ชินวํสทีปํ |โอ๐.๐๐๐๑|

นโม ตสฺส ภควโต อรหโต สมฺมาสมฺพุทฺธสฺส

๑. มหาทโย โย หทโย’ทโย’ทโย

หิตาย ทุกฺขานุภเว ภเว ภเว,

อกาสิ สมฺโพธิปทํ ปทํ ปทํ

ตมาภิวนฺทามิ ชินํ ชินํ ชินํ; (ยมกพนฺธนํ)

๒. |โอ๐.๐๐๐๒|

ปหาย ยตฺถา’ภิรตึ รตึ รตึ

รมนฺติ ธมฺเมว มุนี มุนี มุนี,

วิมุตฺติทํ สพฺพภวา ภวา’ภวา

ตมาภิวนฺเท มหิตํ หิตํ หิตํ; (ยมกพนฺธนํ)

๓. |โอ๐.๐๐๐๔|

นิปีตสทฺธมฺมรสา รสา’รสา

สุปุญฺญเขตฺโต’รสตํ สตํ สตํ,

คตา วิธูตา วินเยน เยน เย

ตมาภิวนฺเท’สิคณงฺคณ’งฺคณํ; (ยมกพนฺธนํ)

๔. |โอ๐.๐๐๐๕|

ชินา’นตมฺโภรุห หํสราชินี

ชิโนรสานํ มุขปญฺชรา’ลิ นี,

สทตฺถสารํ สรสํ วิสูท นี

อุเปตุ เม มานสเมว วาณิ นี;

๕. กมฺมาวเสสา วิจิโต’ปชาตฺยา

คนฺถา’หิสงฺขารวิพนฺธกา เม,

ปณาม ปุญฺญาติสเยน’เนน

มา ปากทานา’วสรา ภวนฺตุ;

๖. สุวณฺณวณฺณสฺส ชินสฺส วณฺณํ

วณฺเณยฺย กปฺปมฺปิ กชิโต สุวณฺโณ,

กปฺปสฺสิ’โวสาน มนตฺตตาย

น ปาปุเณ พุทฺธคุณาน มนฺตํ;

๗. |โอ๐.๐๐๐๖|

นิทฺธนฺต จามีกร จารุ รูปํ

สรสฺสตี ภูสณ ภาสนํจ,

อนญฺญ สาธารณ ญาณมสฺส

อวาวิยา’จินฺติย มปกฺปเมยฺยํ;

๘. กุหึ อสาธารณ รูป ลีลา

กุหึ อสาธารณ วาณิ ลีลา,

กุหึ อสาธารณญาณ ลีลา

กุหึ นุ เม มนฺทมติสฺส ลีลา;

๙. |โอ๐.๐๐๐๗|

วิภาวิมานี ปรวมฺหิโน เย

อิสฺสา’ภิมาเนน วิภญฺญมานา,

คเวสยนฺตี’ธ ปรสฺส รนฺธํ

เตสํ ปสํสาครหาหิ กิมฺเม;

๑๐. ปสตฺถ สตฺถาคม ปารทสฺสี

เย สาธโว สาธุ คุณปฺปสนฺตา,

คนฺถสฺส นิมฺมาณปริสฺสมํ โน

ชานนฺติ เตเยว อิธปฺปมาณา;

๑๑. อาทิจฺจวํสปฺปภวสฺส ตสฺส

ชินสฺส สตฺถาคมโกวิเทหิ,

วุตฺโตปิ ปุพฺพาจริเยหิ เยสุ

คนฺเถสุ สงฺเขปวเสน วํโส;

๑๒. น เตหิ สกฺกา สุคตสฺส วํสํ

กิญฺจาปิ วิญฺญาตุ มเสสยิตฺวา,

สมฺปุณฺณวํสสฺส วิภาวนาย

ตสฺมา สมุสฺสาหิต มานเสน;

๑๓. |โอ๐.๐๐๐๘|

อภิปฺปสนฺโน รตนตฺตยมฺหิ

ปสตฺถวํสปฺปภโว ปภุนํ,

วิภุสโณ วิสฺสุตกิตฺติโฆโส

โย ภาติ ลงฺกาย มุฬารภาโคฺย;

๑๔. อมนฺทจาคา’ภิรตสฺส

ปุนนฺทุ นามสฺส ทยาธนสฺส,

พุทฺเธ ปสาทาติสยสฺส ตสฺส

อชฺเฌสนญฺจาปิ ปฏิคฺคเหตฺวา;

๑๕. นสฺสาย ปุพฺพาจริโย’ปเทสํ

โสตูน มตฺถาย มยา หิตาย,

นิรุตฺติยา มาคธิกาย สมฺมา

วิธียเต’ทํ ชินวํสทีปํ;

๑๖. |โอ๐.๐๐๐๙|

สทฺธาสิเนหานุคตาย ปญฺญา-

ทสาย โสตูหิ มโนวิมาเน,

ปทีปิโต’ยํ ชินวํสทีป-

ทีโปหเรปาปตมปฺปพนฺธํ;

๑๗. ปุรงฺคปุณฺณา สิริชมฺพุทีเป

สมฺปตฺติภาเรน ทิวา’วติณฺณา,

ยา เทวราชสฺส’มราวตี’วา-

มราวตีนาม ปุรี ปุเร’สี;

๑๘. วิชฺชาธรานญฺจ วิหงฺคมานํ

วิพนฺธ เวหาสคตึ พหาส,

ยสฺมึ ปุรสฺมึ ชิตเวริ จกฺกํ

ปาการจกฺกํ วิย จกฺกวาฬํ;

๑๙. |โอ๐.๐๐๑๐|

สญฺจุมฺพิตโมฺหช รโช ปพนฺธ-

สุปิญฺชราปา ปริขาหิรามา,

ปุริตฺถิ ปาการ นิตมฺพภาเค

สมุพฺพหี กญฺจน เมขลา’ภํ;

๒๐. รตฺตินฺทิวา รตฺตมณิ’นฺทนีล-

มณิปฺปภารญฺชิต ราชธานิ,

พพนฺธ ยา’มนฺทสุรินฺทจาป-

สมุชฺชลากาสตลพฺพิลาสํ;

๒๑. ยหึวธูนํ วทนมฺพุเชหิ

กตาวมานํ หริณงฺกพิมฺพํ,

ปภาหิ นีโลปลโตรณาตํ

โสกาภีภูตํจ วิวณฺณมาป;

๒๒. |โอ๐.๐๐๑๑|

สโรรุห’นฺตี มณิมนฺทิราภา-

สญฺจุมฺพิตํ ปุณฺณสสงฺกพิมฺพํ;

สงฺกาย รามาชนตา’ภิรามา

กเร ปสาเรสิ ปุรมฺหิ ยสฺมึ;

๒๓. ยตฺถ’งฺคนานํ ปฏิพิมฺพิตานิ

อาทาสภิตฺตีสุ มุขมฺพุชานิ,

อาสุํ วิฆาตาย มธุพฺพตานํ

วิโลจนาลีน มนุคฺคหาย;

๒๔. สมฺมตฺต มาตงฺค ธราธเรหิ

ยสฺมึ อภิสฺสนฺท มทสฺสวนฺติ,

ตุรงฺค รงฺเคหี ตรงฺค มาลา

สมากุเลวา’สิ วิธูต ธูลี;

๒๕. |โอ๐.๐๐๑๒|

นิกฺขิตฺตวีณา มณินุปุรานํ

วิลาสินีนํ มุทุปาณิ ปาเท,

มตฺตาลิมาลา กลนาทินี กึ

นาลงฺกรุํ ยตฺถ กตาวกาสา;

๒๖. ธวตฺถินีนํ กุจสารเสหิ

เนตฺตาลิภารา’นนนีรเชหิ,

ยา หาสวีจีหิ ปุรี รชนฺยา

รราช สมผุลฺลสโรชินี’ว;

๒๗. จนฺทปฺปภา จุมฺพิต จนฺทกนฺต

ปาสาณธารา มณิจนฺทิกาสู,

จนฺทานนานํ ยหิ มงฺคนาหํ

ปริสฺสมสฺโส’ปสมาย’เหสุํ;

๒๘. |โอ๐.๐๐๑๓|

ยสฺมึ ปูเร อุทฺธมโธ วินทฺธ-

ชุติปฺปพนฺโธ มณิมนฺทิรานํ,

สมุพฺพหี เครุก ปงฺก ทิทฺธ-

วิตาน ปจฺจตฺถรณพฺพิลาสํ

๒๙. สุวณฺณ มุตฺตา มณิ วํสวณฺณา-

ปวาฬ รูปี วชิเรหิญฺจา’ปิ,

ยา สตฺตธญฺเญหิ ธเนหิ ผีตา

อหู ปุริ ธญฺญวตี’ว นารี; (สิเลสพนฺธนํ)

๓๐. ปสาริตา’เนกทิสามุเขสุ

วิจิตฺตวตฺถา’ภรณาทิปูรา,

ยตฺถา’ปณา นิชฺชิตกปฺปรุกฺขา

กรึสุ โลกาภิมตตฺถสิทฺธึ;

๓๑. |โอ๐.๐๐๑๔|

ปราครตฺตา มธุปาติมตฺตา

สมฺหินฺนเวลา ฆนนีลวาลา,

หํสาสยา ปญฺจสราภิรามา

ยสฺมึ ตฬากา วิย กามโภคี; (สิเลสพนฺธนํ)

๓๒. ปุรนฺตรสฺมึ รตนคฺฆิกานํ

รํสิปฺปพนฺเธหิ หตนฺธกาเร,

กุนฺทารวินฺทพฺภุทเยนยสฺมึ

รตฺตินฺทิวาเภท มเวทิ โลโก;

๓๓. |โอ๐.๐๐๑๕|

มาตงฺคชีมูตฆฏาย ฆณฺฏา-

ฏงฺการคมฺภีรรวาย ยสฺมึ,

ปลมฺภีตา มตฺตสิขณฺฑิมาลา

อกา วิกาเลปิ อขณฺฑกีฬํ;

๓๔. ปุรมฺหิ ยสฺมึ จรณมฺพุเชหิ

วธูชโต พนฺธิตนูปุเรหิ,

วิกาส โกกาสน สีส พทฺธ