นโม ตสฺส ภควโต อรหโต สมฺมาสมฺพุทฺธสฺส

ชินาลงฺการ

ปณามทีปนีคาถา

๑. โย โลกตฺถาย พุทฺโธ ธนสุตภริยาองฺคชีเว จชิตฺวา ปูเรตฺวา อารมิโย ติทสมนุปเม โพธิปกฺขียธมฺเม,

ปตฺวา โพธึ วิสุทฺธํ สกลคุณททํ เสฏฺฐภูโต ติโลเก,

กตฺวา ทุกฺขสฺส อนฺตํ กตสุภชนตํ ทุกฺขโต โมจยิตฺถ.

๒. นตฺวานาหํ ชินนฺตํ สมุปจิตสุภํ สพฺพโลเกกพนฺธุํ,

นาหุ เยนปิ ตุโลฺย กุสลมหิมโต อุตฺตโม ภูตโลเก ตสฺเสวายํ อุวิมฺหํ สุวิปุลมมลํ โพธิสมฺภารภูตํ,

เหตุํ เหตฺวานุรูปํ สุคตคตผลํ ภาสโต เม สุณาถ.

โยคาวจรสมฺปตฺติทีปนีคาถา

๓. ชาโต โย นวเม ขเณ สุตธโร สีเลน สุทฺธินฺทฺริโย สํสารํ อยโต ภวกฺกยกรํ ทิสฺวา สิวํ เขมโต,

ตํ สมฺปาปกมคฺคเทสกมุนึ สมฺปูชยนฺโต ตโต อุทฺธานุสฺสติภาวนาทิกมโต สมฺปาทเย ตํ สิวํ.

วตฺถุวิโสธนีคาถา

๔. พุทฺโธติ โก พุทฺธคุโณ ติ โก โส,

อจินฺตยาทิตฺตมุปาคโต โย;

อนญฺญสาธารณภูตมตฺถํ,

อกาสิ กึ โส กิมโวจ พุทฺโธ.

๕. วิสุทฺธขนฺธสนฺตาโน พุทฺโธติ นิยโม กโต,

ขนฺธสนฺตานสุทฺธี ตุ คุโณติ นิยโม กโต.

๖. อกาสิ กิจฺจานิ ทิเนสุ ปญฺจ,

ปสาทยญฺจิทฺธิพเลน เสน;

ชนานเสสํ จริยานุกูลํ,

ญตฺวานโวจานุสยปฺปหานํ.

อนญฺญสาธารณทีปนีคาถา

๗. อพฺภุคฺคตา ยสฺส คุณา อนนฺตา,

ติพุทฺธเขตฺเตกทิวากโรติ;

ชานาติ โส โลกมิมํ ปรญฺจ,

สเจตนญฺเจว อเจตนญฺจ;

สกสฺส สนฺตานคตํ ปเรสํ,

พฺยตีตมปฺปตฺตกมตฺรภูตํ.

๘. อนนฺตสตฺเตสุ จ โลกธาตุสุ,

เอโกว สพฺเพปิ สมา น เตน;

ทิสาสุ ปุพฺพาทิสุ จกฺกวาฬา,

สหสฺสสงฺขายปิ อปฺปเมยฺยา;

เย เตสุ เทวา มนุชา จ พฺรหฺมา,

เอกตฺถ สงฺคมฺม หิ มนฺตยนฺตา.

๙. อนาทิกาลาคตนามรูปินํ,

ยถาสกํ เหตุผลตฺตวุตฺตินํ;

ตพฺภาวภาวิตฺตมสมฺภุณนฺตา,

นานาวิปลฺลาสมนุปวิฏฺฐา.

๑๐. กมฺมปฺปวตฺติญฺจ ผลปฺปวตฺตึ,

เอกตฺตนานตฺตนิรีหธมฺมตํ;

วิญฺญตฺติสนฺตานฆเนน ฉนฺนโต,

สิวญฺชสํ โน ภณิตุํ สมตฺถา.

๑๑. เอโก ว โส สนฺติกโร ปภงฺกโร,

สงฺขาย เญยฺยานิ อเสสิตานิ;

เตสญฺหิ มชฺเฌ ปรมาสมฺภีวทํ,

สิวญฺชสํ ทีปยิตุํ สมตฺโถ.

๑๒. โส โคตโม สกฺยสุโต มุนินฺโท,

สพฺพสฺส โลกสฺส ปทีปภูโต;

อนนฺตสตฺเต ภวพนฺธนมฺหา,

โมเจสิ การุญฺญผลานุเปกฺขี.

อภินีหารทีปนีคาถา

๑๓. วเทถ ตสฺสีธ อนปฺปกํ คุณํ,

น เตน ตุโลฺย ปรโม จ วิชฺชติ;

กึ ตํ คุณํ ตํ สทิเสน ทินฺนํ,

สยํกตํ กินฺนุ อธิจฺจลทฺธํ.

๑๔. นาธิจฺจลทฺธํ น จ ปุพฺพพุทฺธา,

พฺรหฺมาทินํ สมฺมุติยา พหูนํ;

สยํกเตเนว อโนปเมน,

ทานาทินา ลทฺธมิทํ วิปากํ.

๑๕. อิโต จตุนฺนํ อสงฺขิยานํ,

สตํสหสฺสานธิกานมตฺถเก;

กปฺเป อตีตมฺหิ สุเมธตาปโส,

เวหายสํ คจฺฉติ อิทฺธิยา ตทา.

๑๖. ทิปงฺกโร นาม ชิโน สสงฺโฆ,

รมฺมํ ปุรํ ยาติ วิโรจมาโน;

มนุสฺสเทเวหิภิปูชิยนฺโต,

สหสฺสรํสิ วิย ภาณุมา นเภ.

๑๗. ตสฺสญฺชสํ กาตุพหุสฺสหานํ,

พุทฺโธติ สุตฺวา สุมโน ปตีโต;

มมชฺช เทหํ ปนิมสฺส ทตฺวา,

พุทฺโธ อหํ เหสฺสมนาคเตทิโส.

๑๘. ตสฺมิญฺชเส กนฺทรตมฺหิ ปงฺเก,

กตฺวาน เสตุํ สยิ โส สเทหํ;

พุทฺโธ อยํ คจฺฉตุ ปิฏฺฐิยา มมํ,

โพธิสฺสเจ เหสฺสติ เม อนาคเต.

๑๙. อุสฺสีสกํ ยาติ ชิโน หิ ตสฺส,

อชฺฌาสโย สิชฺฌติมสฺสนาคเต;

ญตฺวาน พฺยากาสิ อเสสโต หิ,

พุทฺโธ อยํ เหสฺสตินาคเตสุ.

๒๐. สุตฺวาน ปตฺโต ว มหาภิเสกํ,

ลทฺธํ ว โพธึ สมนุสฺสรนฺโต;

ปูเชตฺวา ยาเต มุนิเทวมานุเส,

อุฏฺฐาย โส สมฺมสิ ปารมี ทส.

๒๑. ทฬฺหํ คเหตฺวา สมตึสปารมี,

สิกฺขตฺตยญฺจสฺส ชินสฺส สนฺติเก;

กาตุํ สมตฺโถ ปิ ภวสฺส ปารํ,

สตฺเตสุ การุญฺญพลา ภวํ คโต.

๒๒. อุปฺปนฺนุปฺปนฺนเก โส ชินวรมตุเล ปูชยิตฺวา อเสสํ พุทฺโธ เอโส หิ โอโส ภวติ นิยมโต พฺยากโต เตหิ เตหิ เตสํ เตสํ ชินานํ อจนมนุปมํ ปูชยิตฺวา สิเรน,

ตํ ตํ ทุกฺขํ สหิตฺวา สกลคุณททํ ปารมี ปูรยิตฺถ.

โพธิสมฺภารทีปนีคาถา

๒๓. โส ทุกฺขขินฺนชนทสฺสนทุกฺขขินฺโน,

การุญฺญเมว ชนตาย อกาสิ นิจฺจํ;

เตสํ หิ โมจนมุปายมิทนฺติ ญตฺวา,

ตาทีปราธมปิ อตฺตนิ โรปยี โส.

๒๔. ทานาทิเนกวรปารมิสาคเรสุ,

โอคาฬฺหตายปิ ปทุฏฺฐชเนน ทินฺนํ;

ทุกฺขํ ตถา อติมหนฺตตรมฺปิ กิญฺจิ,

นาญฺญาสิ สตฺตหิตเมเวอ คเวสยนฺโต.

๒๕. เฉตฺวาน สีสํ หิ สกํ ททนฺโต,

มํสํ ปจิตฺวาน สกํ ททนฺโต;

โส จตฺตคตฺโต ปณิธานกาเล,

ทุฏฺฐสฺส กึ ทุสฺสติ เฉทเนน.

๒๖. เอวํ อนนฺตมปิ ชาติสเตสุ ทุกฺขํ,

ปตฺวาน สตฺตหิตเมว คเวสยนฺโต;

ทีปงฺกเร คหิตสีลสมาธิปญฺญํ,

ปาเลสิ ยาว สกโพธิตเล สุนิฏฺโฐ.

๒๗. ยทาภินีหารมกา สุเมโธ,

ยทา จ มทฺทึ อททา สิวินฺโท;

เอตฺถนฺตเร ชาติสุ กิญฺจิเปกํ,

นิรตฺถกํ โน อคมาสิ ตสฺส.

๒๘. มหาสมุทฺเท ชลพินฺทุโตปิ,

ตทนฺเตฺร ชาติ อนปฺปกา ว;

นิรนฺตรํ ปูริตปารมีนํ,

กถํ ปมาณํ อุปมา กุหึ วา.

๒๙. โย มคฺคปสฺเส มธุรมฺพพีชํ,

ฉายาผลตฺถาย มหาชนานํ;

โรเปสิ ตสฺมึ หิ ขเณว เตน,

ฉายาผเล ปุญฺญมลทฺธมุทฺธํ.

๓๐. ตเถว สํสารปเถ ชนานํ,

หิตาย อตฺตนมภิโรปิตกฺขเณ;

สิทฺธํ ว ปุญฺญูปริ ตสฺส ตสฺมึ,

ธนงฺคชีวํ ปิ หรนฺติ เย เย.

๓๑. โส สาคเร ชลธิกํ รุหิรํ อทาสิ,

ภูมาปราชิย สมํสมทาสิ ทานํ;

เมรุปฺปมาณมธิกญฺจ สโมฬิสีสํ,

เข ตารกาธิกตรํ นยนํ อทาสิ.

คพฺโภกฺกนฺติทีปนีคาถา

๓๒. คมฺภีรปานทานาทิสาคเรสุ หิ ถามสา;

ตรนฺโต มทฺทิทาเนน นิฏฺฐาเปตฺวาน ปารมี.

๓๓. วสนฺโต ตุสีเต กาเย โพธิปริปากมาคมฺม;

อายาจนาย จ เทวานํ มาตุคพฺภมุปาคมิ.

๓๔. สโต จ สมฺปชาโน จ มาตุกุจฺฉิมฺหิ โอกฺกมิ;

ตสฺส โอกฺกนฺติยํ สพฺพา ทสสหสฺสี ปกมฺปิตฺถ.

๓๕. ตโต ปุพฺพนิมิตฺตานิ ทฺวตฺตึสานิ ตทา สิยุํ;

ตุฏฺฐหฏฺฐา ว สา มาตา ปุตฺตํ ปสฺสติ กุจฺฉิยํ.

วิชายนมงฺคลทีปนีคาถา

๓๖. สา ปุณฺณคพฺภา ทสมาสโต ปรํ,

คนฺตฺวาน ผุลฺลํ วรลุมฺพินีวนํ;

ฐิตา คเหตฺวา วรสาลสาขํ,

วิชายิ ตํ ปุตฺตวรํ สุเขน.

๓๗. ตทา สหสฺสีทสโลกธาตุสุ,

เทวา จ นาคา อสุรา จ ยกฺขา;

นานาทิสา มงฺคลจกฺกวาฬํ,

สุมงฺคลํ มงฺคลมาคมึสุ.

๓๘. อเนกสาขญฺจ สหสฺสมณฺฑลํ,

ฉตฺตํ มรู ธารยุมนฺตลิกฺเข;

สุวณฺณทณฺฑา วิปตนฺติ จามรา,

ขชฺชึสุ เภรี จ นทึสุ สงฺขา.