౬. ఛక్కవారో

౩౨౬. [దీ. ని. ౩.౩౨౪] ఛ అగారవా. ఛ గారవా. ఛ వినీతవత్థూని. ఛ సామీచియో. ఛ ఆపత్తిసముట్ఠానా. ఛచ్ఛేదనకా ఆపత్తియో. ఛహాకారేహి ఆపత్తిం ఆపజ్జతి. ఛానిసంసా వినయధరే. ఛ పరమాని. ఛారత్తం తిచీవరేన విప్పవసితబ్బం. ఛ చీవరాని. ఛ రజనాని. ఛ ఆపత్తియో కాయతో చ చిత్తతో చ సముట్ఠన్తి న వాచతో. ఛ ఆపత్తియో వాచతో చ చిత్తతో చ సముట్ఠన్తి న కాయతో. ఛ ఆపత్తియో కాయతో చ వాచతో చ చిత్తతో చ సముట్ఠన్తి. ఛ కమ్మాని. ఛ వివాదమూలాని. ఛ అనువాదమూలాని. ఛ సారణీయా ధమ్మా దీఘసో. ఛ విదత్థియో, సుగతవిదత్థియా, తిరియం ఛ విదత్థియో. ఛ నిస్సయపటిప్పస్సద్ధియో ఆచరియమ్హా. ఛ నహానే అనుపఞ్ఞత్తియో – విప్పకతచీవరం ఆదాయ పక్కమతి, విప్పకతచీవరం సమాదాయ పక్కమతి.

[మహావ. ౮౫ ఆదయో] ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – అసేక్ఖేన సీలక్ఖన్ధేన సమన్నాగతో హోతి, అసేక్ఖేన సమాధిక్ఖన్ధేన సమన్నాగతో హోతి, అసేక్ఖేన పఞ్ఞక్ఖన్ధేన సమన్నాగతో హోతి, అసేక్ఖేన విముత్తిక్ఖన్ధేన సమన్నాగతో హోతి, అసేక్ఖేన విముత్తిఞాణదస్సనక్ఖన్ధేన సమన్నాగతో హోతి, దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – అత్తనా అసేక్ఖేన సీలక్ఖన్ధే సమన్నాగతో హోతి, పరం అసేక్ఖే సీలక్ఖన్ధే సమాదపేతా; అత్తనా అసేక్ఖేన సమాధిక్ఖన్ధేన సమన్నాగతో హోతి, పరం అసేక్ఖే సమాధిక్ఖన్ధే సమాదపేతా; అత్తనా అసేక్ఖేన పఞ్ఞక్ఖన్ధేన సమన్నాగతో హోతి, పరం అసేక్ఖే పఞ్ఞక్ఖన్ధే సమాదపేతా; అత్తనా అసేక్ఖేన విముత్తిక్ఖన్ధేన సమన్నాగతో హోతి, పరం అసేక్ఖే విముత్తిక్ఖన్ధే సమాదపేతా; అత్తనా అసేక్ఖేన విముత్తిఞాణదస్సనక్ఖన్ధేన సమన్నాగతో హోతి, పరం అసేక్ఖే విముత్తిఞాణదస్సనక్ఖన్ధే సమాదపేతా; దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – సద్ధో హోతి, హిరిమా హోతి, ఓత్తప్పీ హోతి, ఆరద్ధవీరియో హోతి, ఉపట్ఠితస్సతి హోతి, దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – న అధిసీలే సీలవిపన్నో హోతి, న అజ్ఝాచారే ఆచారవిపన్నో హోతి, న అతిదిట్ఠియా దిట్ఠివిపన్నో హోతి, బహుస్సుతో హోతి, పఞ్ఞవా హోతి, దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – పటిబలో హోతి అన్తేవాసిం వా సద్ధివిహారిం వా గిలానం ఉపట్ఠాతుం వా ఉపట్ఠాపేతుం వా, అనభిరతం వూపకాసేతుం వా వూపకాసాపేతుం వా [అనభిరతిం (క.)], ఉప్పన్నం కుక్కుచ్చం ధమ్మతో వినోదేతుం [వినోదేతుం వా వినోదాపేతుం వా (స్యా.) మహావ. ౮౫], ఆపత్తిం జానాతి, ఆపత్తివుట్ఠానం జానాతి, దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – పటిబలో హోతి అన్తేవాసిం వా సద్ధివిహారిం వా ఆభిసమాచారికాయ సిక్ఖాయ సిక్ఖాపేతుం, ఆదిబ్రహ్మచారియకాయ సిక్ఖాయ వినేతుం, అభిధమ్మే వినేతుం, అభివినయే వినేతుం, ఉప్పన్నం దిట్ఠిగతం ధమ్మతో వివేచేతుం, దసవస్సో వా హోతి అతిరేకదసవస్సో వా.

అపరేహిపి ఛహఙ్గేహి సమన్నాగతేన భిక్ఖునా ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో – ఆపత్తిం జానాతి, అనాపత్తిం జానాతి, లహుకం ఆపత్తిం జానాతి, గరుకం ఆపత్తిం జానాతి, ఉభయాని ఖో పనస్స పాతిమోక్ఖాని విత్థారేన స్వాగతాని హోన్తి సువిభత్తాని సుప్పవత్తీని సువినిచ్ఛితాని సుత్తసో అనుబ్యఞ్జనసో, దసవస్సో వా హోతి అతిరేకదసవస్సో వా.

ఛ అధమ్మికాని పాతిమోక్ఖట్ఠపనాని, ఛ ధమ్మికాని పాతిమోక్ఖట్ఠపనానీతి.

ఛక్కం నిట్ఠితం.

తస్సుద్దానం –

అగారవా గారవా చ, వినీతా సామీచిపి చ;

సముట్ఠానా ఛేదనా చేవ, ఆకారానిసంసేన చ.

పరమాని చ ఛారత్తం, చీవరం రజనాని చ;

కాయతో చిత్తతో చాపి, వాచతో చిత్తతోపి చ.

కాయవాచాచిత్తతో చ, కమ్మవివాదమేవ చ;

అనువాదా దీఘసో చ, తిరియం నిస్సయేన చ.

అనుపఞ్ఞత్తి ఆదాయ, సమాదాయ తథేవ చ;

అసేక్ఖే సమాదపేతా, సద్ధో అధిసీలేన చ;

గిలానాభిసమాచారీ, ఆపత్తాధమ్మధమ్మికాతి.