เตลกฏาหคาถา |โอ๐.๐๐๐๑|

นโม ตสฺส ภควโต อรหโต สมฺมาสมฺพุทฺธสฺส

๑. ลํกิสฺสโร ชยตุ วารณราชคามี

โภคินฺทโภค รุจิรายต ปีณ พาหุ,

สาธุปจารนิรโต คุณสนฺนิวาโส

ธมฺเม ฐิโต วีคตโกธมทาวเลโป;

๒. โย สพฺพโลกมหิโต กรุณาธิวาโส

โมกฺขากโร รวิกุลมฺพร ปุณฺณ จนฺโท,

เญยฺโยทธึ สุวิปุลํ สกลํ วิพุทฺโธ

โลกุตฺตมํ นมถ ตํ สิรสา มุนินฺทํ;

๓. โสปานมาลมมลํ ติทสาลยสฺส

สํสาร สาครสมุตฺตรณาย เสตุํ,

สพฺพาคตีภย วิวชฺชิต เขม มคฺคํ

ธมฺมํ นมสฺสถ สทา มุนินา ปณีตํ;

๔. |โอ๐.๐๐๐๒|

เทยฺยํ ตทปฺปมปิ ยตฺถ ปสนฺน จิตฺตา

ทตฺวา นรา ผลมุฬารตรํ ลภนฺเต,

ตํ สพฺพทา ทสพเลนปิ สุปฺปสตฺถํ

สงฺฆํ นมสฺสถ สทามิตปุญฺญเขตฺตํ;

๕. เตโช พเลน มหตา รตนตฺตยสฺส

โลกตฺตยํ สมธิคจฺฉติ เยน โมกฺขํ,

รกฺขา น จตฺถิ จ สมา รตนตฺตยสฺส

ตสฺมา สทา ภชถ ตํ รตนตฺตยํ โภ;

๖. ลํกิสฺสโร ปรหิเตกรโต นิราโส

รตฺติมฺปิ ชาครรโต กรุณาธิวาโส,

โลกํ วิโพธยติ โลกหิตาย กามํ

ธมฺมํ สมาจรถ ชาคริยานุยุตฺตา;

๗. |โอ๐.๐๐๐๓|

สตฺโตปการ นิรตา กุสเล สหายา

โภ ทุลฺลภา ภุวิ นรา วิหตปฺปมาทา,

ลํกาธิปํ คุณธนํ กุสเล สหายํ

อาคมฺม สํจรถ ธมฺมมลํ ปมาทํ;

๘. ธมฺโม ติโลก สรโณ ปรโม รสานํ

ธมฺโม มหคฺฆรตโน รตเนสุ โลเก,

ธมฺโม ภเว ติภวทุกฺข วินาสเหตุ

ธมฺมํ สมาจรถ ชาคริยานุยุตฺตา;

๙. นิทฺทํ วิโนทยถ ภาวยถปฺปเมยฺยํ

ทุกฺขํ อนิจฺจมฺปิ เจห อนตฺตตญฺจ,

เทเห รตึ ชหถ ช ชชฺชรภาชนาโภ

ธมฺมํ สมาจรถ ชาคริยานุยุตฺตา;

๑๐. |โอ๐.๐๐๐๔|

โอกาส มชฺช มม นตฺถิ สุเว กริสฺสํ

ธมฺมํ อิตีหลสตา กุสลปฺปโยเค,

นา’ลํ ติยทฺธสุ ตถา ภุวนตฺตเย จ

กามํ น จตฺถิ มนุโช มรณา ปมุตฺโต;

๑๑. ขิตฺโต ยถา นภสิ เกนจิเทว เลฑฺฑุ

ภูมึ สมาปตฺติ ภารตยา ขเณน,

ชาตตฺตเมว ขลุ การณเมกมตฺร

โลกํ สทา นนุ ธุวํ มรณาย คนฺตุํ;

๑๒. กามํ นรสฺส ปตโต คิริมุทฺธนาโต

มชฺเฌ น กิญฺจิ ภยนิสฺสรณาย เหตุ,

กามํ วชนฺติ มรณํ ติภเวสุ สตฺตา

โภเค รตึ ปชหถาปิ จ ชีวิเต จ;

๑๓. |โอ๐.๐๐๐๕|

กามํ ปตนฺติ มหิยา ขลุ วสฺสธารา

วิชฺชุลฺลตา วิตตเมฆ มุขา ปมุตฺตา,

เอวํ นรา มรณภีม ปปาตมชฺเฌ

กามํ ปตนฺติ นหิ โกจิ ภเวสุ นิจฺโจ;

๑๔. เวลาตเฏ ปฏุตโรรุ ตรํคมาลา

นาสํ วชนฺติ สตตํ สลิลาลยสฺส,

นาสํ ตถา สมุปยนฺติ นรามรานํ

ปาณานิ ทารุณตเร มรโณทธิมฺหิ;

๑๕. รุทฺโธปิ โส รถวรสฺสคชาธิเปหิ

โยเธหิ จาปิ สพเลหิ จ สายุเธหิ,

โลกํ วิวํจิย สทา มรณูสโภ โส

กามํ นิหนฺติ ภุวนตฺตย สาลิ ทณฺฑํ;

๑๖. |โอ๐.๐๐๐๖|

โภ มารุเตน มหตา วิหโต ปทีโป

ขิปฺปํ วินาส มุขเมติ มหปฺปโภปิ,

โลเก ตถา มรณจณฺฑ สมีรเณน

ขิปฺปํ วินสฺสติ นรายุมหา ปทีโป;

๑๗. รามชฺชุนปฺปภูติ ภูปติ ปุํควา จ

สูรา ปุเร รณมุเข วิชิตาริ สงฺฆา,

เตปีห จณฺฑ มรโณฆ นิมุคฺคเทหา

นาสํ คตา ชคติ เก มรณา ปมุตฺตา?

๑๘. ลกฺขี จ สาครปฏา สธราธรา จ

สมฺปตฺติโย จ วิวิธา อปิ รูปโสภา,

สพฺพา จ ตา อปิ จ มิตฺตสุตา จ ทารา

เก จาปิ กํ อนุคตา มรณํ วชนฺตํ?

๑๙. |โอ๐.๐๐๐๗|

พฺรหฺมาสุราสุรคณา จ มหานุภาวา

คนฺธพฺพกินฺนรมโหรครกฺขสา จ,

เต จา ปเร จ มรณคฺคิสิขาย สพฺเพ

อนฺเต ปตนฺติ สลภา อิว ขีณปุญฺญา;

๒๐. เย สาริปุตฺตปมุขา มุนิสาวกา จ

สุทฺธา สทาสวนุทา ปรมิทฺธิปตฺตา,

เต จาปิ มจฺจุวฬภา มุข สนฺนิมุคฺคา

ทีปานิวานลหตา ขยตํ อุเปตา;

๒๑. พุทฺธาปิ พุทฺธกมลามลจารุเนตฺตา

พตฺตึสลกฺขณ วิราชิต รูปโสภา,

สพฺพาสจกฺขยกราปิ จ โลกนาถา

สมฺมทฺทิตา มรณมตฺตมหาคเชน;

๒๒. |โอ๐.๐๐๐๘|

โรคาตุเรสุ กรุณา น ชราตุเรสุ

ขิฑฺฑาปเรสุ สุกุมารกุมารเกสุ,

โลกํ สทา หนติ มจฺจุ มหาคชินฺโท

ทวานโล วนมิวาวรตํ อเสสํ;

๒๓. อาปุณฺณตา น สลิเล น ชลาสยสฺส

กฏฺฐสฺส จาปิ พหุตา น หุตาสนสฺส,

ภุตฺวาน โส ติภูวนมฺปิ ตถา อเสสํ

โภ นิทฺทโย น ขลุ ปีติมุเปติ มจฺจุ;

๒๔. โภ โมห โมหิตตยา วิวโส อธญฺโญ

โลโก ปตตฺยปิปิ มจฺจุมุเข สุภีเม,

โภเค รตึ สมุปยาติ นิหีนปญฺโญ

โทลา ตรงฺคจปเล สุปิโนปเมยฺเย;

๒๕. |โอ๐.๐๐๐๙|

เอโกปิ มจฺจุรภิหนฺตุมลํ ติโลกํ

กึ นิทฺทยา อปิ ชรามรณานุยายี,

โก วา กเรยฺย วิภสุเวสุ จ ชีวิตาสํ

ชาโต นโร สุปิน สํคม สนฺนิเภสุ;

๒๖. นิจฺจาตุรํ ชคทิทํ สภยํ สโสกํ

ทิสฺวา จ โกธมทโมหชราภิภูตํ,

อุพฺเพคมตฺตมปิ ยสฺส น วิชฺชตี เจ

โส ทารุโณน มรณํ วต ตํ ธิรตฺถุ!

โภ โภ น ปสฺสถ ชราสิธรญฺหิ มจฺจุ

มาหญฺญมานมขิลํ สตตํ ติโลกํ,

กึ นิทฺทยา นยถ วีตภยา ติยามํ

ธมฺมํ สทา’สวนุทํ จรถ’ปฺปมตฺตา;

๒๘. |โอ๐.๐๐๑๐|

ภาเวถ โภ มรณมารวิวชฺชนาย

โลเก สทา มรณ สญฺญมิมํ ยตตฺตา,

เอวญฺหิ ภาวนรตสฺส นรสฺส ตสฺส

ตณฺหา ปหียติ สรีรคตา อเสสา;

๒๙. รูปํ ชรา ปิยตรํ มลินีกโรติ

สพฺพํ พลํ หรติ อตฺตนิ โฆรโรโค,

นานูปโภค ปริรกฺขิต มตฺตภาวํ

โภ มจฺจุ สํหรติ กึ ผลมตฺตภาเว?

๓๐. กมฺมานิลาปหตโรคตรํคภํเค

สํสาร สาคร มุเข วิตเต วิปนฺนา,

มา มาปมาทมกริตฺถ กโรถ โมกฺขํ

ทุกฺโขทโย นนุ ปมาทมยํ นรานํ;

๓๑. |โอ๐.๐๐๑๑|

โภคา จ มิตฺตสุตโปริส พนฺธวา จ

นารี จ ชีวิตสมา อปิ เขตฺตวตฺถุ,

สพฺพานิ ตานิ ปรโลกมิโต วชนฺตํ

นานุพฺพชนฺติ กุสลากุสลํว โลเก;

๓๒. โภ วิชฺชุจํจลตเร ภวสาครมฺหิ

ขิตฺตา ปุรา กตมหาปวเนน เตน,

กามํ วิภิชฺชติ ขเณน สรีรนาวา

หตฺเถ กโรถ ปรมํ คุณหตฺถสารํ;

๓๓. นิจฺจํ วิภิชฺชติห อามก ภาชนํว

สํรกฺขิโตปิ พหุธา อิห อตฺตภาโว,

ธมฺมํ สมาจรถ สคฺคปติปฺปติฏฺฐํ

ธมฺโม สุจิณฺณมิหเมว ผลํ ททาติ;

๓๔. |โอ๐.๐๐๑๒|

รนฺตฺวา สทา ปิยตเร ทิวิ เทวรชฺเช

นมฺหา จวนฺติ วิพุธา อปิ ขีณปุญฺญา,

สพฺพํ สุขํ ทิวิ ภุวีห วิโยคนิฏฺฐํ

โก ปญฺญวา ภวสุเขสุ รตึ กเรยฺย?

๓๕. พุทฺโธ สสาวกคโณ ชคเทกนาโถ