเร มนุสฺสา ปสฺสิตฺวา,

รกฺขสานํ สหายกา.

๔๗. อิติ จินฺติย มาเรตุํ, สา ยุวา อุปสงฺกมุํ;

‘‘กิเมตนฺติ’’จ ปุจฺฉิตฺวา, เถรํ เต เอว มาหุเต.

๔๘. สมณา มยํ หิมวนฺตา, น รกฺขสิ สหายกา;

รกฺขสี สา สปริสา, นิกฺขนฺตา โหติ สาครา.

๔๙. ตํ ทิสฺวาน มหาราวํ, วิรวึสุ มหาชนา;

ทิคุเณ รกฺขเส เถโร, มาปยิตฺวา ภยานเก.

๕๐. ตํ รกฺขสึ สปริสํ, ปริกฺขิปิ สมนฺตโต;

อิทํ อิเมหิ อุทฺธนฺติ, มนฺตฺวา ภีตา ปลายิสา.

๕๑. ตสฺส เทสสฺส อารกฺขํ, ฐเปตฺวาน สมนฺตโต;

ตสฺมึ สมาคเม เถโร, พฺรหฺมชาลมเทสยิ.

๕๒. สรเณสุ จ สีเลสุ, อฏฺฐํสุ พหโว ชนา;

สฏฺฐิยา ตุ สหสฺสานํ, ธมฺมาภิสมโย อหุ.

๕๓. อฑฺฒุฑฺฒานิ สหสฺสานิ, ปพฺพชุํ กุลทารกา;

ปพฺพชึสุ ทิยฑฺฒนฺตุ, สหสฺสํ กุลธีตโร.

๕๔. ตโตปฺปภุติ สญฺชาเต, ราชเคเห กุมารเก;

นามํ กรึสุ ราชาโน, โสณุตฺตร สนามเก.

๕๕. มหาชนสฺสาปิ ชินสฺส กฑฺฒนํ;

วิหาย ปตฺตํ อมตํ สุขมฺปิเต;

กรึสุ โลกสฺส หิตํ ตหึ ตหึ;

ภเวยฺย โย โลกหิเต ปมาทวาติ.

สุชนปฺปสาท สํเวคตฺถาย กเต มหาวํเส

นานาเทสปสาโท นาม ทฺวาทสโม ปริจฺเฉโท.