๖. ฉฏฺฐวคฺโค

๒๔๘. ‘‘เอตทคฺคํ, ภิกฺขเว, มม สาวกานํ อุปาสกานํ ปฐมํ สรณํ คจฺฉนฺตานํ ยทิทํ ตปุสฺสภลฺลิกา [ตปสฺสุภลฺลิกา (สี. ปี.)] วาณิชา’’.

๒๔๙. … ทายกานํ ยทิทํ สุทตฺโต คหปติ อนาถปิณฺฑิโก.

๒๕๐. … ธมฺมกถิกานํ ยทิทํ จิตฺโต คหปติ มจฺฉิกาสณฺฑิโก.

๒๕๑. … จตูหิ สงฺคหวตฺถูหิ ปริสํ สงฺคณฺหนฺตานํ ยทิทํ หตฺถโก อาฬวโก.

๒๕๒. … ปณีตทายกานํ ยทิทํ มหานาโม สกฺโก.

๒๕๓. … มนาปทายกานํ ยทิทํ อุคฺโค คหปติ เวสาลิโก.

๒๕๔. … สงฺฆุปฏฺฐากานํ ยทิทํ หตฺถิคามโก อุคฺคโต คหปติ.

๒๕๕. … อเวจฺจปฺปสนฺนานํ ยทิทํ สูรมฺพฏฺโฐ [สูโร อมฺพฏฺโฐ (สี. สฺยา. กํ. ปี.) สุเรพนฺโธ (ก.)].

๒๕๖. … ปุคฺคลปฺปสนฺนานํ ยทิทํ ชีวโก โกมารภจฺโจ.

๒๕๗. … วิสฺสาสกานํ ยทิทํ นกุลปิตา คหปตีติ.

วคฺโค ฉฏฺโฐ.