౨. ఉజ్జగ్ఘికవగ్గో

౧౫౧. అనాదరియం పటిచ్చ ఉజ్జగ్ఘికాయ అన్తరఘరే గచ్ఛన్తస్స దుక్కటం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ మహాహసితం హసన్తా అన్తరఘరే గచ్ఛింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఉజ్జగ్ఘికాయ అన్తరఘరే నిసీదన్తస్స దుక్కటం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ మహాహసితం హసన్తా అన్తరఘరే నిసీదింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఉచ్చాసద్దం మహాసద్దం కరోన్తేన అన్తరఘరే గచ్ఛన్తస్స దుక్కటం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ ఉచ్చాసద్దం మహాసద్దం కరోన్తా అన్తరఘరే గచ్ఛింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఉచ్చాసద్దం మహాసద్దం కరోన్తేన అన్తరఘరే నిసీదన్తస్స దుక్కటం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ ఉచ్చాసద్దం మహాసద్దం కరోన్తా అన్తరఘరే నిసీదింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ కాయప్పచాలకం అన్తరఘరే గచ్ఛన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ కాయప్పచాలకం అన్తరఘరే నిసీదన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ బాహుప్పచాలకం అన్తరఘరే గచ్ఛన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ బాహుప్పచాలకం అన్తరఘరే నిసీదన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ సీసప్పచాలకం అన్తరఘరే గచ్ఛన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ సీసప్పచాలకం అన్తరఘరే నిసీదన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

ఉజ్జగ్ఘికవగ్గో దుతియో.