సేదమోచనగాథా

౧. అవిప్పవాసపఞ్హా

౪౭౯. అసంవాసో భిక్ఖూహి చ భిక్ఖునీహి చ;

సమ్భోగో ఏకచ్చో తహిం న లబ్భతి;

అవిప్పవాసేన అనాపత్తి;

పఞ్హా మేసా కుసలేహి చిన్తితా.

అవిస్సజ్జియం అవేభఙ్గియం;

పఞ్చ వుత్తా మహేసినా;

విస్సజ్జన్తస్స పరిభుఞ్జన్తస్స అనాపత్తి;

పఞ్హా మేసా కుసలేహి చిన్తితా.

దస పుగ్గలే న వదామి, ఏకాదస వివజ్జియ;

వుడ్ఢం వన్దన్తస్స ఆపత్తి, పఞ్హా మేసా కుసలేహి చిన్తితా.

న ఉక్ఖిత్తకో న చ పన పారివాసికో;

న సఙ్ఘభిన్నో న చ పన పక్ఖసఙ్కన్తో;

సమానసంవాసకభూమియా ఠితో;

కథం ను సిక్ఖాయ అసాధారణో సియా;

పఞ్హా మేసా కుసలేహి చిన్తితా.

ఉపేతి ధమ్మం పరిపుచ్ఛమానో, కుసలం అత్థూపసఞ్హితం;

న జీవతి న మతో న నిబ్బుతో, తం పుగ్గలం కతమం వదన్తి బుద్ధా;

పఞ్హా మేసా కుసలేహి చిన్తితా.

ఉబ్భక్ఖకే న వదామి, అధో నాభిం వివజ్జియ;

మేథునధమ్మపచ్చయా, కథం పారాజికో సియా;

పఞ్హా మేసా కుసలేహి చిన్తితా.

భిక్ఖు సఞ్ఞాచికాయ కుటిం కరోతి;

అదేసితవత్థుకం పమాణాతిక్కన్తం;

సారమ్భం అపరిక్కమనం అనాపత్తి;

పఞ్హా మేసా కుసలేహి చిన్తితా.

భిక్ఖు సఞ్ఞాచికాయ కుటిం కరోతి;

దేసితవత్థుకం పమాణికం;

అనారమ్భం సపరిక్కమనం ఆపత్తి;

పఞ్హా మేసా కుసలేహి చిన్తితా.

న కాయికం కిఞ్చి పయోగమాచరే;

న చాపి వాచాయ పరే భణేయ్య;

ఆపజ్జేయ్య గరుకం ఛేజ్జవత్థుం;

పఞ్హా మేసా కుసలేహి చిన్తితా.

న కాయికం వాచసికఞ్చ కిఞ్చి;

మనసాపి సన్తో న కరేయ్య పాపం;

సో నాసితో కిన్తి సునాసితో భవే;

పఞ్హా మేసా కుసలేహి చిన్తితా.

అనాలపన్తో మనుజేన కేనచి;

వాచాగిరం నో చ పరే భణేయ్య;

ఆపజ్జేయ్య వాచసికం న కాయికం;

పఞ్హా మేసా కుసలేహి చిన్తితా.

సిక్ఖాపదా బుద్ధవరేన వణ్ణితా;

సఙ్ఘాదిసేసా చతురో భవేయ్యుం;

ఆపజ్జేయ్య ఏకపయోగేన సబ్బే;

పఞ్హా మేసా కుసలేహి చిన్తితా.

ఉభో ఏకతో ఉపసమ్పన్నా;

ఉభిన్నం హత్థతో చీవరం పటిగ్గణ్హేయ్య;

సియా ఆపత్తియో నానా;

పఞ్హా మేసా కుసలేహి చిన్తితా.

చతురో జనా సంవిధాయ;

గరుభణ్డం అవాహరుం;

తయో పారాజికా ఏకో న పారాజికో;

పఞ్హా మేసా కుసలేహి చిన్తితా.

౨. పారాజికాదిపఞ్హా

౪౮౦. ఇత్థీ చ అబ్భన్తరే సియా,

భిక్ఖు చ బహిద్ధా సియా;

ఛిద్దం తస్మిం ఘరే నత్థి;

మేథునధమ్మపచ్చయా;

కథం పారాజికో సియా;

పఞ్హా మేసా కుసలేహి చిన్తితా.

తేలం మధుం ఫాణితఞ్చాపి సప్పిం;

సామం గహేత్వాన నిక్ఖిపేయ్య;

అవీతివత్తే సత్తాహే;

సతి పచ్చయే పరిభుఞ్జన్తస్స ఆపత్తి;

పఞ్హా మేసా కుసలేహి చిన్తితా.

నిస్సగ్గియేన ఆపత్తి;

సుద్ధకేన పాచిత్తియం;

ఆపజ్జన్తస్స ఏకతో;

పఞ్హా మేసా కుసలేహి చిన్తితా.

భిక్ఖూ సియా వీసతియా సమాగతా;

కమ్మం కరేయ్యుం సమగ్గసఞ్ఞినో;

భిక్ఖు సియా ద్వాదసయోజనే ఠితో;

కమ్మఞ్చ తం కుప్పేయ్య వగ్గపచ్చయా;

పఞ్హా మేసా కుసలేహి చిన్తితా.

పదవీతిహారమత్తేన వాచాయ భణితేన చ;

సబ్బాని గరుకాని సప్పటికమ్మాని;

చతుసట్ఠి ఆపత్తియో ఆపజ్జేయ్య ఏకతో;

పఞ్హా మేసా కుసలేహి చిన్తితా.

నివత్థో అన్తరవాసకేన;

దిగుణం సఙ్ఘాటిం పారుతో;

సబ్బాని తాని నిస్సగ్గియాని హోన్తి;

పఞ్హా మేసా కుసలేహి చిన్తితా.

న చాపి ఞత్తి న చ పన కమ్మవాచా;

న చేహి భిక్ఖూతి జినో అవోచ;

సరణగమనమ్పి న తస్స అత్థి;

ఉపసమ్పదా చస్స అకుప్పా;

పఞ్హా మేసా కుసలేహి చిన్తితా.

ఇత్థిం హనే న మాతరం, పురిసఞ్చ న పితరం హనే;

హనేయ్య అనరియం మన్దో, తేన చానన్తరం ఫుసే;

పఞ్హా మేసా కుసలేహి చిన్తితా.

ఇత్థిం హనే చ మాతరం, పురిసఞ్చ పితరం హనే;

మాతరం పితరం హన్త్వా, న తేనానన్తరం ఫుసే;

పఞ్హా మేసా కుసలేహి చిన్తితా.

అచోదయిత్వా అస్సారయిత్వా;

అసమ్ముఖీభూతస్స కరేయ్య కమ్మం;

కతఞ్చ కమ్మం సుకతం భవేయ్య;

కారకో చ సఙ్ఘో అనాపత్తికో సియా;

పఞ్హా మేసా కుసలేహి చిన్తితా.

చోదయిత్వా సారయిత్వా;

సమ్ముఖీభూతస్స కరేయ్య కమ్మం;

కతఞ్చ కమ్మం అకతం భవేయ్య;

కారకో చ సఙ్ఘో సాపత్తికో సియా;

పఞ్హా మేసా కుసలేహి చిన్తితా.

ఛిన్దన్తస్స ఆపత్తి, ఛిన్దన్తస్స అనాపత్తి;

ఛాదేన్తస్స ఆపత్తి, ఛాదేన్తస్స అనాపత్తి;

పఞ్హా మేసా కుసలేహి చిన్తితా.

సచ్చం భణన్తో గరుకం, ముసా చ లహు భాసతో;

ముసా భణన్తో గరుకం, సచ్చఞ్చ లహు భాసతో;

పఞ్హా మేసా కుసలేహి చిన్తితా.

౩. పాచిత్తియాదిపఞ్హా

౪౮౧. అధిట్ఠితం రజనాయ రత్తం;

కప్పకతమ్పి సన్తం;

పరిభుఞ్జన్తస్స ఆపత్తి;

పఞ్హా మేసా కుసలేహి చిన్తితా.

అత్థఙ్గతే సూరియే భిక్ఖు మంసాని ఖాదతి;

న ఉమ్మత్తకో న చ పన ఖిత్తచిత్తో;

న చాపి సో వేదనాట్టో భవేయ్య;

న చస్స హోతి ఆపత్తి;

సో చ ధమ్మో సుగతేన దేసితో;

పఞ్హా మేసా కుసలేహి చిన్తితా.

న రత్తచిత్తో న చ పన థేయ్యచిత్తో;

న చాపి సో పరం మరణాయ చేతయి;

సలాకం దేన్తస్స హోతి ఛేజ్జం;

పటిగ్గణ్హన్తస్స థుల్లచ్చయం;

పఞ్హా మేసా కుసలేహి చిన్తితా.

న చాపి ఆరఞ్ఞకం సాసఙ్కసమ్మతం;

న చాపి సఙ్ఘేన సమ్ముతి దిన్నా;

న చస్స కథినం అత్థతం తత్థేవ;

చీవరం నిక్ఖిపిత్వా గచ్ఛేయ్య అడ్ఢయోజనం;

తత్థేవ అరుణం ఉగ్గచ్ఛన్తస్స అనాపత్తి;

పఞ్హా మేసా కుసలేహి చిన్తితా.

కాయికాని న వాచసికాని;

సబ్బాని నానావత్థుకాని;

అపుబ్బం అచరిమం ఆపజ్జేయ్య ఏకతో;

పఞ్హా మేసా కుసలేహి చిన్తితా.

వాచసికాని న కాయికాని;

సబ్బాని నానావత్థుకాని;

అపుబ్బం అచరిమం ఆపజ్జేయ్య ఏకతో;

పఞ్హా మేసా కుసలేహి చిన్తితా.

తిస్సిత్థియో మేథునం తం న సేవే;

తయో పురిసే తయో అనరియపణ్డకే;

న చాచరే మేథునం బ్యఞ్జనస్మిం;

ఛేజ్జం సియా మేథునధమ్మపచ్చయా;

పఞ్హా మేసా కుసలేహి చిన్తితా.

మాతరం చీవరం యాచే, నో చ సఙ్ఘే [నో సంఘస్స (క.), నో చ సంఘస్స (స్యా.), నో చే సంఘస్స (సీ.)] పరిణతం;

కేనస్స హోతి ఆపత్తి, అనాపత్తి చ ఞాతకే;

పఞ్హా మేసా కుసలేహి చిన్తితా.

కుద్ధో ఆరాధకో హోతి, కుద్ధో హోతి గరహియో;