౪. అవన్దనీయపుగ్గలాది

౪౭౭. కతి పుగ్గలా నాభివాదేతబ్బా, అఞ్జలిసామిచేన చ;

కతినం దుక్కటం హోతి, కతి చీవరధారణా.

దస పుగ్గలా నాభివాదేతబ్బా, అఞ్జలిసామిచేన చ;

దసన్నం దుక్కటం హోతి, దస చీవరధారణా.

కతినం వస్సంవుట్ఠానం, దాతబ్బం ఇధ చీవరం;

కతినం భన్తే దాతబ్బం, కతినఞ్చేవ న దాతబ్బం.

పఞ్చన్నం వస్సంవుట్ఠానం, దాతబ్బం ఇధ చీవరం;

సత్తన్నం సన్తే దాతబ్బం, సోళసన్నం న దాతబ్బం.

కతిసతం రత్తిసతం, ఆపత్తియో ఛాదయిత్వాన;

కతి రత్తియో వసిత్వాన, ముచ్చేయ్య పారివాసికో.

దససతం రత్తిసతం, ఆపత్తియో ఛాదయిత్వాన;

దస రత్తియో వసిత్వాన, ముచ్చేయ్య పారివాసికో.

కతి కమ్మదోసా వుత్తా, బుద్ధేనాదిచ్చబన్ధునా;

చమ్పాయం వినయవత్థుస్మిం, సబ్బేవ అధమ్మికా [సబ్బే అధమ్మికా (సీ. స్యా.)] కతి.

ద్వాదస కమ్మదోసా వుత్తా, బుద్ధేనాదిచ్చబన్ధునా;

చమ్పాయం వినయవత్థుస్మిం, సబ్బేవ అధమ్మికా [సబ్బేవాధమ్మికా (సీ.), సబ్బే అధమ్మికా (స్యా.)] కతా.

కతి కమ్మసమ్పత్తియో వుత్తా, బుద్ధేనాదిచ్చబన్ధునా;

చమ్పాయం వినయవత్థుస్మిం, సబ్బేవ ధమ్మికా కతి.

చతస్సో కమ్మసమ్పత్తియో వుత్తా, బుద్ధేనాదిచ్చబన్ధునా;

చమ్పాయం వినయవత్థుస్మిం, సబ్బేవ ధమ్మికా కతా.

కతి కమ్మాని వుత్తాని, బుద్ధేనాదిచ్చబన్ధునా;

చమ్పాయం వినయవత్థుస్మిం, ధమ్మికా అధమ్మికా కతి.

ఛ కమ్మాని వుత్తాని, బుద్ధేనాదిచ్చబన్ధునా;

చమ్పాయం వినయవత్థుస్మిం, ఏకేత్థ ధమ్మికా కతా;

పఞ్చ అధమ్మికా వుత్తా, బుద్ధేనాదిచ్చబన్ధునా.

కతి కమ్మాని వుత్తాని, బుద్ధేనాదిచ్చబన్ధునా;

చమ్పాయం వినయవత్థుస్మిం, ధమ్మికా అధమ్మికా కతి.

చత్తారి కమ్మాని వుత్తాని, బుద్ధేనాదిచ్చబన్ధునా;

చమ్పాయం వినయవత్థుస్మిం, ఏకేత్థ ధమ్మికా కతా;

తయో అధమ్మికా వుత్తా, బుద్ధేనాదిచ్చబన్ధునా.

యం దేసితంనన్తజినేన తాదినా;

ఆపత్తిక్ఖన్ధాని వివేకదస్సినా;

కతేత్థ సమ్మన్తి వినా సమథేహి;

పుచ్ఛామి తం బ్రూహి విభఙ్గకోవిద.

యం దేసితంనన్తజినేన తాదినా;

ఆపత్తిక్ఖన్ధాని వివేకదస్సినా;

ఏకేత్థ సమ్మతి వినా సమథేహి;

ఏతం తే అక్ఖామి విభఙ్గకోవిద.

కతి ఆపాయికా వుత్తా, బుద్ధేనాదిచ్చబన్ధునా;

వినయం పటిజానన్తస్స, వినయాని [విసయాని (సీ. స్యా. ఏవముపరిపి)] సుణోమ తే.

ఛఊనదియడ్ఢసతా వుత్తా, బుద్ధేనాదిచ్చబన్ధునా;

ఆపాయికా నేరయికా, కప్పట్ఠా సఙ్ఘభేదకా;

వినయం పటిజానన్తస్స, వినయాని సుణోహి మే.

కతి నాపాయికా వుత్తా, బుద్ధేనాదిచ్చబన్ధునా;

వినయం పటిజానన్తస్స, వినయాని సుణోమ తే.

అట్ఠారస నాపాయికా వుత్తా, బుద్ధేనాదిచ్చబన్ధునా;

వినయం పటిజానన్తస్స, వినయాని సుణోహి మే.

కతి అట్ఠకా వుత్తా, బుద్ధేనాదిచ్చబన్ధునా;

వినయం పటిజానన్తస్స, వినయాని సుణోమ తే.

అట్ఠారస అట్ఠకా వుత్తా, బుద్ధేనాదిచ్చబన్ధునా;

వినయం పటిజానన్తస్స, వినయాని సుణోహి మే.