౯. దుతియదుట్ఠదోససిక్ఖాపదం

౩౯౧. తేన సమయేన బుద్ధో భగవా రాజగహే విహరతి వేళువనే కలన్దకనివాపే. తేన ఖో పన సమయేన మేత్తియభూమజకా భిక్ఖూ గిజ్ఝకూటా పబ్బతా ఓరోహన్తా అద్దసంసు ఛగలకం [ఛకలకం (స్యా.)] అజికాయ విప్పటిపజ్జన్తం. దిస్వాన ఏవమాహంసు – ‘‘హన్ద మయం, ఆవుసో, ఇమం ఛగలకం దబ్బం మల్లపుత్తం నామ కరోమ. ఇమం అజికం మేత్తియం నామ భిక్ఖునిం కరోమ. ఏవం మయం వోహరిస్సామ. పుబ్బే మయం, ఆవుసో, దబ్బం మల్లపుత్తం సుతేన అవోచుమ్హా. ఇదాని పన అమ్హేహి సామం దిట్ఠో మేత్తియాయ భిక్ఖునియా విప్పటిపజ్జన్తో’’తి. తే తం ఛగలకం దబ్బం మల్లపుత్తం నామ అకంసు. తం అజికం మేత్తియం నామ భిక్ఖునిం అకంసు. తే భిక్ఖూనం ఆరోచేసుం – ‘‘పుబ్బే మయం, ఆవుసో, దబ్బం మల్లపుత్తం సుతేన అవోచుమ్హా. ఇదాని పన అమ్హేహి సామం దిట్ఠో మేత్తియాయ భిక్ఖునియా విప్పటిపజ్జన్తో’’తి. భిక్ఖూ ఏవమాహంసు – ‘‘మావుసో, ఏవం అవచుత్థ. నాయస్మా దబ్బో మల్లపుత్తో ఏవం కరిస్సతీ’’తి.

అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఆయస్మన్తం దబ్బం మల్లపుత్తం పటిపుచ్ఛి – ‘‘సరసి త్వం, దబ్బ, ఏవరూపం కత్తా యథయిమే భిక్ఖూ ఆహంసూ’’తి? ‘‘యథా మం, భన్తే, భగవా జానాతీ’’తి. దుతియమ్పి ఖో భగవా…పే… తతియమ్పి ఖో భగవా ఆయస్మన్తం దబ్బం మల్లపుత్తం ఏతదవోచ – ‘‘సరసి త్వం, దబ్బ, ఏవరూపం కత్తా యథయిమే భిక్ఖూ ఆహంసూ’’తి? ‘‘యథా మం, భన్తే, భగవా జానాతీ’’తి. ‘‘న ఖో, దబ్బ, దబ్బా ఏవం నిబ్బేఠేన్తి. సచే తయా కతం కతన్తి వదేహి, సచే తయా అకతం అకతన్తి వదేహీ’’తి. ‘‘యతో అహం, భన్తే, జాతో నాభిజానామి సుపినన్తేనపి మేథునధమ్మం పటిసేవితా, పగేవ జాగరో’’తి! అథ ఖో భగవా భిక్ఖూ ఆమన్తేసి – ‘‘తేన హి, భిక్ఖువే, ఇమే భిక్ఖూ అనుయుఞ్జథా’’తి. ఇదం వత్వా భగవా ఉట్ఠాయాసనా విహారం పావిసి.

అథ ఖో తే భిక్ఖూ మేత్తియభూమజకే భిక్ఖూ అనుయుఞ్జింసు. తే భిక్ఖూహి అనుయుఞ్జీయమానా భిక్ఖూనం ఏతమత్థం ఆరోచేసుం – ‘‘కిం పన తుమ్హే, ఆవుసో, ఆయస్మన్తం దబ్బం మల్లపుత్తం అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేథా’’తి? ‘‘ఏవమావుసో’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ మేత్తియభూమజకా భిక్ఖూ ఆయస్మన్తం దబ్బం మల్లపుత్తం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేస్సన్తీ’’తి! అథ ఖో తే భిక్ఖూ మేత్తియభూమజకే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, దబ్బం మల్లపుత్తం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేథా’’తి? ‘‘సచ్చం, భగవా’’తి. విగరహి బుద్ధో భగవా…పే… ‘‘కథఞ్హి నామ తుమ్హే, మోఘపురిసా, దబ్బం మల్లపుత్తం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౩౯౨. ‘‘యో పన భిక్ఖు భిక్ఖుం దుట్ఠో దోసో అప్పతీతో అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేయ్య – ‘అప్పేవ నామ నం ఇమమ్హా బ్రహ్మచరియా చావేయ్య’న్తి. తతో అపరేన సమయేన సమనుగ్గాహీయమానో వా అసమనుగ్గాహీయమానో వా అఞ్ఞభాగియఞ్చేవ తం అధికరణం హోతి కోచిదేసో లేసమత్తో ఉపాదిన్నో, భిక్ఖు చ దోసం పతిట్ఠాతి, సఙ్ఘాదిసేసో’’తి.

౩౯౩. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

భిక్ఖున్తి అఞ్ఞం భిక్ఖుం.

దుట్ఠో దోసోతి కుపితో అనత్తమనో అనభిరద్ధో ఆహతచిత్తో ఖిలజాతో.

అప్పతీతోతి తేన చ కోపేన, తేన చ దోసేన, తాయ చ అనత్తమనతాయ, తాయ చ అనభిరద్ధియా అప్పతీతో హోతి.

అఞ్ఞభాగియస్స అధికరణస్సాతి ఆపత్తఞ్ఞభాగియం వా హోతి అధికరణఞ్ఞభాగియం వా. కథం అధికరణం అధికరణస్స అఞ్ఞభాగియం? వివాదాధికరణం అనువాదాధికరణస్స ఆపత్తాధికరణస్స కిచ్చాధికరణస్స అఞ్ఞభాగియం. అనువాదాధికరణం ఆపత్తాధికరణస్స కిచ్చాధికరణస్స వివాదాధికరణస్స అఞ్ఞభాగియం. ఆపత్తాధికరణం కిచ్చాధికరణస్స వివాదాధికరణస్స అనువాదాధికరణస్స అఞ్ఞభాగియం. కిచ్చాధికరణం వివాదాధికరణస్స అనువాదాధికరణస్స ఆపత్తాధికరణస్స అఞ్ఞభాగియం. ఏవం అధికరణం అధికరణస్స అఞ్ఞభాగియం.

కథం అధికరణం అధికరణస్స తబ్భాగియం? వివాదాధికరణం వివాదాధికరణస్స తబ్భాగియం. అనువాదాధికరణం అనువాదాధికరణస్స తబ్భాగియం. ఆపత్తాధికరణం ఆపత్తాధికరణస్స సియా తబ్భాగియం సియా అఞ్ఞభాగియం.

కథం ఆపత్తాధికరణం ఆపత్తాధికరణస్స అఞ్ఞభాగియం? మేథునధమ్మపారాజికాపత్తి అదిన్నాదానపారాజికాపత్తియా మనుస్సవిగ్గహపారాజికాపత్తియా ఉత్తరిమనుస్సధమ్మపారాజికాపత్తియా అఞ్ఞభాగియా. అదిన్నాదానపారాజికాపత్తి మనుస్సవిగ్గహపారాజికాపత్తియా ఉత్తరిమనుస్సధమ్మపారాజికాపత్తియా మేథునధమ్మపారాజికాపత్తియా అఞ్ఞభాగియా. మనుస్సవిగ్గహపారాజికాపత్తి ఉత్తరిమనుస్సధమ్మపారాజికాపత్తియా మేథునధమ్మపారాజికాపత్తియా అదిన్నాదానపారాజికాపత్తియా అఞ్ఞభాగియా. ఉత్తరిమనుస్సధమ్మపారాజికాపత్తి మేథునధమ్మపారాజికాపత్తియా అదిన్నాదానపారాజికాపత్తియా మనుస్సవిగ్గహపారాజికాపత్తియా అఞ్ఞభాగియా. ఏవం ఆపత్తాధికరణం ఆపత్తాధికరణస్స అఞ్ఞభాగియం.

కథం ఆపత్తాధికరణం ఆపత్తాధికరణస్స తబ్భాగియం? మేథునధమ్మపారాజికాపత్తి మేథునధమ్మపారాజికాపత్తియా తబ్భాగియా. అదిన్నాదానపారాజికాపత్తి అదిన్నాదానపారాజికాపత్తియా తబ్భాగియా. మనుస్సవిగ్గహపారాజికాపత్తి మనుస్సవిగ్గహపారాజికాపత్తియా తబ్భాగియా. ఉత్తరిమనుస్సధమ్మపారాజికాపత్తి ఉత్తరిమనుస్సధమ్మపారాజికాపత్తియా తబ్భాగియా. ఏవం ఆపత్తాధికరణం ఆపత్తాధికరణస్స తబ్భాగియం.

కిచ్చాధికరణం కిచ్చాధికరణస్స తబ్భాగియం. ఏవం అధికరణం అధికరణస్స తబ్భాగియం.

౩౯౪. కిఞ్చి దేసం లేసమత్తం ఉపాదాయాతి లేసో నామ దస లేసా – జాతిలేసో, నామలేసో, గోత్తలేసో, లిఙ్గలేసో, ఆపత్తిలేసో, పత్తలేసో, చీవరలేసో, ఉపజ్ఝాయలేసో, ఆచరియలేసో, సేనాసనలేసో.

౩౯౫. జాతిలేసో నామ ఖత్తియో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం ఖత్తియం పస్సిత్వా చోదేతి – ‘‘ఖత్తియో మయా దిట్ఠో [ఏత్థ ‘‘పారాజికం ధమ్మం అజ్ఝాపజ్జన్తో’’తి పాఠో ఊనో మఞ్ఞే, అట్ఠకథాయం హి ‘‘ఖత్తియో మయా దిట్ఠో పారాజికం ధమ్మం అజ్ఝాపజ్జన్తో’’తి దిస్సతి]. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి, నత్థి తయా సద్ధిం ఉపోసథో వా పవారణా వా సఙ్ఘకమ్మం వా’’తి, ఆపత్తి వాచాయ, వాచాయ సఙ్ఘాదిసేసస్స.

బ్రాహ్మణో దిట్ఠో హోతి…పే… వేస్సో దిట్ఠో హోతి…పే… సుద్దో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం సుద్దం పస్సిత్వా చోదేతి – ‘‘సుద్దో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౩౯౬. నామలేసో నామ బుద్ధరక్ఖితో దిట్ఠో హోతి…పే… ధమ్మరక్ఖితో దిట్ఠో హోతి…పే… సఙ్ఘరక్ఖితో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం సఙ్ఘరక్ఖితం పస్సిత్వా చోదేతి – ‘‘సఙ్ఘరక్ఖితో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౩౯౭. గోత్తలేసో నామ గోతమో దిట్ఠో హోతి…పే… మోగ్గల్లానో దిట్ఠో హోతి…పే… కచ్చాయనో దిట్ఠో హోతి…పే… వాసిట్ఠో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం వాసిట్ఠం పస్సిత్వా చోదేతి – ‘‘వాసిట్ఠో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౩౯౮. లిఙ్గలేసో నామ దీఘో దిట్ఠో హోతి…పే… రస్సో దిట్ఠో హోతి…పే… కణ్హో దిట్ఠో హోతి…పే… ఓదాతో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం ఓదాతం పస్సిత్వా చోదేతి – ‘‘ఓదాతో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౩౯౯. ఆపత్తిలేసో నామ లహుకం ఆపత్తిం ఆపజ్జన్తో దిట్ఠో హోతి. తఞ్చే పారాజికేన చోదేతి – ‘‘అస్సమణోసి, అసక్యపుత్తియోసి…పే… ఆపత్తి వాచాయ, వాచాయ సఙ్ఘాదిసేసస్స.

౪౦౦. పత్తలేసో నామ లోహపత్తధరో దిట్ఠో హోతి…పే… సాటకపత్తధరో దిట్ఠో హోతి…పే… సుమ్భకపత్తధరో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం సుమ్భకపత్తధరం పస్సిత్వా చోదేతి – ‘‘సుమ్భకపత్తధరో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౪౦౧. చీవరలేసో నామ పంసుకూలికో దిట్ఠో హోతి…పే… గహపతిచీవరధరో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం గహపతిచీవరధరం పస్సిత్వా చోదేతి – ‘‘గహపతిచీవరధరో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౪౦౨. ఉపజ్ఝాయలేసో నామ ఇత్థన్నామస్స సద్ధివిహారికో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం ఇత్థన్నామస్స సద్ధివిహారికం పస్సిత్వా చోదేతి – ‘‘ఇత్థన్నామస్స సద్ధివిహారికో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౪౦౩. ఆచరియలేసో నామ ఇత్థన్నామస్స అన్తేవాసికో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం ఇత్థన్నామస్స అన్తేవాసికం పస్సిత్వా చోదేతి – ‘‘ఇత్థన్నామస్స అన్తేవాసికో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి’’…పే… ఆపత్తి వాచాయ, వాచాయ సఙ్ఘాదిసేసస్స.

౪౦౪. సేనాసనలేసో నామ ఇత్థన్నామసేనాసనవాసికో దిట్ఠో హోతి పారాజికం ధమ్మం అజ్ఝాపజ్జన్తో. అఞ్ఞం ఇత్థన్నామసేనాసనవాసికం పస్సిత్వా చోదేతి – ‘‘ఇత్థన్నామసేనాసనవాసికో మయా దిట్ఠో. పారాజికం ధమ్మం అజ్ఝాపన్నోసి, అస్సమణోసి, అసక్యపుత్తియోసి, నత్థి తయా సద్ధిం ఉపోసథో వా పవారణా వా సఙ్ఘకమ్మం వా’’తి, ఆపత్తి వాచాయ, వాచాయ సఙ్ఘాదిసేసస్స.

౪౦౫. పారాజికేన ధమ్మేనాతి చతున్నం అఞ్ఞతరేన.

అనుద్ధంసేయ్యాతి చోదేతి వా చోదాపేతి వా.

అప్పేవ నామ నం ఇమమ్హా బ్రహ్మచరియాచావేయ్యన్తి భిక్ఖుభావా చావేయ్యం, సమణధమ్మా చావేయ్యం, సీలక్ఖన్ధా చావేయ్యం, తపోగుణా చావేయ్యం.

తతో అపరేన సమయేనాతి యస్మిం ఖణే అనుద్ధంసితో హోతి, తం ఖణం తం లయం తం ముహుత్తం వీతివత్తే.

సమనుగ్గాహీయమానోతి యేన వత్థునా అనుద్ధంసితో హోతి తస్మిం వత్థుస్మిం సమనుగ్గాహీయమానో.

అసమనుగ్గాహీయమానోతి న కేనచి వుచ్చమానో.

అధికరణం నామ చత్తారి అధికరణాని – వివాదాధికరణం, అనువాదాధికరణం, ఆపత్తాధికరణం, కిచ్చాధికరణం.

కోచి దేసో లేసమత్తో ఉపాదిన్నోతి తేసం దసన్నం లేసానం అఞ్ఞతరో లేసో ఉపాదిన్నో హోతి.

భిక్ఖు చ దోసం పతిట్ఠాతీతి తుచ్ఛకం మయా భణితం, ముసా మయా భణితం, అభూతం మయా భణితం, అజానన్తేన మయా భణితం.

సఙ్ఘాదిసేసోతి …పే… తేనపి వుచ్చతి సఙ్ఘాదిసేసోతి.

౪౦౬. భిక్ఖు సఙ్ఘాదిసేసం అజ్ఝాపజ్జన్తో దిట్ఠో హోతి, సఙ్ఘాదిసేసే సఙ్ఘాదిసేసదిట్ఠి హోతి. తఞ్చే పారాజికేన చోదేతి – ‘‘అస్సమణోసి, అసక్యపుత్తియోసి, నత్థి తయా సద్ధిం ఉపోసథో వా పవారణా వా సఙ్ఘకమ్మం వా’’తి, ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు సఙ్ఘాదిసేసం అజ్ఝాపజ్జన్తో దిట్ఠో హోతి, సఙ్ఘాదిసేసే థుల్లచ్చయదిట్ఠి హోతి…పే… పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి… దుబ్భాసితదిట్ఠి హోతి. తఞ్చే పారాజికేన చోదేతి – ‘‘అస్సమణోసి’’…పే… ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు థుల్లచ్చయం అజ్ఝాపజ్జన్తో దిట్ఠో హోతి థుల్లచ్చయే థుల్లచ్చయదిట్ఠి హోతి…పే… థుల్లచ్చయే పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి… దుబ్భాసితదిట్ఠి హోతి… సఙ్ఘాదిసేసదిట్ఠి హోతి. తఞ్చే పారాజికేన చోదేతి – ‘‘అస్సమణోసి’’ …పే… ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు పాచిత్తియం…పే… పాటిదేసనీయం… దుక్కటం… దుబ్భాసితం అజ్ఝాపజ్జన్తో దిట్ఠో హోతి, దుబ్భాసితే దుబ్భాసితదిట్ఠి హోతి…పే… దుబ్భాసితే సఙ్ఘాదిసేసదిట్ఠి హోతి… థుల్లచ్చయదిట్ఠి హోతి… పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి. తఞ్చే పారాజికేన చోదేతి – ‘‘అస్సమణోసి, అసక్యపుత్తియోసి, నత్థి తయా సద్ధిం ఉపోసథో వా పవారణా వా సఙ్ఘకమ్మం వా’’తి, ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

ఏకేకం మూలం కాతున చక్కం బన్ధితబ్బం.

౪౦౭. భిక్ఖు సఙ్ఘాదిసేసం అజ్ఝాపజ్జన్తో దిట్ఠో హోతి సఙ్ఘాదిసేసే సఙ్ఘాదిసేసదిట్ఠి హోతి. తఞ్చే పారాజికేన చోదాపేతి – ‘‘అస్సమణోసి’’…పే… ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు సఙ్ఘాదిసేసం అజ్ఝాపజ్జన్తో దిట్ఠో హోతి, సఙ్ఘాదిసేసే థుల్లచ్చయదిట్ఠి హోతి…పే… పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి… దుబ్భాసితదిట్ఠి హోతి. తఞ్చే పారాజికేన చోదాపేతి – ‘‘అస్సమణోసి’’…పే… ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు థుల్లచ్చయం అజ్ఝాపజ్జన్తో దిట్ఠో హోతి థుల్లచ్చయే థుల్లచ్చయదిట్ఠి హోతి…పే… థుల్లచ్చయే పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి… దుబ్భాసితదిట్ఠి హోతి… సఙ్ఘాదిసేసదిట్ఠి హోతి. తఞ్చే పారాజికేన చోదాపేతి – ‘‘అస్సమణోసి’’…పే… ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

భిక్ఖు పాచిత్తియం…పే… పాటిదేసనీయం… దుక్కటం… దుబ్భాసితం అజ్ఝాపజ్జన్తో దిట్ఠో హోతి దుబ్భాసితే దుబ్భాసితదిట్ఠి హోతి…పే… దుబ్భాసితే సఙ్ఘాదిసేసదిట్ఠి హోతి… థుల్లచ్చయదిట్ఠి హోతి… పాచిత్తియదిట్ఠి హోతి… పాటిదేసనీయదిట్ఠి హోతి… దుక్కటదిట్ఠి హోతి. తఞ్చే పారాజికేన చోదాపేతి – ‘‘అస్సమణోసి, అసక్యపుత్తియోసి, నత్థి తయా సద్ధిం ఉపోసథో వా పవారణా వా సఙ్ఘకమ్మం వా’’తి, ఏవమ్పి ఆపత్తఞ్ఞభాగియం హోతి లేసో చ ఉపాదిన్నో, ఆపత్తి వాచాయ, వాచాయ సఙ్ఘాదిసేసస్స.

౪౦౮. అనాపత్తి తథాసఞ్ఞీ చోదేతి వా చోదాపేతి వా, ఉమ్మత్తకస్స, ఆదికమ్మికస్సాతి.

దుతియదుట్ఠదోససిక్ఖాపదం నిట్ఠితం నవమం.