๕. อิตฺถิกณฺโฑ

๙๔. โกกิลานํ สทฺทํ รูปํ,

นารีรูปํ ปติพฺพตา;

วิชฺชา รูปํ อ-รูปานํ,

ขมา รูปํ ตปสฺสินํ.

๙๕. อิตฺถีนญฺจ ธนํ รูปํ,

ปุริสานํ วิชฺชา ธนํ;

ภิกฺขูนญฺจ ธนํ สีลํ,

ราชานญฺจ ธนํ พลํ.

๙๖. ตปสฺสิโน กิสา โสภา,

ถูลา โสภา จตุปฺปทา;

ปุริสา วิชฺชวา โสภา,

อิตฺถี โสภาส สามิกา.

๙๗. ปญฺจ รตฺยา สุคนฺธพฺพา,

สตฺต รตฺยา ธนุคฺคหา;

เอก มาสา สุภริยา,

อฑฺฒ มาสา สิสฺสา มลา.

๙๘. หึ รมติ ปง,

หง รมติ โปก.

ถี รมติ ปุ,

ขุ รมติ ธํ.

๙๙. ชิณฺณมนฺนํ ปสํเสยฺย,

ทารญฺจ คตโยพฺพนํ;

รณา ปุนาคตา สูรํ,

สสฺสญฺจ เคหมาคตํ.

๑๐๐. ทฺวตฺติ-ปติกา นารี จ,

ภิกฺขุ ทฺวตฺติ-วิหาริโก;

ทฺวตฺติ-ปาส-มุตฺโต ปกฺขี,

กต-มายา พหูถรํ.

๑๐๑. ทุชฺชนํ ปหาราทเม,

มิตฺตํ ทเม อ-ภาณิกา;

อิตฺถิญฺจ พฺยสนา ทเม,

ราคินํ อปฺป โภชนา.

๑๐๒. น รตฺติ วินา จนฺทิมา,

วีจึ วินา จ อณฺณโว;

หํสํ วินา โปกฺขรณี,

ปตึ กญฺญาจ โสภเต.

๑๐๓. ปตินา ชนิโต โภโค,

อิตฺถิยาว สํโคปฺปิโต;

ปุริโสว หิ ปธาโน,

อิตฺถี สุตฺตํว สูจิยา.

๑๐๔. สพฺพานที วงฺกนที,

สพฺเพ กฏฺฐมยา วนา;

สพฺพิตฺถิโย กเร ปาปํ,

ลภมาเน นิวาตเก.

๑๐๕. วิวาทสีลึ อุสูยภาณินึ,

สมฺปสฺสตณฺหึ พหุปากภุตฺตินึ;

อคฺคนฺตภุตฺตึ ปรเคหวาสินึ,

นารึ จเช ปุตฺตสตมฺปิ ปูมา.

๑๐๖. ภุตฺเตสุ มณฺเฑสุ ชนีว กนฺตินี,

คุเยฺหจ ฐาเน ภคินีว หิริณี;

กมฺเมสุ ปตฺเตสุ กโรติ ทาสีว,

ภเยสุ มนฺตี สยเนสุ รามเย;

รูปีสุ สิกฺขี กุปเนสุ ขนฺตินี,

สา นารี เสฏฺฐาติ วทนฺติ ปณฺฑิตา;

กายสฺส เภทาจ ทิเวภเวยฺย สา.

๑๐๗. สามา มิคกฺขี ตนุมชฺฌคตฺตา,

สูรู สุเกสี สมทนฺตปนฺตี;

คมฺภีรนาภี ยุวตี สุสีลี,

หีเน กุเล ชาตาปิ วิวาหฺยา.

๑๐๘. สรทํรตุ-กาลานํ,

ภริยานํ รูปวตี;

เชฏฺโฐ ปธานํ ปุตฺตานํ,

ทิสานํ อุตฺตราทิสา.

๑๐๙. ยา อิจฺเฉ ปุริโส โหตุํ,

ชาติ ชาติ ปุนปฺปุนํ;

สามิกํ อปจาเยยฺย,

อินฺทํว ปาริจาริกา.

๑๑๐. โย อิจฺเฉ ปุริโส โหตุํ,

ชาติ ชาติ ปุนปฺปุนํ;

ปรทานํ วิวชฺเชยฺย,

โธตปาโทว กทฺทมํ.

๑๑๑. อติกฺกนฺต วโย โปโส,

อาเนติ ติมฺพรุตฺตนึ;

ตสฺสา อิสฺสา อสทฺธาติ,

ตํ ปราภวโต มุขํ.

อิตฺถิกณฺโฑ นิฏฺฐิโต.