๒. สํกิณฺณวคฺค

๗๕๘. เญยฺยํ ลิงฺค มิห กฺวาปิ, ปจฺจยตฺถวเสน จ;

กฺริยา ตุ กิริยํ กมฺมํ,

สนฺติ ตุ สมโถ สโม;

ทโม จ ทมโถ ทนฺติ, วตฺตํ ตุ สุทฺธกมฺมนิ;

อโถ อาสงฺควจนํ, ตีสุ วุตฺตํ ปรายณํ.

๗๕๙. เภโท วิทาโร ผุฏนํ, ตปฺปนํ ตุ จ ปีณนํ;

อกฺโกสน มภิสงฺโค,

ภิกฺขา ตุ ยาจนา’ตฺถนา.

๗๖๐. นินฺนิมิตฺตํ ยทิจฺฉา ถา’, ปุจฺฉนา นนฺทนานิ จ;

สภาชน มโถ ญาโย,

นโย ผาติ ตุ วุทฺธิยํ.

๗๖๑. กิลมโถ กิลมนํ, ปสโว ตุ ปสูติยํ;

อุกฺกํโส ตฺวติสโย ถ,

ชโย จ ชยนํ ชิติ.

๗๖๒. วโส กนฺติ, พฺยโธ เวโธ,

คโห คาโห วโร วุติ;

ปจา ปาโก หโว หุติ [หูภิ (สี. อมรโกส)],

เวโท เวทน มิตฺถิ วา.

๗๖๓. ชีรณํ ชานิ ตาณํ ตุ, รกฺขณํ ปมิติปฺปมา;

สิเลโส สนฺธิ จ ขโย,

ตฺวปจโย รโว รโณ.

๗๖๔. นิคาโท นิคโท มาโท, มโท ปสิติ พนฺธนํ;

อากโร ตฺวิงฺคิตํ อิงฺโค,

อถ’ตฺถาปคโม พฺยโย.

๗๖๕. อนฺตราโย จ ปจฺจูโห,

วิกาโร ตุ วิกตฺย’ปิ;

ปวิสิเลโส วิธุรํ, อุปเวสนมาสนํ.

๗๖๖. อชฺฌาสโย อธิปฺปาโย, อาสโย จาภิสนฺธิ จ;

ภาโว ธิมุตฺติ ฉนฺโท ถ,

โทโส อาทีนโว ภเว.

๗๖๗. อานิสํโส คุโณ จาถ,

มชฺฌํ เวมชฺฌ มุจฺจเต;

มชฺฌนฺหิโก [มชฺฌนฺติโก (ฏี. สี. ปี.)] ตุ มชฺฌโนฺห, เวมตฺตํ ตุ จ นานตา.

๗๖๘. วา ชาคโร ชาคริยํ [ชาคริโย (ฏี.)], ปวาโห ตุ ปวตฺติ จ;

พฺยาโส ปปญฺโจ วิตฺถาโร,

ยาโม ตุ สํยโม ยโม.

๗๖๙. สมฺพาหนํ มทฺทนญฺจ, ปสโร ตุ วิสปฺปนํ;

สนฺถโว ตุ ปริจโย,

เมลโก สงฺค สงฺคมา.

๗๗๐. สนฺนิธิ สนฺนิกฏฺฐมฺหิ, วินาโส ตุ อทสฺสนํ;

ลโว ภิลาโว ลวนํ,

ปตฺถาโว’วสโร สมา.

๗๗๑. โอสานํ ปริโยสานํ, อุกฺกํโส’ติสโย ภเว [อวสานํ สมาปนํ (?)];

สนฺนิเวโส จ สณฺฐานํ, อถา’พฺภนฺตร มนฺตรํ.

๗๗๒. ปาฏิหีรํ ปาฏิเหรํ, ปาฏิหาริย มุจฺจเต;

กิจฺจํ ตุ กรณียญฺจ, สงฺขาโร วาสนา ภเว.

๗๗๓. ปวนํ ปว นิปฺปาวา, ตสโร สุตฺตเวฐนํ;

สงฺกโม ทุคฺคสญฺจาโร, ปกฺกโม ตุ อุปกฺกโม.

๗๗๔. ปาโฐ นิปาโฐ นิปโฐ, วิจโย มคฺคนา ปุเม;

อาลิงฺคนํ ปริสฺสงฺโค, สิเลโส อุปคูหนํ.

๗๗๕. อาโลกนญฺจ นิชฺฌานํ, อิกฺขณํ ทสฺสนํ ปฺยถ;

ปจฺจาเทโส นิรสนํ, ปจฺจกฺขานํ นิรากติ.

๗๗๖. วิปลฺลาโส’ญฺญถาภาโว, พฺยตฺตโย วิปรียโย;

วิปริยาโส’ติกฺกโม, ตฺว’ติปาโต อุปจฺจโย.

อิติ สํกิณฺณวคฺโค.