๔. พาลทุชฺชนกณฺโฑ

๖๘. อติปฺปิโย น กาตพฺโพ,

ขโล โกตูหลํ กโร;

สิรสา วหฺยมาโนปิ,

อฑฺฒปูโร ฆโฏ ยถา.

๖๙. สปฺโป ทุฏฺโฐ ขโล ทุฏฺโฐ,

สปฺโป ทุฏฺฐตโร ขโล;

มนฺโตสเธหิ โส สปฺโป,

ขโล เกนุปสมฺมติ.

๗๐. โย พาโล มญฺญติ พาลฺยํ,

ปณฺฑิโต วาปิ เตน โส;

พาโลว ปณฺฑิตมานี,

โส เว พาโลติ วุจฺจติ.

๗๑. มธุํว มญฺญตี พาโล,

ยาว ปาปํ น ปจฺจติ;

ยทาจ ปจฺจตี ปาปํ,

อถ ทุกฺขํ นิคจฺฉติ.

๗๒. น สาธุ พลวา พาโล,

สหสา วินฺทเต ธนํ;

กายสฺส เภทา ทุปฺปญฺโญ,

นิรยํ โสปปชฺชติ.

๗๓. ฆเร ทุฏฺโฐ จ มูสีโก จ,

วเน ทุฏฺโฐ จ วานโร;

สกุเณ จ ทุฏฺโฐ กาโก,

นเร ทุฏฺโฐจ พฺราหฺมโณ.

๗๔. ทีฆา ชาครโต รตฺติ,

ทีฆํ สนฺตสฺส โยชนํ;

ทีโฆ พาลาน สํสาโร,

สทฺธมฺมํ อ-วิชานตํ.

๗๕. ติล มตฺตํ ปเรสํว,

อปฺป โทสญฺจ ปสฺสติ;

นาฬิเกรมฺปิ สโทสํ,

ขล-ชาโต น ปสฺสติ.

๗๖. นตฺตโทสํ ปเร ชญฺญา,

ชญฺญา โทสํ ปรสฺสตุ;

คุเยฺห กุมฺโม องฺคานิ,

ปร โทสญฺจ ลกฺขเย.

๗๗. ปณฺฑิตสฺส ปสํสาย,

ทณฺโฑ พาเลน ทียเต;

ปณฺฑิโต ปณฺฑิเตเนว,

วณฺณิโตว สุวณฺณิโต.

๗๘. ลุทฺธํ อตฺเถน คเณฺหยฺย,

ถทฺธํ อญฺชลิ กมฺมุนา;

ฉนฺทานุวตฺติยา มูฬฺหํ,

ยถาภูเตน ปณฺฑิตํ.

พาลทุชฺชนกณฺโฑ นิฏฺฐิโต.