౫. అధికరణపచ్చయవారో

౨౮౮. వివాదాధికరణపచ్చయా కతి ఆపత్తియో ఆపజ్జతి? వివాదాధికరణపచ్చయా ద్వే ఆపత్తియో ఆపజ్జతి – ఉపసమ్పన్నం ఓమసతి, ఆపత్తి పాచిత్తియస్స; అనుపసమ్పన్నం ఓమసతి, ఆపత్తి దుక్కటస్స – వివాదాధికరణపచ్చయా ఇమా ద్వే ఆపత్తియో ఆపజ్జతి.

తా ఆపత్తియో చతున్నం విపత్తీనం కతి విపత్తియో భజన్తి…పే… సత్తన్నం సమథానం కతిహి సమథేహి సమ్మన్తి? తా ఆపత్తియో చతున్నం విపత్తీనం ఏకం విపత్తిం భజన్తి – ఆచారవిపత్తిం. సత్తన్నం ఆపత్తిక్ఖన్ధానం ద్వీహి ఆపత్తిక్ఖన్ధేహి సఙ్గహితా – సియా పాచిత్తియాపత్తిక్ఖన్ధేన, సియా దుక్కటాపత్తిక్ఖన్ధేన. ఛన్నం ఆపత్తిసముట్ఠానానం తీహి సముట్ఠానేహి సముట్ఠన్తి – సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి. చతున్నం అధికరణానం, ఆపత్తాధికరణం. సత్తన్నం సమథానం తీహి సమథేహి సమ్మన్తి – సియా సమ్ముఖావినయేన చ పటిఞ్ఞాతకరణేన చ, సియా సమ్ముఖావినయేన చ తిణవత్థారకేన చ.

౨౮౯. అనువాదాధికరణపచ్చయా కతి ఆపత్తియో ఆపజ్జతి? అనువాదాధికరణపచ్చయా తిస్సో ఆపత్తియో ఆపజ్జతి. భిక్ఖుం అమూలకేన పారాజికేన ధమ్మేన అనుద్ధంసేతి, ఆపత్తి సఙ్ఘాదిసేసస్స; అమూలకేన సఙ్ఘాదిసేసేన అనుద్ధంసేతి, ఆపత్తి పాచిత్తియస్స; అమూలికాయ ఆచారవిపత్తియా అనుద్ధంసేతి, ఆపత్తి దుక్కటస్స – అనువాదాధికరణపచ్చయా ఇమా తిస్సో ఆపత్తియో ఆపజ్జతి.

తా ఆపత్తియో చతున్నం విపత్తీనం కతి విపత్తియో భజన్తి…పే… సత్తన్నం సమథానం కతిహి సమథేహి సమ్మన్తి? తా ఆపత్తియో చతున్నం విపత్తీనం ద్వే విపత్తియో భజన్తి – సియా సీలవిపత్తిం, సియా ఆచారవిపత్తిం. సత్తన్నం ఆపత్తిక్ఖన్ధానం తీహి ఆపత్తిక్ఖన్ధేహి సఙ్గహితా – సియా సఙ్ఘాదిసేసాపత్తిక్ఖన్ధేన, సియా పాచిత్తియాపత్తిక్ఖన్ధేన, సియా దుక్కటాపత్తిక్ఖన్ధేన. ఛన్నం ఆపత్తిసముట్ఠానానం తీహి సముట్ఠానేహి సముట్ఠన్తి – సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి. చతున్నం అధికరణానం, ఆపత్తాధికరణం. సత్తన్నం సమథానం తీహి సమథేహి సమ్మన్తి – సియా సమ్ముఖావినయేన చ పటిఞ్ఞాతకరణేన చ, సియా సమ్ముఖావినయేన చ తిణవత్థారకేన చ.

౨౯౦. ఆపత్తాధికరణపచ్చయా కతి ఆపత్తియో ఆపజ్జతి? ఆపత్తాధికరణపచ్చయా చతస్సో ఆపత్తియో ఆపజ్జతి. భిక్ఖునీ జానం పారాజికం ధమ్మం పటిచ్ఛాదేతి, ఆపత్తి పారాజికస్స; వేమతికా పటిచ్ఛాదేతి, ఆపత్తి థుల్లచ్చయస్స; భిక్ఖు సఙ్ఘాదిసేసం పటిచ్ఛాదేతి; ఆపత్తి పాచిత్తియస్స; ఆచారవిపత్తిం పటిచ్ఛాదేతి, ఆపత్తి దుక్కటస్స – ఆపత్తాధికరణపచ్చయా ఇమా చతస్సో ఆపత్తియో ఆపజ్జతి.

తా ఆపత్తియో చతున్నం విపత్తీనం కతి విపత్తియో భజన్తి…పే… సత్తన్నం సమథానం కతిహి సమథేహి సమ్మన్తి? తా ఆపత్తియో చతున్నం విపత్తీనం ద్వే విపత్తియో భజన్తి – సియా సీలవిపత్తిం, సియా ఆచారవిపత్తిం. సత్తన్నం ఆపత్తిక్ఖన్ధానం చతూహి ఆపత్తిక్ఖన్ధేహి సఙ్గహితా – సియా పారాజికాపత్తిక్ఖన్ధేన, సియా థుల్లచ్చయాపత్తిక్ఖన్ధేన, సియా పాచిత్తియాపత్తిక్ఖన్ధేన, సియా దుక్కటాపత్తిక్ఖన్ధేన. ఛన్నం ఆపత్తిసముట్ఠానానం ఏకేన సముట్ఠానేన సముట్ఠన్తి – కాయతో చ వాచతో చ చిత్తతో చ సముట్ఠన్తి. చతున్నం అధికరణానం, ఆపత్తాధికరణం. సత్తన్నం సమథానం తీహి సమథేహి సమ్మన్తి – సియా సమ్ముఖావినయేన చ పటిఞ్ఞాతకరణేన చ, సియా సమ్ముఖావినయేన చ తిణవత్థారకేన చ.

౨౯౧. కిచ్చాధికరణపచ్చయా కతి ఆపత్తియో ఆపజ్జతి? కిచ్చాధికరణపచ్చయా పఞ్చ ఆపత్తియో ఆపజ్జతి. ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జతి, ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి పారాజికస్స. భేదకానువత్తకా భిక్ఖూ యావతతియం సమనుభాసనాయ న పటినిస్సజ్జన్తి, ఆపత్తి సఙ్ఘాదిసేసస్స; పాపికాయ దిట్ఠియా యావతతియం సమనుభాసనాయ న పటినిస్సజ్జతి, ఆపత్తి పాచిత్తియస్స – కిచ్చాధికరణపచ్చయా ఇమా పఞ్చ ఆపత్తియో ఆపజ్జతి.

తా ఆపత్తియో చతున్నం విపత్తీనం కతి విపత్తియో భజన్తి…పే… సత్తన్నం సమథానం కతిహి సమథేహి సమ్మన్తి? తా ఆపత్తియో చతున్నం విపత్తీనం ద్వే విపత్తియో భజన్తి – సియా సీలవిపత్తిం, సియా ఆచారవిపత్తిం. సత్తన్నం ఆపత్తిక్ఖన్ధానం పఞ్చహి ఆపత్తిక్ఖన్ధేహి సఙ్గహితా – సియా పారాజికాపత్తిక్ఖన్ధేన, సియా సఙ్ఘాదిసేసాపత్తిక్ఖన్ధేన, సియా థుల్లచ్చయాపత్తిక్ఖన్ధేన, సియా పాచిత్తియాపత్తిక్ఖన్ధేన, సియా దుక్కటాపత్తిక్ఖన్ధేన. ఛన్నం ఆపత్తిసముట్ఠానానం ఏకేన సముట్ఠానేన సముట్ఠన్తి – కాయతో చ వాచతో చ చిత్తతో చ సముట్ఠన్తి. చతున్నం అధికరణానం, ఆపత్తాధికరణం. సత్తన్నం సమథానం తీహి సమథేహి సమ్మన్తి – సియా సమ్ముఖావినయేన చ పటిఞ్ఞాతకరణేన చ, సియా సమ్ముఖావినయేన చ తిణవత్థారకేన చ.

ఠపేత్వా సత్త ఆపత్తియో సత్త ఆపత్తిక్ఖన్ధే, అవసేసా ఆపత్తియో చతున్నం విపత్తీనం కతి విపత్తియో భజన్తి? సత్తన్నం ఆపత్తిక్ఖన్ధానం కతిహి ఆపత్తిక్ఖన్ధేహి సఙ్గహితా? ఛన్నం ఆపత్తిసముట్ఠానానం కతిహి సముట్ఠానేహి సముట్ఠన్తి? చతున్నం అధికరణానం కతమం అధికరణం? సత్తన్నం సమథానం కతిహి సమథేహి సమ్మన్తి? ఠపేత్వా సత్త ఆపత్తియో సత్త ఆపత్తిక్ఖన్ధే అవసేసా ఆపత్తియో చతున్నం విపత్తీనం న కతమం విపత్తిం భజన్తి? సత్తన్నం ఆపత్తిక్ఖన్ధానం న కతమేన ఆపత్తిక్ఖన్ధేన సఙ్గహితా. ఛన్నం ఆపత్తిసముట్ఠానానం న కతమేన ఆపత్తిసముట్ఠానేన సముట్ఠన్తి. చతున్నం అధికరణానం న కతమం అధికరణం. సత్తన్నం సమథానం న కతమేన సమథేన సమ్మన్తి. తం కిస్స హేతు? ఠపేత్వా సత్త ఆపత్తియో సత్త ఆపత్తిక్ఖన్ధే, నత్థఞ్ఞా ఆపత్తియోతి.

అధికరణపచ్చయవారో నిట్ఠితో పఞ్చమో.

అన్తరపేయ్యాలం [అనన్తరపేయ్యాలం (సీ. స్యా.)] నిట్ఠితం.

తస్సుద్దానం –

కతిపుచ్ఛా సముట్ఠానా, కతాపత్తి తథేవ చ;

సముట్ఠానా విపత్తి చ, తథాధికరణేన చాతి.