౯. రాజవగ్గో

౧౭౩. పుబ్బే అప్పటిసంవిదితో రఞ్ఞో అన్తేపురం పవిసన్తో ద్వే ఆపత్తియో ఆపజ్జతి. పఠమం పాదం ఉమ్మారం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

రతనం ఉగ్గణ్హన్తో ద్వే ఆపత్తియో ఆపజ్జతి. గణ్హాతి, పయోగే దుక్కటం; గహితే ఆపత్తి పాచిత్తియస్స.

సన్తం భిక్ఖుం అనాపుచ్ఛా వికాలే గామం పవిసన్తో ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

అట్ఠిమయం వా దన్తమయం వా విసాణమయం వా సూచిఘరం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

పమాణాతిక్కన్తం మఞ్చం వా పీఠం వా కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

మఞ్చం వా పీఠం వా తూలోనద్ధం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

పమాణాతిక్కన్తం నిసీదనం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

పమాణాతిక్కన్తం కణ్డుప్పటిచ్ఛాదిం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

పమాణాతిక్కన్తం వస్సికసాటికం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స.

చీవరం కారాపేన్తో కతి ఆపత్తియో ఆపజ్జతి? సుగతచీవరప్పమాణం చీవరం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే ఆపత్తి పాచిత్తియస్స – సుగతచీవరప్పమాణం చీవరం కారాపేన్తో ఇమా ద్వే ఆపత్తియో ఆపజ్జతి.

రాజవగ్గో నవమో. ఖుద్దకా నిట్ఠితా.