౬. సురామేరయవగ్గో

౧౭౦. మజ్జం పివన్తో ద్వే ఆపత్తియో ఆపజ్జతి. ‘‘పివిస్సామీ’’తి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

భిక్ఖుం అఙ్గులిపతోదకేన హాసేన్తో ద్వే ఆపత్తియో ఆపజ్జతి. హాసేతి, పయోగే దుక్కటం; హసితే ఆపత్తి పాచిత్తియస్స.

ఉదకే కీళన్తో ద్వే ఆపత్తియో ఆపజ్జతి. హేట్ఠాగోప్ఫకే ఉదకే కీళతి, ఆపత్తి దుక్కటస్స; ఉపరిగోప్ఫకే కీళతి, ఆపత్తి పాచిత్తియస్స.

అనాదరియం కరోన్తో ద్వే ఆపత్తియో ఆపజ్జతి. కరోతి, పయోగే దుక్కటం; కతే ఆపత్తి పాచిత్తియస్స.

భిక్ఖుం భింసాపేన్తో ద్వే ఆపత్తియో ఆపజ్జతి. భింసాపేతి, పయోగే దుక్కటం; భింసాపితే ఆపత్తి పాచిత్తియస్స.

జోతిం సమాదహిత్వా విసిబ్బేన్తో ద్వే ఆపత్తియో ఆపజ్జతి. సమాదహతి, పయోగే దుక్కటం; సమాదహితే ఆపత్తి పాచిత్తియస్స.

ఓరేనద్ధమాసం నహాయన్తో ద్వే ఆపత్తియో ఆపజ్జతి. నహాయతి, పయోగే దుక్కటం; నహానపరియోసానే ఆపత్తి పాచిత్తియస్స.

అనాదియిత్వా తిణ్ణం దుబ్బణ్ణకరణానం అఞ్ఞతరం దుబ్బణ్ణకరణం నవం చీవరం పరిభుఞ్జన్తో ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే ఆపత్తి పాచిత్తియస్స.

భిక్ఖుస్స వా భిక్ఖునియా వా సిక్ఖమానాయ వా సామణేరస్స వా సామణేరియా వా సామం చీవరం వికప్పేత్వా అప్పచ్చుద్ధారణం పరిభుఞ్జన్తో ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే ఆపత్తి పాచిత్తియస్స.

భిక్ఖుస్స పత్తం వా చీవరం వా నిసీదనం వా సూచిఘరం వా కాయబన్ధనం వా అపనిధేన్తో ద్వే ఆపత్తియో ఆపజ్జతి. అపనిధేతి, పయోగే దుక్కటం; అపనిధితే ఆపత్తి పాచిత్తియస్స.

సురామేరయవగ్గో ఛట్ఠో.