౩. పాచిత్తియాదిపఞ్హా

౪౮౧. అధిట్ఠితం రజనాయ రత్తం;

కప్పకతమ్పి సన్తం;

పరిభుఞ్జన్తస్స ఆపత్తి;

పఞ్హా మేసా కుసలేహి చిన్తితా.

అత్థఙ్గతే సూరియే భిక్ఖు మంసాని ఖాదతి;

న ఉమ్మత్తకో న చ పన ఖిత్తచిత్తో;

న చాపి సో వేదనాట్టో భవేయ్య;

న చస్స హోతి ఆపత్తి;

సో చ ధమ్మో సుగతేన దేసితో;

పఞ్హా మేసా కుసలేహి చిన్తితా.

న రత్తచిత్తో న చ పన థేయ్యచిత్తో;

న చాపి సో పరం మరణాయ చేతయి;

సలాకం దేన్తస్స హోతి ఛేజ్జం;

పటిగ్గణ్హన్తస్స థుల్లచ్చయం;

పఞ్హా మేసా కుసలేహి చిన్తితా.

న చాపి ఆరఞ్ఞకం సాసఙ్కసమ్మతం;

న చాపి సఙ్ఘేన సమ్ముతి దిన్నా;

న చస్స కథినం అత్థతం తత్థేవ;

చీవరం నిక్ఖిపిత్వా గచ్ఛేయ్య అడ్ఢయోజనం;

తత్థేవ అరుణం ఉగ్గచ్ఛన్తస్స అనాపత్తి;

పఞ్హా మేసా కుసలేహి చిన్తితా.

కాయికాని న వాచసికాని;

సబ్బాని నానావత్థుకాని;

అపుబ్బం అచరిమం ఆపజ్జేయ్య ఏకతో;

పఞ్హా మేసా కుసలేహి చిన్తితా.

వాచసికాని న కాయికాని;

సబ్బాని నానావత్థుకాని;

అపుబ్బం అచరిమం ఆపజ్జేయ్య ఏకతో;

పఞ్హా మేసా కుసలేహి చిన్తితా.

తిస్సిత్థియో మేథునం తం న సేవే;

తయో పురిసే తయో అనరియపణ్డకే;

న చాచరే మేథునం బ్యఞ్జనస్మిం;

ఛేజ్జం సియా మేథునధమ్మపచ్చయా;

పఞ్హా మేసా కుసలేహి చిన్తితా.

మాతరం చీవరం యాచే, నో చ సఙ్ఘే [నో సంఘస్స (క.), నో చ సంఘస్స (స్యా.), నో చే సంఘస్స (సీ.)] పరిణతం;

కేనస్స హోతి ఆపత్తి, అనాపత్తి చ ఞాతకే;

పఞ్హా మేసా కుసలేహి చిన్తితా.

కుద్ధో ఆరాధకో హోతి, కుద్ధో హోతి గరహియో;

అథ కో నామ సో ధమ్మో, యేన కుద్ధో పసంసియో;

పఞ్హా మేసా కుసలేహి చిన్తితా.

తుట్ఠో ఆరాధకో హోతి, తుట్ఠో హోతి గరహియో;

అథ కో నామ సో ధమ్మో, యేన తుట్ఠో గరహియో;

పఞ్హా మేసా కుసలేహి చిన్తితా.

సఙ్ఘాదిసేసం థుల్లచ్చయం;

పాచిత్తియం పాటిదేసనీయం;

దుక్కటం ఆపజ్జేయ్య ఏకతో;

పఞ్హా మేసా కుసలేహి చిన్తితా.

ఉభో పరిపుణ్ణవీసతివస్సా;

ఉభిన్నం ఏకుపజ్ఝాయో;

ఏకాచరియో ఏకా కమ్మవాచా;

ఏకో ఉపసమ్పన్నో ఏకో అనుపసమ్పన్నో;

పఞ్హా మేసా కుసలేహి చిన్తితా.

అకప్పకతం నాపి రజనాయ రత్తం;

తేన నివత్థో యేన కామం వజేయ్య;

న చస్స హోతి ఆపత్తి;

సో చ ధమ్మో సుగతేన దేసితో;

పఞ్హా మేసా కుసలేహి చిన్తితా.

న దేతి న పటిగ్గణ్హాతి, పటిగ్గహో తేన న విజ్జతి;

ఆపజ్జతి గరుకం న లహుకం, తఞ్చ పరిభోగపచ్చయా;

పఞ్హా మేసా కుసలేహి చిన్తితా.

న దేతి న పటిగ్గణ్హాతి, పటిగ్గహో తేన న విజ్జతి;

ఆపజ్జతి లహుకం న గరుకం, తఞ్చ పరిభోగపచ్చయా;

పఞ్హా మేసా కుసలేహి చిన్తితా.

ఆపజ్జతి గరుకం సావసేసం;

ఛాదేతి అనాదరియం పటిచ్చ;

న భిక్ఖునీ నో చ ఫుసేయ్య వజ్జం;

పఞ్హా మేసా కుసలేహి చిన్తితా.

సేదమోచనగాథా నిట్ఠితా.