౪. సమనుభాసనాసముట్ఠానం

౨౬౧. భేదానువత్తదుబ్బచ, దూసదుట్ఠుల్లదిట్ఠి చ;

ఛన్దం ఉజ్జగ్ఘికా ద్వే చ, ద్వే చ సద్దా న బ్యాహరే.

ఛమా నీచాసనే ఠానం, పచ్ఛతో ఉప్పథేన చ;

వజ్జానువత్తిగహణా, ఓసారే పచ్చాచిక్ఖనా.

కిస్మిం సంసట్ఠా ద్వే వధి, విసిబ్బే దుక్ఖితాయ చ;

పున సంసట్ఠా న వూపసమే, ఆరామఞ్చ పవారణా.

అన్వద్ధం [అన్వద్ధమాసం (సీ. స్యా.)] సహ జీవినిం, ద్వే చీవరం అనుబన్ధనా;

సత్తతింస ఇమే ధమ్మా, కాయవాచాయ చిత్తతో.

సబ్బే ఏకసముట్ఠానా, సమనుభాసనా యథా.

సమనుభాసనాసముట్ఠానం నిట్ఠితం.