౩. ఆపత్తిసముట్ఠానగాథా

౨౮౩. సముట్ఠానా కాయికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా కాయికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా పఞ్చ;

ఏతం తే అక్ఖామి విభఙ్గకోవిద.

సముట్ఠానా వాచసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా వాచసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా చతస్సో;

ఏతం తే అక్ఖామి విభఙ్గకోవిద.

సముట్ఠానా కాయికా వాచసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా కాయికా వాచసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా పఞ్చ;

ఏతం తే అక్ఖామి విభఙ్గకోవిద.

సముట్ఠానా కాయికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా కాయికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా ఛ;

ఏతం తే అక్ఖామి విభఙ్గకోవిద.

సముట్ఠానా వాచసికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా వాచసికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా ఛ;

ఏతం తే అక్ఖామి విభఙ్గకోవిద.

సముట్ఠానా కాయికా వాచసికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా కతి;

పుచ్ఛామి తం బ్రూహి విభఙ్గకోవిద.

సముట్ఠానా కాయికా వాచసికా మానసికా అనన్తదస్సినా;

అక్ఖాతా లోకహితేన వివేకదస్సినా;

ఆపత్తియో తేన సముట్ఠితా ఛ;

ఏతం తే అక్ఖామి విభఙ్గకోవిదాతి.

ఆపత్తిసముట్ఠానగాథా నిట్ఠితా తతియా.