นโม ตสฺส ภควโต อรหโต สมฺมาสมฺพุทฺธสฺส

สุตฺตนฺตนีติ

๑. ปรา ภวนฺตํ ปุริสํ,

มยํ ปุจฺฉาม โคตมํ;

ภวนฺตํ ปุฏฺฐุ มาคมฺม,

กึ ปราภวโต มุขํ.

๒. สุวิชาโน ภวํโหติ,

ทุวิชาโน ปราภโว;

ธมฺมกาโม ภวํ โหติ,

ธมฺมเทสฺสี ปราภโว.

๓. อิติเห ตํ วิชานาม,

ปถโม โส ปราภโว;

ทุตียํ ภควา พฺรูหิ,

กึ ปราภวโต มุขํ.

๔. อสนฺตสฺส ปิโย โหติ,

สนฺเต น กุรุเต ปิยํ;

อสตํ ธมฺมํ โรเจติ,

ตํ ปราภวโต มุขํ.

กมฺมาปราธสตฺตานํ,

วินาเส ปจฺจุปฏฺฐิเต;

อนโย นยรูเปน,

พุทฺธิมากมฺย ติฏฺฐติ.

๕. นิทฺทาสีลี สภาสีลี,

อนุฏฺฐาตา จ โย นโร;

อลโส โกธปญฺญาโณ,

ตํ ปราภวโต มุขํ.

๖. โย มาตรํ ปิตรํ วา,

ชิณฺณกํ คตโยพฺพนํ;

ปหุสนฺโต น ภรติ,

ตํ ปราภวโต มุขํ.

๗. โย พฺราหฺมณํ สมณํ วา,

อญฺญํ วาปิ วณิพฺพกํ;

มุสาวาเทน วญฺเจติ,

ตํ ปราภวโต มุขํ.

๘. ปหุตวิตฺโต ปุริโส,

สหิรญฺโญ สโภชโน;

เอโก ภุญฺชติ สาทูนิ,

ตํ ปราภวโต มุขํ.

๙. ชาติถทฺโธ ธนถทฺโธ,

โคตฺตถทฺโธ จ โย นโร;

สญาตึ อติมญฺเญติ,

ตํ ปราภวโต มุขํ.

๑๐. อิตฺถิธุตฺโต สุราธุตฺโต,

อกฺขธุตฺโต จ โย นโร;

ลทฺธํลทฺธํ วินาเสติ,

ตํ ปราภวโต มุขํ.

น พาฬฺหํ อิตฺถึ คจฺเฉยฺย,

สมฺปสฺสํ เตชสงฺขยํ;

กาสํ สาสํ ทรํ พาลฺยํ,

ขีณเมโท นิคจฺฉติ.

(ก)

มายาเจตา มรีจี จ,

โสโก โรโค อุปทฺทโว;

ขรา จ พนฺธนาเจตา,

มจฺจุปาโส คุหาสโย.

(ข)

พลวนฺโต ทุพฺพลา โหนฺติ,

ถามวนฺโตปิ หายเร;

จกฺขุมา อนฺธกา โหนฺติ,

มาตุคามวสํคตา.

(ค)

คุณวนฺโต นิคฺคุณา โหนฺติ,

ปญฺญวนฺโตปิ หายเร;

ปมุตฺตา พนฺธนา เสนฺติ,

มาตุคามวสํคตา.

(ฆ)

ยสํ กิตฺตึ ธิตึ สูรํ;

พาหุสฺสจฺจํ ปชานนํ;

หาปยนฺติ ปมตฺตสฺส;

กฏฺฐปุญฺจํว ปาวโก.

๑๑. เสหิ ทาเรหิ สนฺตุฏฺโฐ,

เวสิยาสุ ปทุสฺสติ;

ทุสฺสติ ปรทาเรสุ,

ตํ ปราภวโต มุขํ.

(ก)

มยญฺจ ภริยํ นาติกฺกมาม,

อเมฺหจ ภริยา นาติกฺกมนฺติ;

อญฺญตฺร ตาหิ พฺรหฺมจริยํ จราม,

ตสฺมา หิ อมฺหํ ทหรา น มิยฺยเร.

(ข)

เอตาสุ ชายเร สุตฺตมาสุ,

เมธาวิโน โหนฺติ ปหุตปญฺญา;

พหุสฺสุตา เถรคุณา จ โหนฺติ,

ตสฺมา หิ อมฺหํ ทหรา น มิยฺยเร.

๑๒. อตีตโยพฺพโน โปโส,

อาเนติ ติมฺพรุตฺถนึ;

ตสฺส อิสฺสา น สุปติ,

ตํ ปราภวโต มุขํ.

(ก)

น ทุกฺขํ อหินา ทฏฺฐํ,

น ทุกฺขํ สตฺติยา หตํ;

ตญฺจ ทุกฺขญฺจ ติพฺพญฺจ,

ยํ ปสฺเส ชิณฺณกํ ปตึ.

(ข)

นตฺถิ ขิฏฺฏา นตฺถิ รติ,

ชิณฺเณน ปตินา สห;

นตฺถิ อลฺลาปสลฺลาโป,

ชคฺฆิตุํปิ น โสภติ.

(ค)

ยทา จ ทหโร ทหรี,

มนฺตยึสุ รโหคตา;

สพฺเพ โสกา วินสฺสนฺติ,

เยเกจิ หทยสฺสิตา.

๑๓. อิตฺถึ โสณฺฑึ วิกิรณึ,

ปุริสํ วาปิ ตาทิสํ;

อิสฺสริยสฺมึ ถเปติ,

ตํ ปราภวโต มุขํ.

๑๔. อปฺปโภโค มหาตโณฺห,

ขตฺติเย ชายเต กุเล;

โส จ รชฺชํ ปตฺถยติ,

ตํ ปราภวโต มุขํ.

‘‘สุวิชาโน ภวํโหติ,

ทุวิชาโน ปราภโว’’;

อปฺปโภโค มหาตโณฺห.

๑๕. เอเต ปราภเว โลเก,

ปณฺฑิโต สมเวกฺขิย;

อริโย ทสฺสนสมฺปนฺโน,

ส โลกํ ภชเต สิวํ.

วสลสุตฺต

๑. โกธโน อุปนาหีจ,

ปาปมกฺขี จ โย นโร;

วิปนฺนทิฏฺฐี มายาวี,

ตํ ชญฺญา วสโล อิติ.

๒. เอกชํ วา ทฺวิชํ วาปิ,

โยธ ปาณํ วิหึสติ;

ยสฺส ปาเณ ทยา นตฺถิ,

ตํ ชญฺญา วสโล อิติ.

๓. โย หนฺติ อุปรุนฺธติ,

คามานิ นิคมานิ จ;

นิคฺคาหโก สมญฺญาโต,

ตํ ชญฺญา วสโล อิติ.

๔. คาเม วา ยทิ วา รญฺเญ,

ยํ ปเรสํ มมายิตํ;

เถยฺยา อทินฺนํ อาเทติ,

ตํ ชญฺญา วสโล อิติ.

๕. โย หเว อิณมาทาย,

วุจฺจมาโน ปลายติ;

น หิ เต อิณมตฺถีติ,

ตํ ชญฺญา วสโล อิติ.

๖. โยธ กิญฺจิกฺขกมฺยตา,

ปถสฺมึ วชตํ ชนํ;

หนฺตฺวา กิญฺจิกฺข มาเทติ;

ตํ ชญฺญา วสโล อิติ.

๗. โย อตฺตเหตุ ปรเหตุ,

ธนเหตุ จ โย นโร;

สกฺขิปุฏฺโฐ มุสาพฺรูติ,

ตํ ชญฺญา วสโล อิติ.

๘. โย ญาตีนํ สขีนํ วา,

ทาเรสุ ปฏิทิสฺสติ;

สหสา สมฺปิเยน วา,