దుతియగాథాసఙ్గణికం
౧. కాయికాదిఆపత్తి
౪౭౪. కతి ఆపత్తియో కాయికా, కతి వాచసికా కతా.
ఛాదేన్తస్స కతి ఆపత్తియో, కతి సంసగ్గపచ్చయా.
ఛాపత్తియో కాయికా, ఛ వాచసికా కతా;
ఛాదేన్తస్స తిస్సో ఆపత్తియో, పఞ్చ సంసగ్గపచ్చయా.
అరుణుగ్గే కతి ఆపత్తియో, కతి యావతతియకా;
కతేత్థ అట్ఠ వత్థుకా, కతిహి సబ్బసఙ్గహో.
అరుణుగ్గే తిస్సో ఆపత్తియో, ద్వే యావతతియకా;
ఏకేత్థ అట్ఠ వత్థుకా, ఏకేన సబ్బసఙ్గహో.
వినయస్స కతి మూలాని, యాని బుద్ధేన పఞ్ఞత్తా;
వినయగరుకా కతి వుత్తా, దుట్ఠుల్లచ్ఛాదనా కతి.
వినయస్స ద్వే మూలాని, యాని బుద్ధేన పఞ్ఞత్తా;
వినయగరుకా ద్వే వుత్తా, ద్వే దుట్ఠుల్లచ్ఛాదనా.
గామన్తరే కతి ఆపత్తియో, కతి నదిపారపచ్చయా;
కతిమంసేసు థుల్లచ్చయం, కతిమంసేసు దుక్కటం.
గామన్తరే చతస్సో ఆపత్తియో, చతస్సో నదిపారపచ్చయా;
ఏకమంసే థుల్లచ్చయం, నవమంసేసు దుక్కటం.
కతి వాచసికా రత్తిం, కతి వాచసికా దివా;
దదమానస్స కతి ఆపత్తియో, పటిగ్గణ్హన్తస్స కిత్తకా.
ద్వే వాచసికా రత్తిం, ద్వే వాచసికా దివా;
దదమానస్స తిస్సో ఆపత్తియో, చత్తారో చ పటిగ్గహే.
౨. దేసనాగామినియాదిఆపత్తి
౪౭౫. కతి దేసనాగామినియో, కతి సప్పటికమ్మా కతా;
కతేత్థ అప్పటికమ్మా వుత్తా, బుద్ధేనాదిచ్చబన్ధునా.
పఞ్చ దేసనాగామినియో, ఛ సప్పటికమ్మా కతా;
ఏకేత్థ అప్పటికమ్మా వుత్తా, బుద్ధేనాదిచ్చబన్ధునా.
వినయగరుకా కతి వుత్తా, కాయవాచసికాని చ;
కతి వికాలే ధఞ్ఞరసో, కతి ఞత్తిచతుత్థేన సమ్ముతి.
వినయగరుకా ద్వే వుత్తా, కాయవాచసికాని చ;
ఏకో వికాలే ధఞ్ఞరసో, ఏకా ఞత్తిచతుత్థేన సమ్ముతి.
పారాజికా కాయికా కతి, కతి సంవాసకభూమియో;
కతినం రత్తిచ్ఛేదో, పఞ్ఞత్తా ద్వఙ్గులా కతి.
పారాజికా కాయికా ద్వే, ద్వే సంవాసకభూమియో;
ద్విన్నం రత్తిచ్ఛేదో, పఞ్ఞత్తా ద్వఙ్గులా దువే.
కతత్తానం వధిత్వాన, కతిహి సఙ్ఘో భిజ్జతి;
కతేత్థ పఠమాపత్తికా, ఞత్తియా కరణా కతి.
ద్వే అత్తానం వధిత్వాన, ద్వీహి సఙ్ఘో భిజ్జతి;
ద్వేత్థ పఠమాపత్తికా, ఞత్తియా కరణా దువే.
పాణాతిపాతే కతి ఆపత్తియో, వాచా పారాజికా కతి;
ఓభాసనా కతి వుత్తా, సఞ్చరిత్తేన వా కతి.
పాణాతిపాతే తిస్సో ఆపత్తియో;
వాచా పారాజికా తయో;
ఓభాసనా తయో వుత్తా;
సఞ్చరిత్తేన వా తయో.
కతి పుగ్గలా న ఉపసమ్పాదేతబ్బా, కతి కమ్మానం సఙ్గహా;
నాసితకా కతి వుత్తా, కతినం ఏకవాచికా.
తయో పుగ్గలా న ఉపసమ్పాదేతబ్బా, తయో కమ్మానం సఙ్గహా;
నాసితకా తయో వుత్తా, తిణ్ణన్నం ఏకవాచికా.
అదిన్నాదానే కతి ఆపత్తియో, కతి మేథునపచ్చయా;
ఛిన్దన్తస్స కతి ఆపత్తియో, కతి ఛడ్డితపచ్చయా.
అదిన్నాదానే తిస్సో ఆపత్తియో, చతస్సో మేథునపచ్చయా;
ఛిన్దన్తస్స తిస్సో ఆపత్తియో, పఞ్చ ఛడ్డితపచ్చయా.
భిక్ఖునోవాదకవగ్గస్మిం, పాచిత్తియేన దుక్కటా;
కతేత్థ నవకా వుత్తా, కతినం చీవరేన చ.
భిక్ఖునోవాదకవగ్గస్మిం, పాచిత్తియేన దుక్కటా కతా;
చతురేత్థ నవకా వుత్తా, ద్విన్నం చీవరేన చ.
భిక్ఖునీనఞ్చ అక్ఖాతా, పాటిదేసనియా కతి;
భుఞ్జన్తామకధఞ్ఞేన, పాచిత్తియేన దుక్కటా కతి.
భిక్ఖునీనఞ్చ అక్ఖాతా, అట్ఠ పాటిదేసనీయా కతా;
భుఞ్జన్తామకధఞ్ఞేన, పాచిత్తియేన దుక్కటా కతా.
గచ్ఛన్తస్స కతి ఆపత్తియో, ఠితస్స చాపి కిత్తకా;
నిసిన్నస్స కతి ఆపత్తియో, నిపన్నస్సాపి కిత్తకా.
గచ్ఛన్తస్స చతస్సో ఆపత్తియో, ఠితస్స చాపి తత్తకా;
నిసిన్నస్స చతస్సో ఆపత్తియో, నిపన్నస్సాపి తత్తకా.
౩. పాచిత్తియం
౪౭౬. కతి పాచిత్తియాని, సబ్బాని నానావత్థుకాని;
అపుబ్బం అచరిమం, ఆపజ్జేయ్య ఏకతో.
పఞ్చ పాచిత్తియాని, సబ్బాని నానావత్థుకాని;
అపుబ్బం అచరిమం, ఆపజ్జేయ్య ఏకతో.
కతి పాచిత్తియాని, సబ్బాని నానావత్థుకాని;
అపుబ్బం అచరిమం, ఆపజ్జేయ్య ఏకతో.
న పాచిత్తియాని, సబ్బాని నానావత్థుకాని;
అపుబ్బం అచరిమం, ఆపజ్జేయ్య ఏకతో.
కతి పాచిత్తియాని, సబ్బాని నానావత్థుకాని;
కతి వాచాయ దేసేయ్య, వుత్తా ఆదిచ్చబన్ధునా.
పఞ్చ పాచిత్తియాని, సబ్బాని నానావత్థుకాని;
ఏకవాచాయ దేసేయ్య, వుత్తా ఆదిచ్చబన్ధునా.
కతి పాచిత్తియాని, సబ్బాని నానావత్థుకాని;
కతి వాచాయ దేసేయ్య, వుత్తా ఆదిచ్చబన్ధునా.
నవ పాచిత్తియాని, సబ్బాని నానావత్థుకాని;
ఏకవాచాయ దేసేయ్య, వుత్తా ఆదిచ్చబన్ధునా.
కతి పాచిత్తియాని, సబ్బాని నానావత్థుకాని;
కిఞ్చ కిత్తేత్వా దేసేయ్య, వుత్తా ఆదిచ్చబన్ధునా.
పఞ్చ పాచిత్తియాని, సబ్బాని నానావత్థుకాని;
వత్థుం కిత్తేత్వా దేసేయ్య, వుత్తా ఆదిచ్చబన్ధునా.
కతి పాచిత్తియాని, సబ్బాని నానావత్థుకాని;
కిఞ్చ కిత్తేత్వా దేసేయ్య, వుత్తా ఆదిచ్చబన్ధునా.
నవ పాచిత్తియాని, సబ్బాని నానావత్థుకాని;
వత్థుం కిత్తేత్వా దేసేయ్య, వుత్తా ఆదిచ్చబన్ధునా.
యావతతియకే కతి ఆపత్తియో, కతి వోహారపచ్చయా;
ఖాదన్తస్స కతి ఆపత్తియో, కతి భోజనపచ్చయా.
యావతతియకే తిస్సో ఆపత్తియో, ఛ వోహారపచ్చయా;
ఖాదన్తస్స తిస్సో ఆపత్తియో, పఞ్చ భోజనపచ్చయా.
సబ్బా యావతతియకా, కతి ఠానాని గచ్ఛన్తి;
కతినఞ్చేవ ఆపత్తి, కతినం అధికరణేన చ.
సబ్బా యావతతియకా, పఞ్చ ఠానాని గచ్ఛన్తి;
పఞ్చన్నఞ్చేవ ఆపత్తి, పఞ్చన్నం అధికరణేన చ.
కతినం వినిచ్ఛయో హోతి, కతినం వూపసమేన చ;
కతినఞ్చేవ అనాపత్తి, కతిహి ఠానేహి సోభతి.
పఞ్చన్నం వినిచ్ఛయో హోతి, పఞ్చన్నం వూపసమేన చ;
పఞ్చన్నఞ్చేవ అనాపత్తి, తీహి ఠానేహి సోభతి.
కతి కాయికా రత్తిం, కతి కాయికా దివా;
నిజ్ఝాయన్తస్స కతి ఆపత్తి, కతి పిణ్డపాతపచ్చయా.
ద్వే కాయికా రత్తిం, ద్వే కాయికా దివా;
నిజ్ఝాయన్తస్స ఏకా ఆపత్తి, ఏకా పిణ్డపాతపచ్చయా.
కతానిసంసే సమ్పస్సం, పరేసం సద్ధాయ దేసయే;
ఉక్ఖిత్తకా కతి వుత్తా, కతి సమ్మావత్తనా.
అట్ఠానిసంసే సమ్పస్సం, పరేసం సద్ధాయ దేసయే;
ఉక్ఖిత్తకా తయో వుత్తా, తేచత్తాలీస సమ్మావత్తనా.
కతి ఠానే ముసావాదో, కతి పరమన్తి వుచ్చతి;
కతి పాటిదేసనీయా, కతినం దేసనాయ చ.
పఞ్చ ఠానే ముసావాదో, చుద్దస పరమన్తి వుచ్చతి;
ద్వాదస పాటిదేసనీయా, చతున్నం దేసనాయ చ.
కతఙ్గికో ముసావాదో, కతి ఉపోసథఙ్గాని;
కతి దూతేయ్యఙ్గాని, కతి తిత్థియవత్తనా.
అట్ఠఙ్గికో ముసావాదో, అట్ఠ ఉపోసథఙ్గాని;
అట్ఠ దూతేయ్యఙ్గాని, అట్ఠ తిత్థియవత్తనా.
కతివాచికా ఉపసమ్పదా, కతినం పచ్చుట్ఠాతబ్బం;
కతినం ఆసనం దాతబ్బం, భిక్ఖునోవాదకో కతిహి.
అట్ఠవాచికా ఉపసమ్పదా, అట్ఠన్నం పచ్చుట్ఠాతబ్బం;
అట్ఠన్నం ఆసనం దాతబ్బం, భిక్ఖునోవాదకో అట్ఠహి.
కతినం ఛేజ్జం హోతి, కతినం థుల్లచ్చయం;
కతినఞ్చేవ అనాపత్తి, సబ్బేసం ఏకవత్థుకా.
ఏకస్స ఛేజ్జం హోతి, చతున్నం థుల్లచ్చయం;
చతున్నఞ్చేవ అనాపత్తి, సబ్బేసం ఏకవత్థుకా.
కతి ఆఘాతవత్థూని, కతిహి సఙ్ఘో భిజ్జతి;
కతేత్థ పఠమాపత్తికా, ఞత్తియా కరణా కతి.
నవ ఆఘాతవత్థూని, నవహి సఙ్ఘో భిజ్జతి;
నవేత్థ పఠమాపత్తికా, ఞత్తియా కరణా నవ.
౪. అవన్దనీయపుగ్గలాది
౪౭౭. కతి పుగ్గలా నాభివాదేతబ్బా, అఞ్జలిసామిచేన చ;
కతినం దుక్కటం హోతి, కతి చీవరధారణా.
దస పుగ్గలా నాభివాదేతబ్బా, అఞ్జలిసామిచేన చ;
దసన్నం దుక్కటం హోతి, దస చీవరధారణా.
కతినం వస్సంవుట్ఠానం, దాతబ్బం ఇధ చీవరం;
కతినం భన్తే దాతబ్బం, కతినఞ్చేవ న దాతబ్బం.
పఞ్చన్నం వస్సంవుట్ఠానం, దాతబ్బం ఇధ చీవరం;
సత్తన్నం సన్తే దాతబ్బం, సోళసన్నం న దాతబ్బం.
కతిసతం రత్తిసతం, ఆపత్తియో ఛాదయిత్వాన;
కతి రత్తియో వసిత్వాన, ముచ్చేయ్య పారివాసికో.
దససతం రత్తిసతం, ఆపత్తియో ఛాదయిత్వాన;
దస రత్తియో వసిత్వాన, ముచ్చేయ్య పారివాసికో.
కతి కమ్మదోసా వుత్తా, బుద్ధేనాదిచ్చబన్ధునా;
చమ్పాయం వినయవత్థుస్మిం, సబ్బేవ అధమ్మికా [సబ్బే అధమ్మికా (సీ. స్యా.)] కతి.
ద్వాదస కమ్మదోసా వుత్తా, బుద్ధేనాదిచ్చబన్ధునా;
చమ్పాయం వినయవత్థుస్మిం, సబ్బేవ అధమ్మికా [సబ్బేవాధమ్మికా (సీ.), సబ్బే అధమ్మికా (స్యా.)] కతా.
కతి కమ్మసమ్పత్తియో వుత్తా, బుద్ధేనాదిచ్చబన్ధునా;
చమ్పాయం వినయవత్థుస్మిం, సబ్బేవ ధమ్మికా కతి.
చతస్సో కమ్మసమ్పత్తియో వుత్తా, బుద్ధేనాదిచ్చబన్ధునా;