౧౯౦. ఆదాయఛక్కం

౩౧౩. భిక్ఖు అత్థతకథినో విప్పకతచీవరం ఆదాయ పక్కమతి. తస్స బహిసీమగతస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స భిక్ఖునో నిట్ఠానన్తికో కథినుద్ధారో.

భిక్ఖు అత్థతకథినో విప్పకతచీవరం ఆదాయ పక్కమతి. తస్స బహిసీమగతస్స ఏవం హోతి – ‘‘నేవిమం చీవరం కారేస్సం, న పచ్చేస్స’’న్తి. తస్స భిక్ఖునో సన్నిట్ఠానన్తికో కథినుద్ధారో.

భిక్ఖు అత్థతకథినో విప్పకతచీవరం ఆదాయ పక్కమతి. తస్స బహిసీమగతస్స ఏవం హోతి – ‘‘ఇధేవిమం చీవరం కారేస్సం న పచ్చేస్స’’న్తి. సో తం చీవరం కారేతి. తస్సం తం చీవరం కయిరమానం నస్సతి. తస్స భిక్ఖునో నాసనన్తికో కథినుద్ధారో.

భిక్ఖు అత్థతకథినో విప్పకతచీవరం ఆదాయ పక్కమతి ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో సుణాతి – ‘‘ఉబ్భతం కిర తస్మిం ఆవాసే కథిన’’న్తి. తస్స భిక్ఖునో సవనన్తికో కథినుద్ధారో.

భిక్ఖు అత్థతకథినో విప్పకతచీవరం ఆదాయ పక్కమతి ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో ‘‘పచ్చేస్సం పచ్చేస్స’’న్తి బహిద్ధా కథినుద్ధారం వీతినామేతి. తస్స భిక్ఖునో సీమాతిక్కన్తికో కథినుద్ధారో.

భిక్ఖు అత్థతకథినో విప్పకతచీవరం ఆదాయ పక్కమతి ‘‘పచ్చేస్స’’న్తి. సో బహిసీమగతో తం చీవరం కారేతి. సో కతచీవరో ‘‘పచ్చేస్సం పచ్చేస్స’’న్తి సమ్భుణాతి కథినుద్ధారం. తస్స భిక్ఖునో సహ భిక్ఖూహి కథినుద్ధారో.

ఆదాయఛక్కం నిట్ఠితం.