అత్థాపత్తిసముట్ఠానం

౧. పారాజికం

౪౭౦. అత్థాపత్తి అచిత్తకో ఆపజ్జతి, సచిత్తకో వుట్ఠాతి. అత్థాపత్తి సచిత్తకో ఆపజ్జతి, అచిత్తకో వుట్ఠాతి. అత్థాపత్తి అచిత్తకో ఆపజ్జతి, అచిత్తకో వుట్ఠాతి. అత్థాపత్తి సచిత్తకో ఆపజ్జతి, సచిత్తకో వుట్ఠాతి. అత్థాపత్తి కుసలచిత్తో ఆపజ్జతి, కుసలచిత్తో వుట్ఠాతి. అత్థాపత్తి కుసలచిత్తో ఆపజ్జతి, అకుసలచిత్తో వుట్ఠాతి. అత్థాపత్తి కుసలచిత్తో ఆపజ్జతి, అబ్యాకతచిత్తో వుట్ఠాతి. అత్థాపత్తి అకుసలచిత్తో ఆపజ్జతి, కుసలచిత్తో వుట్ఠాతి. అత్థాపత్తి అకుసలచిత్తో ఆపజ్జతి, అకుసలచిత్తో వుట్ఠాతి. అత్థాపత్తి అకుసలచిత్తో ఆపజ్జతి, అబ్యాకతచిత్తో వుట్ఠాతి. అత్థాపత్తి అబ్యాకతచిత్తో ఆపజ్జతి, కుసలచిత్తో వుట్ఠాతి. అత్థాపత్తి అబ్యాకతచిత్తో ఆపజ్జతి, అకుసలచిత్తో వుట్ఠాతి. అత్థాపత్తి అబ్యాకతచిత్తో ఆపజ్జతి, అబ్యాకతచిత్తో వుట్ఠాతి.

పఠమం పారాజికం కతిహి సముట్ఠానేహి సముట్ఠాతి? పఠమం పారాజికం ఏకేన సముట్ఠానేన సముట్ఠాతి. కాయతో చ చిత్తతో చ సముట్ఠాతి, న వాచతో.

దుతియం పారాజికం కతిహి సముట్ఠానేహి సముట్ఠాతి? దుతియం పారాజికం తీహి సముట్ఠానేహి సముట్ఠాతి – సియా కాయతో చ చిత్తతో చ సముట్ఠాతి, న వాచతో; సియా వాచతో చ చిత్తతో చ సముట్ఠాతి, న కాయతో; సియా కాయతో చ వాచతో చ చిత్తతో చ సముట్ఠాతి.

తతియం పారాజికం కతిహి సముట్ఠానేహి సముట్ఠాతి? తతియం పారాజికం తీహి సముట్ఠానేహి సముట్ఠాతి – సియా కాయతో చ చిత్తతో చ సముట్ఠాతి, న వాచతో; సియా వాచతో చ చిత్తతో చ సముట్ఠాతి, న కాయతో; సియా కాయతో చ వాచతో చ చిత్తతో చ సముట్ఠాతి.

చతుత్థం పారాజికం కతిహి సముట్ఠానేహి సముట్ఠాతి? చతుత్థం పారాజికం తీహి సముట్ఠానేహి సముట్ఠాతి – సియా కాయతో చ చిత్తతో చ సముట్ఠాతి, న వాచతో; సియా వాచతో చ చిత్తతో చ సముట్ఠాతి, న కాయతో; సియా కాయతో చ వాచతో చ చిత్తతో చ సముట్ఠాతి.

చత్తారో పారాజికా నిట్ఠితా.

౨. సఙ్ఘాదిసేసం

౪౭౧. ఉపక్కమిత్వా అసుచిం మోచేన్తస్స సఙ్ఘాదిసేసో కతిహి సముట్ఠానేహి సముట్ఠాతి? ఉపక్కమిత్వా అసుచిం మోచేన్తస్స సఙ్ఘాదిసేసో ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో.

మాతుగామేన సద్ధిం కాయసంసగ్గం సమాపజ్జన్తస్స సఙ్ఘాదిసేసో కతిహి సముట్ఠానేహి సముట్ఠాతి? మాతుగామేన సద్ధిం కాయసంసగ్గం సమాపజ్జన్తస్స సఙ్ఘాదిసేసో ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో.

మాతుగామం దుట్ఠుల్లాహి వాచాహి ఓభాసేన్తస్స సఙ్ఘాదిసేసో కతిహి సముట్ఠానేహి సముట్ఠాతి? మాతుగామం దుట్ఠుల్లాహి వాచాహి ఓభాసేన్తస్స సఙ్ఘాదిసేసో తీహి సముట్ఠానేహి సముట్ఠాతి – సియా కాయతో చ చిత్తతో చ సముట్ఠాతి న వాచతో; సియా వాచతో చ చిత్తతో చ సముట్ఠాతి, న కాయతో; సియా కాయతో చ వాచతో చ చిత్తతో చ సముట్ఠాతి.

మాతుగామస్స సన్తికే అత్తకామపారిచరియాయ వణ్ణం భాసన్తస్స సఙ్ఘాదిసేసో కతిహి సముట్ఠానేహి సముట్ఠాతి? మాతుగామస్స సన్తికే అత్తకామపారిచరియాయ వణ్ణం భాసన్తస్స సఙ్ఘాదిసేసో తీహి సముట్ఠానేహి సముట్ఠాతి…పే….

సఞ్చరిత్తం సమాపజ్జన్తస్స సఙ్ఘాదిసేసో కతిహి సముట్ఠానేహి సముట్ఠాతి? సఞ్చరిత్తం సమాపజ్జన్తస్స సఙ్ఘాదిసేసో ఛహి సముట్ఠానేహి సముట్ఠాతి – సియా కాయతో సముట్ఠాతి, న వాచతో న చిత్తతో; సియా వాచతో సముట్ఠాతి, న కాయతో న చిత్తతో; సియా కాయతో చ వాచతో చ సముట్ఠాతి, న చిత్తతో; సియా కాయతో చ చిత్తతో చ సముట్ఠాతి, న వాచతో; సియా వాచతో చ చిత్తతో చ సముట్ఠాతి, న కాయతో; సియా కాయతో చ వాచతో చ చిత్తతో చ సముట్ఠాతి.

సఞ్ఞాచికాయ కుటిం కారాపేన్తస్స సఙ్ఘాదిసేసో కతిహి సముట్ఠానేహి సముట్ఠాతి? సఞ్ఞాచికాయ కుటిం కారాపేన్తస్స సఙ్ఘాదిసేసో ఛహి సముట్ఠానేహి సముట్ఠాతి…పే….

మహల్లకం విహారం కారాపేన్తస్స సఙ్ఘాదిసేసో కతిహి సముట్ఠానేహి సముట్ఠాతి? మహల్లకం విహారం కారాపేన్తస్స సఙ్ఘాదిసేసో ఛహి సముట్ఠానేహి సముట్ఠాతి…పే….

భిక్ఖుం అమూలకేన పారాజికేన ధమ్మేన అనుద్ధంసేన్తస్స సఙ్ఘాదిసేసో కతిహి సముట్ఠానేహి సముట్ఠాతి? భిక్ఖుం అమూలకేన పారాజికేన ధమ్మేన అనుద్ధంసేన్తస్స సఙ్ఘాదిసేసో తీహి సముట్ఠానేహి సముట్ఠాతి…పే….

భిక్ఖుం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేన్తస్స సఙ్ఘాదిసేసో కతిహి సముట్ఠానేహి సముట్ఠాతి? భిక్ఖుం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేన్తస్స సఙ్ఘాదిసేసో తీహి సముట్ఠానేహి సముట్ఠాతి…పే….

సఙ్ఘభేదకస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో కతిహి సముట్ఠానేహి సముట్ఠాతి? సఙ్ఘభేదకస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి.

భేదకానువత్తకానం భిక్ఖూనం యావతతియం సమనుభాసనాయ న పటినిస్సజ్జన్తానం సఙ్ఘాదిసేసో కతిహి సముట్ఠానేహి సముట్ఠాతి? భేదకానువత్తకానం భిక్ఖూనం యావతతియం సమనుభాసనాయ న పటినిస్సజ్జన్తానం సఙ్ఘాదిసేసో ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి.

దుబ్బచస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో కతిహి సముట్ఠానేహి సముట్ఠాతి? దుబ్బచస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి.

కులదూసకస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో కతిహి సముట్ఠానేహి సముట్ఠాతి? కులదూసకస్స భిక్ఖునో యావతతియం సమనుభాసనాయ న పటినిస్సజ్జన్తస్స సఙ్ఘాదిసేసో ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి.

తేరస సఙ్ఘాదిసేసా నిట్ఠితా.

౪౭౨. …పే… అనాదరియం పటిచ్చ ఉదకే ఉచ్చారం వా పస్సావం వా ఖేళం వా కరోన్తస్స దుక్కటం కతిహి సముట్ఠానేహి సముట్ఠాతి? అనాదరియం పటిచ్చ ఉదకే ఉచ్చారం వా పస్సావం వా ఖేళం వా కరోన్తస్స దుక్కటం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో.

సేఖియా నిట్ఠితా.

౩. పారాజికాది

౪౭౩. చత్తారో పారాజికా కతిహి సముట్ఠానేహి సముట్ఠన్తి? చత్తారో పారాజికా తీహి సముట్ఠానేహి సముట్ఠన్తి – సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

తేరస సఙ్ఘాదిసేసా కతిహి సముట్ఠానేహి సముట్ఠన్తి? తేరస సఙ్ఘాదిసేసా ఛహి సముట్ఠానేహి సముట్ఠన్తి – సియా కాయతో సముట్ఠన్తి, న వాచతో న చిత్తతో; సియా వాచతో సముట్ఠన్తి, న కాయతో న చిత్తతో; సియా కాయతో చ వాచతో న సముట్ఠన్తి, న చిత్తతో; సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

ద్వే అనియతా కతిహి సముట్ఠానేహి సముట్ఠన్తి? ద్వే అనియతా తీహి సముట్ఠానేహి సముట్ఠన్తి – సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

తింస నిస్సగ్గియా పాచిత్తియా కతిహి సముట్ఠానేహి సముట్ఠన్తి? తింస నిస్సగ్గియా పాచిత్తియా ఛహి సముట్ఠానేహి సముట్ఠన్తి – సియా కాయతో సముట్ఠన్తి, న వాచతో న చిత్తతో; సియా వాచతో సముట్ఠన్తి, న కాయతో న చిత్తతో; సియా కాయతో చ వాచతో చ సముట్ఠన్తి, న చిత్తతో; సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

ద్వేనవుతి పాచిత్తియా కతిహి సముట్ఠానేహి సముట్ఠన్తి? ద్వేనవుతి పాచిత్తియా ఛహి సముట్ఠానేహి సముట్ఠన్తి – సియా కాయతో సముట్ఠన్తి, న వాచతో న చిత్తతో; సియా వాచతో సముట్ఠన్తి, న కాయతో న చిత్తతో; సియా కాయతో చ వాచతో చ సముట్ఠన్తి, న చిత్తతో; సియా కాయతో చ చిత్తతో చ సముట్ఠన్తి న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

చత్తారో పాటిదేసనీయా కతిహి సముట్ఠానేహి సముట్ఠన్తి? చత్తారో పాటిదేసనీయా చతూహి సముట్ఠానేహి సముట్ఠన్తి – సియా కాయతో సముట్ఠన్తి, న వాచతో న చిత్తతో; సియా కాయతో చ వాచతో చ సముట్ఠన్తి, న చిత్తతో; సియా కాయతో చ చిత్తతో చ సముట్ఠన్తి, న వాచతో; సియా కాయతో చ వాచతో చ చిత్తతో చ సముట్ఠన్తి.

పఞ్చసత్తతి సేఖియా కతిహి సముట్ఠానేహి సముట్ఠన్తి? పఞ్చసత్తతి సేఖియా తీహి సముట్ఠానేహి సముట్ఠన్తి – సియా కాయతో చ చిత్తతో చ సముట్ఠన్తి, న వాచతో; సియా వాచతో చ చిత్తతో చ సముట్ఠన్తి, న కాయతో; సియా కాయతో చ వాచతో చ చిత్తతో చ సముట్ఠన్తి.

సముట్ఠానం నిట్ఠితం.