౧. కథినవగ్గో

౧౬౨. అతిరేకచీవరం దసాహం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

ఏకరత్తం తిచీవరేన విప్పవసన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

అకాలచీవరం పటిగ్గహేత్వా మాసం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

అఞ్ఞాతికాయ భిక్ఖునియా పురాణచీవరం ధోవాపేన్తో ద్వే ఆపత్తియో ఆపజ్జతి. ధోవాపేతి, పయోగే దుక్కటం; ధోవాపితే నిస్సగ్గియం పాచిత్తియం.

అఞ్ఞాతికాయ భిక్ఖునియా హత్థతో చీవరం పటిగ్గణ్హన్తో ద్వే ఆపత్తియో ఆపజ్జతి. గణ్హాతి, పయోగే దుక్కటం; గహితే నిస్సగ్గియం పాచిత్తియం.

అఞ్ఞాతకం గహపతిం వా గహపతానిం వా చీవరం విఞ్ఞాపేన్తో ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే నిస్సగ్గియం పాచిత్తియం.

అఞ్ఞాతకం గహపతిం వా గహపతానిం వా తతుత్తరి చీవరం విఞ్ఞాపేన్తో ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే నిస్సగ్గియం పాచిత్తియం.

పుబ్బే అప్పవారితో అఞ్ఞాతకం గహపతికం ఉపసఙ్కమిత్వా చీవరే వికప్పం ఆపజ్జన్తో ద్వే ఆపత్తియో ఆపజ్జతి. వికప్పం ఆపజ్జతి, పయోగే దుక్కటం; వికప్పం ఆపన్నే నిస్సగ్గియం పాచిత్తియం.

పుబ్బే అప్పవారితో అఞ్ఞాతకే గహపతికే ఉపసఙ్కమిత్వా చీవరే వికప్పం ఆపజ్జన్తో ద్వే ఆపత్తియో ఆపజ్జతి. వికప్పం ఆపజ్జతి, పయోగే దుక్కటం; వికప్పం ఆపన్నే నిస్సగ్గియం పాచిత్తియం.

అతిరేకతిక్ఖత్తుం చోదనాయ అతిరేకఛక్ఖత్తుం ఠానేన చీవరం అభినిప్ఫాదేన్తో ద్వే ఆపత్తియో ఆపజ్జతి. అభినిప్ఫాదేతి, పయోగే దుక్కటం; అభినిప్ఫాదితే నిస్సగ్గియం పాచిత్తియం.

కథినవగ్గో పఠమో.