นิคฺคหีตสนฺธิ

๒๗. นิคฺคหีตนฺตฺยธิกาโร. กึ กโต, สํ ชาโต, สํ ฐิโต, ตํ ธนํ, ตํ มิตฺตนฺติห –

วคฺคนฺตํ วา วคฺเค.

วคฺคพฺยญฺชเน ปเร พินฺทุสฺส ตพฺพคฺคนฺโต วา โหติ. กิงฺกโต, สญฺชาโต, สณฺฐิโต, ตนฺธนํ, ตมฺมิตฺตํ.

วาติ กึ. น ตํ กมฺมํ.

วากาเรเนว เล โล จ. ปุลฺลิงฺคํ.

๒๘. วาตฺยธิกาโร. เอวํ อสฺส, เอตํ อโวเจตีห –

มทา สเร.

สเร ปเร พินฺทุโน ม ทา วา โหนฺติ. เอวมสฺส, เอตทโวจ.

วาติ กึ. มํ อชินิ.

๒๙. ตํ เอว, ตํ หีตีห –

เอเหญํ.

เอกาเร, เห จ ปเร พินฺทุโน โญ วา โหติ. ทฺวิตฺเต – ตญฺเญว, ตเมว. ตญฺหิ, ตํ หิ.

๓๐. สํโยโคตีห –

สเย จ.

ยกาเร ปเร เตน สห พินฺทุโน โญ วา โหติ. ทฺวิตฺเต – สญฺโญโค, สํโยโค.

๓๑. จกฺขุ อนิจฺจํ, อว สิโรตีห - อาคโม, กฺวจิเตฺวว.

นิคฺคหีตญฺจ.

สเร, พฺยญฺชเน วา ปเร กฺวจิ พินฺทฺวาคโม โหติ. จกฺขุํอนิจฺจํ, อวํสิโร.

๓๒. วิทูนํ อคฺคํ, ตาสํ อหํตีห –

‘‘กฺวจิ โลปํ’’ติ สเร พินฺทุโลโป, วิทูนคฺคํ. ทีเฆตาสาหํ.

๓๓. พุทฺธานํ สาสนํ, สํ ราโคตีห –

‘‘พฺยญฺชเน เจ’’ติ พินฺทุโลโป, พุทฺธานสาสนํ. ทีเฆสาราโค.

๓๔. พีชํ อิเวตีห –

ปโร วา สโร.

พินฺทุโต ปโร สโร วา ลุปฺยเต, พีชํว.

๓๕. เอวํ อสฺเสตีห –

พฺยญฺชโน จ วิสญฺโญโค.

พินฺทุโต ปเร สเร ลุตฺเต สํโยโค พฺยญฺชโน วินฏฺฐสํโยโค โหตีติ ปุพฺพสโลโป. เอวํส.

นิคฺคหีตสนฺธิ.