౧. లసుణవగ్గో

౨౩౧. లసుణం ఖాదన్తీ ద్వే ఆపత్తియో ఆపజ్జతి. ఖాదిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

సమ్బాధే లోమం సంహరాపేన్తీ ద్వే ఆపత్తియో ఆపజ్జతి. సంహరాపేతి, పయోగే దుక్కటం; సంహరాపితే ఆపత్తి పాచిత్తియస్స.

తలఘాతకం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే ఆపత్తి పాచిత్తియస్స.

జతుమట్ఠకం ఆదియన్తీ ద్వే ఆపత్తియో ఆపజ్జతి. ఆదియతి, పయోగే దుక్కటం, ఆదిన్నే ఆపత్తి పాచిత్తియస్స.

అతిరేకద్వఙ్గులపబ్బపరమం ఉదకసుద్ధికం ఆదియన్తీ ద్వే ఆపత్తియో ఆపజ్జతి. ఆదియతి, పయోగే దుక్కటం; ఆదిన్నే ఆపత్తి పాచిత్తియస్స.

భిక్ఖుస్స భుఞ్జన్తస్స పానీయేన వా విధూపనేన వా ఉపతిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.

ఆమకధఞ్ఞం విఞ్ఞాపేత్వా భుఞ్జన్తీ ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

ఉచ్చారం వా పస్సావం వా సఙ్కారం వా విఘాసం వా తిరోకుట్టే వా తిరోపాకారే వా ఛడ్డేన్తీ ద్వే ఆపత్తియో ఆపజ్జతి. ఛడ్డేతి, పయోగే దుక్కటం; ఛడ్డితే ఆపత్తి పాచిత్తియస్స.

ఉచ్చారం వా పస్సావం వా సఙ్కారం వా విఘాసం వా హరితే ఛడ్డేన్తీ ద్వే ఆపత్తియో ఆపజ్జతి. ఛడ్డేతి, పయోగే దుక్కటం; ఛడ్డితే ఆపత్తి పాచిత్తియస్స.

నచ్చం వా గీతం వా వాదితం వా దస్సనాయ గచ్ఛన్తీ ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితా పస్సతి వా సుణాతి వా, ఆపత్తి పాచిత్తియస్స.

లసుణవగ్గో పఠమో.