๔. มิตฺตกณฺโฑ

๗๙. หิตกาโร ปโร พนฺธุ,

พนฺธูปิ อหิโต ปโร;

อ หิโต เทหโช พฺยาธิ,

หิตํ อรญฺญโมสธํ.

๘๐. ปโรกฺเข คุณ-หนฺตารํ,

ปจฺจกฺเข ปิยวาทินํ;

วชฺเชยฺย ตาทิสํ มิตฺตํ,

วิสกุมฺเภ ยถา มธุํ.

๘๑. ธนหีเน จเช มิตฺโต,

ปุตฺตทารา สโหทรา;

ธนวนฺตํว เสวนฺติ,

ธนํ โลเก มหา สขา.

๘๒. ชาเนยฺย เปเสน ภจฺจํ,

พนฺธุํ วาปิ ภยาคเต;

อปฺปกาสุ ตถา มิตฺตํ,

ทารญฺจ วิภวกฺขเย.

๘๓. โส พนฺธุ โย หิเต ยุตฺโต,

ปิตโร โหนฺติ โปสโก;

ตํ มิตฺตํ ยตฺถ วิสฺสาโส,

สา ภริยา จ ยสฺส นิพฺพูติ.

๘๔. น วิสฺสเส อ-วิสฺสตฺตํ,

มิตฺตญฺจาปิ น วิสฺสเส;

กทาจิ กุปิโต มิโต,

สพฺพํ โทสํ ปกาสเย.

๘๕. สกึ ทุฏฺฐญฺจ โย มิตฺตํ,

ปุน สนฺธิตุมิจฺฉติ;

โส มจฺจุํ อุปคณฺหาติ,

คพฺภมสฺสตรี ยถา.

๘๖. วเห อ-มิตฺตํ ขนฺเธน,

ยาว กาโล อนาคโต;

ตเมว อาคเต กาเล,

เสเล ภินฺเท ฆฏํ อิว.

๘๗. อิณเสโส อคฺคิเสโส,

สตฺรุเสโส ตเถว จ;

ปุนปฺปุนํ วิวฑฺฒนฺติ,

ตสฺมา เสสํ น การเย.

๘๘. ปทุมํว มุขํ ยสฺส,

วาจา จนฺทน สีตลา;

ตาทิสํ โนปเสเวยฺย,

หทเยตุ หลาหลํ.

๘๙. น เสเว ผรุสํ สามึ,

นจ เสเวยฺย มจฺฉรึ;

ตโต อปคฺคณฺหํ สามึ,

เนว นิคฺคหิตํ ตโต.

๙๐. สิงฺคี ปญฺญาส หตฺเถน,

วชฺเช สเตน วาชินํ;

หตฺถึ ทนฺตึ สหสฺเสน,

เทส จาเคน ทุชฺชนํ.

๙๑. กุเทสญฺจ กุมิตฺตญฺจ,

กุกุลญฺจ กุพนฺธวํ;

กุทารญฺจ กุทาสญฺจ,

ทูรโต ปริวชฺชเย.

๙๒. โรคาตุเร จ ทุพฺภิกฺเข,

พฺยสเน สตฺตุ วิคฺคเห;

ราชทฺวาเร สุสาเน จ,

เย ติฏฺฐนฺติ สุมิตฺตกา.

๙๓. สีตวาโจ พหุมิตฺโต,

ผรุโส อปฺปมิตฺตโก;

อุปมํ เอตฺถ ญาตพฺพา,

จนฺท-สูริย-ราชูนํ.

มิตฺตกณฺโฑ นิฏฺฐิโต.