౧౮౪. వుడ్ఢపబ్బజితవత్థు

౩౦౩. అథ ఖో భగవా కుసినారాయం యథాభిరన్తం విహరిత్వా యేన ఆతుమా తేన చారికం పక్కామి మహతా భిక్ఖుసఙ్ఘేన సద్ధిం అడ్ఢతేలసేహి భిక్ఖుసతేహి. తేన ఖో పన సమయేన అఞ్ఞతరో వుడ్ఢపబ్బజితో ఆతుమాయం పటివసతి నహాపితపుబ్బో. తస్స ద్వే దారకా హోన్తి, మఞ్జుకా పటిభానేయ్యకా, దక్ఖా పరియోదాతసిప్పా సకే ఆచరియకే నహాపితకమ్మే. అస్సోసి ఖో సో వుడ్ఢపబ్బజితో – ‘‘భగవా కిర ఆతుమం ఆగచ్ఛతి మహతా భిక్ఖుసఙ్ఘేన సద్ధిం అడ్ఢతేలసేహి భిక్ఖుసతేహీ’’తి. అథ ఖో సో వుడ్ఢపబ్బజితో తే దారకే ఏతదవోచ – ‘‘భగవా కిర, తాతా, ఆతుమం ఆగచ్ఛతి మహతా భిక్ఖుసఙ్ఘేన సద్ధిం అడ్ఢతేలసేహి భిక్ఖుసతేహి. గచ్ఛథ తుమ్హే, తాతా, ఖురభణ్డం ఆదాయ నాళియావాపకేన అనుఘరకం అనుఘరకం ఆహిణ్డథ, లోణమ్పి, తేలమ్పి, తణ్డులమ్పి, ఖాదనీయమ్పి సంహరథ, భగవతో ఆగతస్స యాగుపానం కరిస్సామా’’తి. ‘‘ఏవం, తాతా’’తి ఖో తే దారకా తస్స వుడ్ఢపబ్బజితస్స పటిస్సుణిత్వా ఖురభణ్డం ఆదాయ నాళియావాపకేన అనుఘరకం అనుఘరకం ఆహిణ్డన్తి, లోణమ్పి, తేలమ్పి, తణ్డులమ్పి, ఖాదనీయమ్పి సంహరన్తా. మనుస్సా తే దారకే మఞ్జుకే పటిభానేయ్యకే పస్సిత్వా యేపి న కారాపేతుకామా తేపి కారాపేన్తి, కారాపేత్వాపి బహుం దేన్తి. అథ ఖో తే దారకా బహుం లోణమ్పి, తేలమ్పి, తణ్డులమ్పి, ఖాదనీయమ్పి సంహరింసు.

అథ ఖో భగవా అనుపుబ్బేన చారికం చరమానో యేన ఆతుమా తదవసరి. తత్ర సుదం భగవా ఆతుమాయం విహరతి భుసాగారే. అథ ఖో సో వుడ్ఢపబ్బజితో తస్సా రత్తియా అచ్చయేన పహూతం యాగుం పటియాదాపేత్వా భగవతో ఉపనామేసి – ‘‘పటిగ్గణ్హాతు మే, భన్తే, భగవా యాగు’’న్తి. జానన్తాపి తథాగతా పుచ్ఛన్తి…పే… సావకానం వా సిక్ఖాపదం పఞ్ఞపేస్సామాతి. అథ ఖో భగవా తం వుడ్ఢపబ్బజితం ఏతదవోచ – ‘‘కుతాయం, భిక్ఖు యాగూ’’తి? అథ ఖో సో వుడ్ఢపబ్బజితో భగవతో ఏతమత్థం ఆరోచేసి. విగరహి బుద్ధో భగవా, ‘‘అననుచ్ఛవికం, మోఘపురిస, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ త్వం, మోఘపురిస, పబ్బజితో అకప్పియే సమాదపేస్ససి [సమాదపేసి (క.)]. నేతం, మోఘపురిస, అప్పసన్నానం వా పసాదాయ…పే… విగరహిత్వా ధమ్మిం కథం కత్వా భిక్ఖూ ఆమన్తేసి ‘న, భిక్ఖవే, పబ్బజితేన అకప్పియే సమాదపేతబ్బం, యో సమాదపేయ్య, ఆపత్తి దుక్కటస్స. న చ, భిక్ఖవే, నహాపితపుబ్బేన ఖురభణ్డం పరిహరితబ్బం. యో పరిహరేయ్య, ఆపత్తి దుక్కటస్సా’’’తి.

అథ ఖో భగవా ఆతుమాయం యథాభిరన్తం విహరిత్వా యేన సావత్థి తేన చారికం పక్కామి. అనుపుబ్బేన చారికం చరమానో యేన సావత్థి తదవసరి. తత్ర సుదం భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన సావత్థియం బహుం ఫలఖాదనీయం ఉప్పన్నం హోతి. అథ ఖో భిక్ఖూనం ఏతదహోసి – ‘‘కిం ను ఖో భగవతా ఫలఖాదనీయం అనుఞ్ఞాతం, కిం అననుఞ్ఞాత’’న్తి? భగవతో ఏతమత్థం ఆరోచేసుం. ‘‘అనుజానామి, భిక్ఖవే, సబ్బం ఫలఖాదనీయ’’న్తి.

౩౦౪. తేన ఖో పన సమయేన సఙ్ఘికాని బీజాని పుగ్గలికాయ భూమియా రోపియన్తి, పుగ్గలికాని బీజాని సఙ్ఘికాయ భూమియా రోపియన్తి. భగవతో ఏతమత్థం ఆరోచేసుం. సఙ్ఘికాని, భిక్ఖవే, బీజాని పుగ్గలికాయ భూమియా రోపితాని భాగం దత్వా పరిభుఞ్జితబ్బాని. పుగ్గలికాని బీజాని సఙ్ఘికాయ భూమియా రోపితాని భాగం దత్వా పరిభుఞ్జితబ్బానీతి.

వుడ్ఢపబ్బజితవత్థు నిట్ఠితం.