౧. పారాజికకణ్డం

౨౨౮. అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ కతి ఆపత్తియో ఆపజ్జతి? అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ తిస్సో ఆపత్తియో ఆపజ్జతి. అధక్ఖకం ఉబ్భజాణుమణ్డలం గహణం సాదియతి, ఆపత్తి పారాజికస్స; ఉబ్భక్ఖకం అధోజాణుమణ్డలం గహణం సాదియతి, ఆపత్తి థుల్లచ్చయస్స; కాయపటిబద్ధం గహణం సాదియతి, ఆపత్తి దుక్కటస్స – అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ ఇమా తిస్సో ఆపత్తియో ఆపజ్జతి.

వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ కతి ఆపత్తియో ఆపజ్జతి? వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ తిస్సో ఆపత్తియో ఆపజ్జతి. జానం పారాజికం ధమ్మం పటిచ్ఛాదేతి, ఆపత్తి పారాజికస్స; వేమతికా పటిచ్ఛాదేతి, ఆపత్తి థుల్లచ్చయస్స; ఆచారవిపత్తిం పటిచ్ఛాదేతి, ఆపత్తి దుక్కటస్స – వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ ఇమా తిస్సో ఆపత్తియో ఆపజ్జతి.

ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ కతి ఆపత్తియో ఆపజ్జతి? ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి పారాజికస్స – ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ ఇమా తిస్సో ఆపత్తియో ఆపజ్జతి.

అట్ఠమం వత్థుం పరిపూరేన్తీ కతి ఆపత్తియో ఆపజ్జతి? అట్ఠమం వత్థుం పరిపూరేన్తీ తిస్సో ఆపత్తియో ఆపజ్జతి. పురిసేన – ‘‘ఇత్థన్నామం ఓకాసం [ఇత్థన్నామం గహనం (సీ.), ఇత్థన్నామం గబ్భం (స్యా.)] ఆగచ్ఛా’’తి వుత్తా గచ్ఛతి, ఆపత్తి దుక్కటస్స; పురిసస్స హత్థపాసం ఓక్కన్తమత్తే ఆపత్తి థుల్లచ్చయస్స; అట్ఠమం వత్థుం పరిపూరేతి, ఆపత్తి పారాజికస్స – అట్ఠమం వత్థుం పరిపూరేన్తీ ఇమా తిస్సో ఆపత్తియో ఆపజ్జతి.

పారాజికా నిట్ఠితా.