౧౮౯. సమాదాయసత్తకం

౩౧౨. భిక్ఖు అత్థతకథినో కతచీవరం సమాదాయ పక్కమతి ‘‘న పచ్చేస్స’’న్తి. తస్స భిక్ఖునో పక్కమనన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి. తస్స బహిసీమగతస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స భిక్ఖునో నిట్ఠానన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి. తస్స బహిసీమగతస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. తస్స భిక్ఖునో సన్నిట్ఠానన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి. తస్స బహిసీమగతస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స తం చీవరం కయిరమానం నస్సతి. తస్స భిక్ఖునో నాసనన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి – ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో సుణాతి – ‘‘ఉబ్భతం కిర తస్మిం ఆవాసే కథిన’’న్తి. తస్స భిక్ఖునో సవనన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి – ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో – ‘‘పచ్చేస్సం పచ్చేస్స’’న్తి – బహిద్ధా కథినుద్ధారం వీతినామేతి. తస్స భిక్ఖునో సీమాతిక్కన్తికో కథినుద్ధారో.

భిక్ఖు అత్థతకథినో చీవరం సమాదాయ పక్కమతి – ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో – ‘‘పచ్చేస్సం పచ్చేస్స’’న్తి – సమ్భుణాతి కథినుద్ధారం. తస్స భిక్ఖునో సహ భిక్ఖూహి కథినుద్ధారో.

సమాదాయసత్తకం నిట్ఠితం.