๗. ปกิณฺณกกณฺโฑ

๑๓๘. อิตฺถิมิสฺเส กุโตสีลํ,

มํส ภกฺเข กุโตทยา;

สุรา ปาเน กุโตสจฺจํ,

มหาโลเภ กุโตหิรี;

มหาตนฺเท กุโตสิปฺปํ,

มหา โกเธ กุโตธนํ.

๑๓๙. สุรา โยโค วิกาโล จ,

สมชฺช จรณาลสํ;

ขิฑฺฑาธุตฺโต ปาปมิตฺโต,

โภคนาสมุขา อิเม.

๑๔๐. ทิวา นาทิกฺขา วตฺตพฺพํ,

รตฺโต นาวจเนน จ;

สญฺจเรยฺย ภยา ภีโต,

วเน วนจรี ยถา.

๑๔๑. ชีวนฺตาปิ มตาปญฺจ,

พฺยาเสน ปริกิตฺติตา;

ทุกฺขิโต พฺยาธิโตมูโฬฺห,

อิณวา นิตฺยเสวโก.

๑๔๒. อนาคตํ ภยํ ทิสฺวา,

ทูรโต ปริวชฺชเย;

อาคตญฺจ ภยํ ทิสฺวา,

อ ภีโต โหติ ปณฺฑิโต.

๑๔๓. นิทฺทาลุโก ปมตฺโตจ,

สุขตฺโต โรควาลโส;

มหิจฺโฉ กมฺมาราโมจ,

สตฺเต เต สตฺถวชฺชิตา.

๑๔๔. ทุคฺคตํ คจฺฉ เห ลาภ,

ลาภี ลาเภน ปูรติ;

ถเล ปวสฺส ปชฺชุนฺน,

สินฺธุ อาเปน ปูรติ;

นตฺถิทํ กมฺมปฺปธานกํ.

๑๔๕. น หิ โกจิ กเต กิจฺเจ,

กตฺตารํ สมุเปกฺขเต;

ตสฺมา สพฺพานิ กิจฺจานิ,

สาว เสเสน การเย.

๑๔๖. ตูลํ สลฺลหุกํ โลเก,

ตโต จาปลฺล-ชาติโก;

ตโต วุฑฺฒ มโนวาโท,

ปมตฺโต พุทฺธสาสเน.

๑๔๗. ปาสาณฉตฺตํ ครุกํ,

ตโต เทวานจิกฺขณํ;

ตโต วุฑฺฒานโมวาโท,

ตโต พุทฺธสฺส สาสนํ.

๑๔๘. กายสฺส ทกฺขิณ หตฺโถ,

โทโส เอตฺถ กนิฏฺฐโก;

กณฺณ ฆานาน-มกฺขีนํ,

วาโม ตุ ปาท-ปาสโก.

๑๔๙. ตมฺพูลสฺส มชฺฌ ปตฺเต,

กุเวโร รกฺขตี สทา;

มูลมฺหิ รกฺขติ ยกฺโข,

อคฺคมฺหิ กาลกณฺณิกา;

ตานิ ภุญฺเชยฺย ฉินฺทิตฺวา,

สิรี เอวํ ปวฑฺฒติ.

๑๕๐. สมฺปุณฺณรกฺโข พฺรหฺมาว,

อจฺจุรกฺโข จ พิสฺสโณ;

ตสฺมา หิ เต ปูชยนฺตุ,

สทา มาเนนฺติ ตํ นรํ.

๑๕๑. โคณา หิ สพฺพคิหีนํ,

โปสกา โภคทายกา;

ตสฺมา หิ มาตา ปิตูว,

มานเย สกฺกเรยฺย จ.

๑๕๒. เยจ ขาทนฺติ โคมํสํ,

มาตุ มํสํว ขาทเร;

มเตสุ เตสุ คิชฺฌานํ,

ทเท โสเต จ วาหเย.

๑๕๓. คุรุสิทฺโธ สิปฺปารมฺโภ,

รวิ โสกฺรา จ มชฺฌิโม;

น สิปฺโป พุทฺธจนฺทโร,

โสรี องฺคาจ มรณํ.

๑๕๔. อฏฺฐมิยํ คุรุํ หนฺติ,

สิสฺสํ หนฺติ จตุทฺทสึ;

สิปฺปํ หนฺติ ทส สิปฺปํ,

มาตาปิตา จ ปุณฺณมึ.

๑๕๕. นาฬิกํ สตฺต นภุญฺเช,

น ลาพุํ นวมํ ตถา;

ทฺวาทส ปฺรินฺนํตฺริมินํ,

ภุญฺเช สิปฺปํ วินสฺสติ.

๑๕๖. เอกํ จเช กุลอตฺถํ,

คามสฺสตฺถํ กุวํ จเช;

คาม จเช ชนปทตฺถํ,

อตฺตตฺถํ ปถวึ จเช.

๑๕๗. เทสํ โอสฺสชฺช คจฺฉนฺติ,

สีโห สปฺปุริโส คโช;

ตตฺเถว นิธนํ ยนฺติ,

กาโก กาปุริโส มิโค.

๑๕๘. ยมฺหิ ปเทเส น มาโน,

น เปมํ น จ พนฺธวา;

น จ วิชฺชาคาโห โกจิ,

น ตตฺถ วสนํ กเร.

๑๕๙. จรเตฺยเกน ปาเทน,

ติฏฺฐเตฺยเกน ปณฺฑิโต;

อ นิสมฺม ปรํ ฐานํ,

น ปุพฺพมาลยํ ชเห.

๑๖๐. ธน ธญฺญ ปโยเคสุ,

ตถา วิชฺชาคเมสุ จ;

ทูเตสุ อปจาเรสุ,

จชฺชา ลชฺชา ตทา ภเว.

๑๖๑. ทฺวิ คุโณ ถีนมาหาโร,

พุทฺธิจาปิ จตุคฺคุโณ;

ฉคฺคุโณ โหติ วายาโม,

กาโมตฺวฏฺฐ-คุโณ ภเว.

๑๖๒. ปพฺเพ ปพฺเพ กเมนุจฺฉุ,

วิเสสรสวาคฺคโต;

ตถา สุเมตฺติโก สาธุ,

วิปรีโตว ทุชฺชโน.

๑๖๓. กสฺสโก วาณิโช มจฺโจ,

สมโณ สุต สีลวา;

เตสุ วิปุล ชาเตสุ,

รฏฺฐมฺปิ วิปุลํ สิยา.

๑๖๔. อสชฺฌาย มลา มนฺตา,

อนุฏฺฐาน มลา ฆรา;

มลํ วณฺณสฺส โกสชฺชํ,

ปมาโท รกฺขโต มลํ.

๑๖๕. หีนานํ คจฺฉเต วิตฺตํ,

วีรานํ สนฺตกตฺตนํ;

วทนฺติ จ หีนา ชนา,

ปุพฺพ-กมฺมปฺปธานกา.

๑๖๖. น วทนฺติ เจวํธีรา,

วายมึสุ สพฺพกมฺเม;

น เจ สิชฺฌติ ตํ กมฺมํ,

อ-ผลํ เอว โก โทโส.

๑๖๗. นีจํ กุลํ นิปญฺญํ วา,

นิรูปํ นิพลํ สมํ;

อิมํ กาลํ ฉุตฺตกาลํ,

ธนเมว วิเสสกํ.

ปกิณฺณกกณฺโฑ นิฏฺฐิโต.

ปณฺฑิโต สุชโน กณฺโฑ,

ทุชฺชโน มิตฺต-อิตฺถิ จ;

ราชา ปกิณฺณโก จาติ,

สตฺต-กณฺฑ-วิภูสิตํ.

วิสุทฺธา จาร-เถเรน,

วิสุทฺธาราม-วาสินา;

สพฺพ-กุลานมตฺถาย,

วิโสธิตํ ปถกฺขเย.