เอกาทสม ปริจฺเฉท

เทวานํปิยติสฺสาภิเสโก

๑. ตสฺสจฺจเย ตสฺส สุโต, มุฏสิโว’ติ วิสฺสุโต;

สุวณฺณปาลิยา ปุตฺโต, ปตฺโต รชฺชมนากุลํ.

๒. มหาเมฆวนุยฺยานํ, นามนุคคุโณทิตํ;

ผลปุปฺผตรุเปตํ, โส ราชา การยิ สุภํ.

๓. อุยฺยานฐานคฺคหเณ, มหาเมโฆ อกาลโช;

ปาวสฺสิเตน อุยฺยานํ, มหาเมฆวนํ อหุ.

๔. สฏฺฐิวสฺสานิ มุฏสิโว, ราชา ราชฺชมการยิ;

อนุราเธ ปุรวเร, ลํกา ภุวทเน สุเภ.

๕. ตสฺส ปุตฺตา ทสา’เหสุํ, อญฺญมญฺญหิเตสิโน;

ทุเว ธีตา จา’นุกุลา, กุลานุจฺฉวิกา อหู.

๖. เทวานํ ปิยติสฺโสติ, วิสฺสุโต ทุติโย สุโต;

เตสุ ภาตูสุ สพฺเพสุ, ปุญฺญาปญฺญาธิโก อหุ.

๗. เทวานํ ปิยติสฺโส โส, ราชา’สิ ปิตุอจฺจเย;

ตสฺสา’ภิเสเกน สมํ, พหูน’จฺฉริยาน’หุํ.

๘. ลํกาทีปมฺหิ สกเล, นิธโย รตนานิ จ;

อนฺโตฐิตานิ อุคฺคนฺตฺวา, ปถวีตลมารุหุํ.

๙. ลํกาทีปสมีปมฺหิ, ภินฺนนาวาคตานิ จ;

ตตฺรชาตานิ จ ถลํ, รตนานิ สมารุหุํ.

๑๐. ฉาตปพฺพตปาทมฺหิ, ติสฺโส จ เวฬุยฏฺฐิโย;

ชาตารถปโตเทน, สมานา ปริมาณโต.

๑๑. ตาสุ เอกาลตายฏฺฐิ, รชตา’ภา ตหึ ลตา;

สุวณฺณาวณฺณารุจิรา, ทิสฺสนฺเตตา มโนรมา.

๑๒. เอกา กุสุมา ยฏฺฐีตุ, กุสุมานิ ตหึ ปน;

นานานิ นานาวณฺณานิ, ทิสฺสนฺเต’ติ ผุฏานิ จ.

๑๓. เอกาสกุณยฏฺฐิตุ, ตหึ ปกฺขิมิคา พหู;

นานา จ นานาวณฺณา จ, สชีวา วิย ทิสฺสเร.

๑๔. ภยคชรถามลกา, วลยงฺคุลิเวฐกา;

กกุธผลาปากติกา, อิจฺเจตา อฏฺฐชาติโย.

๑๕. มุตฺตาสมุทา อุคฺคนฺตฺวา, ตีเร วฏฺฏิ วิย ฐิตา;

เทวานํ ปิยติสฺสสฺส, สพฺพํ ปุญฺญวิชมฺภิตํ.

๑๖. อินฺทนีลํ เวฬุริยํ, โลหิตงฺกมณิธิ’เม;

รชตานิ ปเน’ตานิ, มุตฺตา ตา ตาวยฏฺฐิโย.

๑๗. สตฺตหพฺภนฺตเรเยว, รญฺโญ สนฺติกมาหรุํ;

ตานิ ทิสฺวา ปตีโต โส, ราชา อิติ วิจินฺตยิ.

๑๘. รตนานิ อนคฺฆานิ, ธมฺมาโสโก อิมานิเม;

สหาโย’รหเตนา’ญฺโญ, ตสฺส ทสฺสํ อิมาน’โต.

๑๙. เทวานํ ปิยติสฺโส จ, ธมฺมาโสโก จ เต อิเม;

เทฺว อทิฏฺฐสหายาหิ, จิรปฺปภุติ ภูปติ.

๒๐. ภาคิเนยฺยํ มหาริฏฺฐํ, อมจฺจํ ปมุขํ ตโต;

ทิชํ อมจฺจํ คณตํ, ราชา เต จตุโร ชเน.

๒๑. ทูโต กตฺวาน ปาเหสิ, พโลฆปริวาริเต;

คาหา เปตฺวา อนคฺฆานิ, รตนานิ อิมานิ โส.

๒๒. มณิชาตี จ ติสฺโส ตา, ติสฺโส จ รถยฏฺฐิโย;

สงฺขญฺจ ทกฺขิณาวตฺตํ, มุตฺตา ชาตี จ อฏฺฐ ตา.

๒๓. อารุยฺห ชมฺพุโกลมฺหิ, นาวํ สตฺตทิเนน เต;

สุเขน ติตฺถํ ลทฺธาน, สตฺตาเหน ตโต ปุน.

๒๔. ปาฏลิปุตฺตํ คนฺตฺวาน, ธมฺมาโสกสฺส ราชิโน;

อทํสุ ปณฺณากาเรเต, ทิสฺวา ตานิ ปสีทิ โส.

๒๕. รตนานิ’ทิสาเนตฺถ, นตฺถิ เม อิติ จินฺติย;

อทา เสนาปติฏฺฐานํ, ตุฏฺโฐ’ริฏฺฐสฺส ภูปติ.

๒๖. โปโรหิจฺจพฺราหฺมณสฺส, ทณฺฑนายตํ ปน;

อทาสิ ตสฺสา’มจฺจสฺส, เสฏฺฐิตฺตํ คณกสฺส ตุ.

๒๗. เตสํ อนปฺปเก โภเค, ทตฺวา วาสฆรานิ จ;

มหามจฺเจหิ มนฺเตนฺโต, ปสฺสิตฺวา ปฏิปาภตํ.

๒๘. วาลพีชนี มุณฺหิสํ, ขคฺคํ ฉตฺตญฺจ ปาทุกํ;

โมฬึ วตํ สปามงฺคํ, ภิงฺการํ หริจนฺทนํ.

๒๙. อโธวิมํ วตฺถโกฏึ, มหคฺฆํ หตฺถปุญฺฉนึ;

นาคา’หฏํ อญฺชนญฺจ, อรุณาภญฺจ มตฺติกํ.

๓๐. อโนตตฺโตทกญฺเจว, คงฺคาสลิลเมว จ;

สงฺขญฺจ นนฺทิยาวฏฺฏํ, วฑฺฒมานํ กุมาริกํ.

๓๑. เหมโภชนกณฺฑญฺจ, สิวิกญฺจ มหารหํ;

หรีฏกํ อามลกํ, มหคฺฆํ อมโตสธํ.

๓๒. สุกาหฏานํ สาลีนํ, สฏฺฐิวาหสตานิ จ;

อภิเสโก ปกรณํ, ปริวารวิเสสิตํ.

๓๓. ทตฺวา กาเล ภหายสฺส, ปณฺณากาเร นริสฺสโร;

ทูเต ปาเหสิสทฺธมฺม-ปณฺณาการมิมมฺปิจ.

๓๔. อหํ พุทฺธญฺจ ธมฺมญฺจ, สงฺฆญฺจ สรณํ คโต;

อุปาสกตฺตํ เทเสสึ, สกฺยปุตฺตสฺส สาสเน.

๓๕. ตฺวมฺปิมานิ รตนานิ, อุตฺตมานิ นรุตฺตม;

จิตฺตํ ปสาทยิตฺวาน, สทฺธาย สรณํ วช.

๓๖. ‘‘กโรถ เม สหายสฺส, อภิเสกํ ปุโน’’ อิติ;

วตฺวา สหยา’มจฺเจเต, สกฺกริตฺวา จ เปสยิ.

๓๗. ปญฺจมาเส วสิตฺวาน, เต มจฺจา’ติวสกฺกตา;

เวสาขสุกฺขปกฺขาทิ-ทิเน ทูตา วินิคฺคตา.

๓๘. ตามลิตฺติยมารุยฺห, นาวํ เตชมฺพุโกลเก;

โอรุยฺห กูปํ ปสฺสึสุ, ปตฺวา ทฺวาทสิยํ อิธ.

๓๙. อทํสุ ปณฺณากาเร เต, ทูตา ลํกาทีปสฺสเต;

เตสํ มหนฺตํ สกฺการํ, ลํกาปติ อการยิ.

๔๐. เต มคฺคสิรมาสสฺส, อาทิจนฺโททเยชิเน;

อภิสิตฺตญฺจ ลํกินฺทํ, อมจฺจา สามิภตฺติโน.

๔๑. ธมฺมาโสกสฺส วจนํ, วตฺวา สามิ หิเตรตา;

ปุโนปิ อภิสิญฺจึสุ, ลํกาหิตสุเขรตํ.

๔๒. เวสาเข นรปติ ปุณฺณมายเมวํ;

เทวานํ ปิยวจโน ปคูฬนาโม;

ลํกายํ ปวีตตปีติ อุสฺสวายํ;

อตฺตานํ ชนสุขโท’ภิเสจยี โสติ.

สุชนปฺปสาทสํเวคตฺถาย กเต มหาวํเส

เทวานํปิยติสฺสาภิเสโกนาม

เอกาทสโม ปริจฺเฉโท.