౨. భూతగామవగ్గో

౧౬౬. భూతగామం పాతేన్తో ద్వే ఆపత్తియో ఆపజ్జతి. పాతేతి, పయోగే దుక్కటం; పహారే పహారే ఆపత్తి పాచిత్తియస్స.

అఞ్ఞేనఞ్ఞం పటిచరన్తో ద్వే ఆపత్తియో ఆపజ్జతి. అనారోపితే అఞ్ఞవాదకే అఞ్ఞేనఞ్ఞం పటిచరతి, ఆపత్తి దుక్కటస్స; ఆరోపితే అఞ్ఞవాదకే అఞ్ఞేనఞ్ఞం పటిచరతి, ఆపత్తి పాచిత్తియస్స.

భిక్ఖుం ఉజ్ఝాపేన్తో ద్వే ఆపత్తియో ఆపజ్జతి. ఉజ్ఝాపేతి, పయోగే దుక్కటం; ఉజ్ఝాపితే ఆపత్తి పాచిత్తియస్స.

సఙ్ఘికం మఞ్చం వా పీఠం వా భిసిం వా కోచ్ఛం వా అజ్ఝోకాసే సన్థరిత్వా అనుద్ధరిత్వా అనాపుచ్ఛా పక్కమన్తో ద్వే ఆపత్తియో ఆపజ్జతి. పఠమం పాదం లేడ్డుపాతం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

సఙ్ఘికే విహారే సేయ్యం సన్థరిత్వా అనుద్ధరిత్వా అనాపుచ్ఛా పక్కమన్తో ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

సఙ్ఘికే విహారే జానం పుబ్బుపగతం భిక్ఖుం అనుపఖజ్జ సేయ్యం కప్పేన్తో ద్వే ఆపత్తియో ఆపజ్జతి. నిపజ్జతి, పయోగే దుక్కటం; నిపన్నే ఆపత్తి పాచిత్తియస్స.

భిక్ఖుం కుపితో అనత్తమనో సఙ్ఘికా విహారా నిక్కడ్ఢేన్తో ద్వే ఆపత్తియో ఆపజ్జతి. నిక్కడ్ఢతి, పయోగే దుక్కటం; నిక్కడ్ఢితే ఆపత్తి పాచిత్తియస్స.

సఙ్ఘికే విహారే ఉపరివేహాసకుటియా ఆహచ్చపాదకం మఞ్చం వా పీఠం వా అభినిసీదన్తో ద్వే ఆపత్తియో ఆపజ్జతి. అభినిసీదతి, పయోగే దుక్కటం; అభినిసిన్నే ఆపత్తి పాచిత్తియస్స.

ద్వత్తిపరియాయే అధిట్ఠహిత్వా తతుత్తరి అధిట్ఠహన్తో ద్వే ఆపత్తియో ఆపజ్జతి. అధిట్ఠేతి, పయోగే దుక్కటం; అధిట్ఠితే ఆపత్తి పాచిత్తియస్స.

జానం సప్పాణకం ఉదకం తిణం వా మత్తికం వా సిఞ్చన్తో ద్వే ఆపత్తియో ఆపజ్జతి. సిఞ్చతి, పయోగే దుక్కటం; సిఞ్చితే ఆపత్తి పాచిత్తియస్స.

భూతగామవగ్గో దుతియో.