౧. చోదనాదిపుచ్ఛావిస్సజ్జనా

౩౫౯. చోదనా కిమత్థాయ, సారణా కిస్స కారణా;

సఙ్ఘో కిమత్థాయ, మతికమ్మం పన కిస్స కారణా.

చోదనా సారణత్థాయ, నిగ్గహత్థాయ సారణా;

సఙ్ఘో పరిగ్గహత్థాయ, మతికమ్మం పన పాటియేక్కం.

మా ఖో తురితో అభణి, మా ఖో చణ్డికతో భణి;

మా ఖో పటిఘం జనయి, సచే అనువిజ్జకో తువం.

మా ఖో సహసా అభణి, కథం విగ్గాహికం అనత్థసంహితం;

సుత్తే వినయే అనులోమే, పఞ్ఞత్తే అనులోమికే.

అనుయోగవత్తం నిసామయ, కుసలేన బుద్ధిమతా కతం;

సువుత్తం సిక్ఖాపదానులోమికం, గతిం న నాసేన్తో సమ్పరాయికం;

హితేసీ అనుయుఞ్జస్సు, కాలేనత్థూపసంహితం.

చుదితస్స చ చోదకస్స చ;

సహసా వోహారం మా పధారేసి;

చోదకో ఆహ ఆపన్నోతి;

చుదితకో ఆహ అనాపన్నోతి.

ఉభో అనుక్ఖిపన్తో, పటిఞ్ఞానుసన్ధితేన కారయే;

పటిఞ్ఞా లజ్జీసు కతా, అలజ్జీసు ఏవం న విజ్జతి;

బహుమ్పి అలజ్జీ భాసేయ్య, వత్తానుసన్ధితేన [వుత్తానుసన్ధితేన (సీ. స్యా. క.)] కారయే.

అలజ్జీ కీదిసో హోతి, పటిఞ్ఞా యస్స న రూహతి;

ఏతఞ్చ [ఏవఞ్చ (క.)] తాహం పుచ్ఛామి, కీదిసో వుచ్చతి అలజ్జీ పుగ్గలో.

సఞ్చిచ్చ ఆపత్తిం ఆపజ్జతి, ఆపత్తిం పరిగూహతి;

అగతిగమనఞ్చ గచ్ఛతి, ఏదిసో వుచ్చతి అలజ్జీపుగ్గలో.

సచ్చం అహమ్పి జానామి, ఏదిసో వుచ్చతి అలజ్జీపుగ్గలో;

అఞ్ఞఞ్చ తాహం పుచ్ఛామి, కీదిసో వుచ్చతి లజ్జీపుగ్గలో.

సఞ్చిచ్చ ఆపత్తిం నాపజ్జతి, ఆపత్తిం న పరిగూహతి;

అగతిగమనం న గచ్ఛతి, ఏదిసో వుచ్చతి లజ్జీపుగ్గలో.

సచ్చం అహమ్పి జానామి, ఏదిసో వుచ్చతి లజ్జీపుగ్గలో;

అఞ్ఞఞ్చ తాహం పుచ్ఛామి, కీదిసో వుచ్చతి అధమ్మచోదకో.

అకాలే చోదేతి అభూతేన;

ఫరుసేన అనత్థసంహితేన;

దోసన్తరో చోదేతి నో మేత్తాచిత్తో;

ఏదిసో వుచ్చతి అధమ్మచోదకో.

సచ్చం అహమ్పి జానామి, ఏదిసో వుచ్చతి అధమ్మచోదకో;

అఞ్ఞఞ్చ తాహం పుచ్ఛామి, కీదిసో వుచ్చతి ధమ్మచోదకో.

కాలేన చోదేతి భూతేన, సణ్హేన అత్థసంహితేన;

మేత్తాచిత్తో చోదేతి నో దోసన్తరో;

ఏదిసో వుచ్చతి ధమ్మచోదకో.

సచ్చం అహమ్పి జానామి, ఏదిసో వుచ్చతి ధమ్మచోదకో;

అఞ్ఞఞ్చ తాహం పుచ్ఛామి, కీదిసో వుచ్చతి బాలచోదకో.

పుబ్బాపరం న జానాతి, పుబ్బాపరస్స అకోవిదో;

అనుసన్ధివచనపథం న జానాతి;

అనుసన్ధివచనపథస్స అకోవిదో;

ఏదిసో వుచ్చతి బాలచోదకో.

సచ్చం అహమ్పి జానామి, ఏదిసో వుచ్చతి బాలచోదకో;

అఞ్ఞఞ్చ తాహం పుచ్ఛామి, కీదిసో వుచ్చతి పణ్డితచోదకో.

పుబ్బాపరమ్పి జానాతి, పుబ్బాపరస్స కోవిదో;

అనుసన్ధివచనపథం జానాతి, అనుసన్ధివచనపథస్స కోవిదో;

ఏదిసో వుచ్చతి పణ్డితచోదకో.

సచ్చం అహమ్పి జానామి, ఏదిసో వుచ్చతి పణ్డితచోదకో;

అఞ్ఞఞ్చ తాహం పుచ్ఛామి, చోదనా కిన్తి వుచ్చతి.

సీలవిపత్తియా చోదేతి, అథో ఆచారదిట్ఠియా;

ఆజీవేనపి చోదేతి, చోదనా తేన వుచ్చతీతి.

అపరం గాథాసఙ్గణికం నిట్ఠితం.