౧. అవిప్పవాసపఞ్హా

౪౭౯. అసంవాసో భిక్ఖూహి చ భిక్ఖునీహి చ;

సమ్భోగో ఏకచ్చో తహిం న లబ్భతి;

అవిప్పవాసేన అనాపత్తి;

పఞ్హా మేసా కుసలేహి చిన్తితా.

అవిస్సజ్జియం అవేభఙ్గియం;

పఞ్చ వుత్తా మహేసినా;

విస్సజ్జన్తస్స పరిభుఞ్జన్తస్స అనాపత్తి;

పఞ్హా మేసా కుసలేహి చిన్తితా.

దస పుగ్గలే న వదామి, ఏకాదస వివజ్జియ;

వుడ్ఢం వన్దన్తస్స ఆపత్తి, పఞ్హా మేసా కుసలేహి చిన్తితా.

న ఉక్ఖిత్తకో న చ పన పారివాసికో;

న సఙ్ఘభిన్నో న చ పన పక్ఖసఙ్కన్తో;

సమానసంవాసకభూమియా ఠితో;

కథం ను సిక్ఖాయ అసాధారణో సియా;

పఞ్హా మేసా కుసలేహి చిన్తితా.

ఉపేతి ధమ్మం పరిపుచ్ఛమానో, కుసలం అత్థూపసఞ్హితం;

న జీవతి న మతో న నిబ్బుతో, తం పుగ్గలం కతమం వదన్తి బుద్ధా;

పఞ్హా మేసా కుసలేహి చిన్తితా.

ఉబ్భక్ఖకే న వదామి, అధో నాభిం వివజ్జియ;

మేథునధమ్మపచ్చయా, కథం పారాజికో సియా;

పఞ్హా మేసా కుసలేహి చిన్తితా.

భిక్ఖు సఞ్ఞాచికాయ కుటిం కరోతి;

అదేసితవత్థుకం పమాణాతిక్కన్తం;

సారమ్భం అపరిక్కమనం అనాపత్తి;

పఞ్హా మేసా కుసలేహి చిన్తితా.

భిక్ఖు సఞ్ఞాచికాయ కుటిం కరోతి;

దేసితవత్థుకం పమాణికం;

అనారమ్భం సపరిక్కమనం ఆపత్తి;

పఞ్హా మేసా కుసలేహి చిన్తితా.

న కాయికం కిఞ్చి పయోగమాచరే;

న చాపి వాచాయ పరే భణేయ్య;

ఆపజ్జేయ్య గరుకం ఛేజ్జవత్థుం;

పఞ్హా మేసా కుసలేహి చిన్తితా.

న కాయికం వాచసికఞ్చ కిఞ్చి;

మనసాపి సన్తో న కరేయ్య పాపం;

సో నాసితో కిన్తి సునాసితో భవే;

పఞ్హా మేసా కుసలేహి చిన్తితా.

అనాలపన్తో మనుజేన కేనచి;

వాచాగిరం నో చ పరే భణేయ్య;

ఆపజ్జేయ్య వాచసికం న కాయికం;

పఞ్హా మేసా కుసలేహి చిన్తితా.

సిక్ఖాపదా బుద్ధవరేన వణ్ణితా;

సఙ్ఘాదిసేసా చతురో భవేయ్యుం;

ఆపజ్జేయ్య ఏకపయోగేన సబ్బే;

పఞ్హా మేసా కుసలేహి చిన్తితా.

ఉభో ఏకతో ఉపసమ్పన్నా;

ఉభిన్నం హత్థతో చీవరం పటిగ్గణ్హేయ్య;

సియా ఆపత్తియో నానా;

పఞ్హా మేసా కుసలేహి చిన్తితా.

చతురో జనా సంవిధాయ;

గరుభణ్డం అవాహరుం;

తయో పారాజికా ఏకో న పారాజికో;

పఞ్హా మేసా కుసలేహి చిన్తితా.