๕. ปญฺจมวคฺโค

๒๓๕. ‘‘เอตทคฺคํ, ภิกฺขเว, มม สาวิกานํ ภิกฺขุนีนํ รตฺตญฺญูนํ ยทิทํ มหาปชาปติโคตมี’’.

๒๓๖. … มหาปญฺญานํ ยทิทํ เขมา.

๒๓๗. … อิทฺธิมนฺตีนํ ยทิทํ อุปฺปลวณฺณา.

๒๓๘. … วินยธรานํ ยทิทํ ปฏาจารา.

๒๓๙. … ธมฺมกถิกานํ ยทิทํ ธมฺมทินฺนา.

๒๔๐. … ฌายีนํ ยทิทํ นนฺทา.

๒๔๑. … อารทฺธวีริยานํ ยทิทํ โสณา.

๒๔๒. … ทิพฺพจกฺขุกานํ ยทิทํ พกุลา [สกุลา (สี. สฺยา. กํ. ปี.)].

๒๔๓. … ขิปฺปาภิญฺญานํ ยทิทํ ภทฺทา กุณฺฑลเกสา.

๒๔๔. … ปุพฺเพนิวาสํ อนุสฺสรนฺตีนํ ยทิทํ ภทฺทา กาปิลานี.

๒๔๕. … มหาภิญฺญปฺปตฺตานํ ยทิทํ ภทฺทกจฺจานา.

๒๔๖. … ลูขจีวรธรานํ ยทิทํ กิสาโคตมี.

๒๔๗. … สทฺธาธิมุตฺตานํ ยทิทํ สิงฺคาลกมาตาติ [สิคาลมาตาติ (สี. สฺยา. กํ. ปี.)].

วคฺโค ปญฺจโม.