౧౭౯. కప్పియభూమిఅనుజాననా

౨౯౫. తేన ఖో పన సమయేన వేసాలీ సుభిక్ఖా హోతి సుసస్సా సులభపిణ్డా, సుకరా ఉఞ్ఛేన పగ్గహేన యాపేతుం. అథ ఖో భగవతో రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘యాని తాని మయా భిక్ఖూనం అనుఞ్ఞాతాని దుబ్భిక్ఖే దుస్సస్సే దుల్లభపిణ్డే అన్తో వుట్ఠం అన్తో పక్కం సామం పక్కం ఉగ్గహితపటిగ్గహితకం తతో నీహటం పురేభత్తం పటిగ్గహితం వనట్ఠం పోక్ఖరట్ఠం, అజ్జాపి ను ఖో తాని భిక్ఖూ పరిభుఞ్జన్తీ’’తి. అథ ఖో భగవా సాయన్హసమయం పటిసల్లానా వుట్ఠితో ఆయస్మన్తం ఆనన్దం ఆమన్తేసి – ‘‘యాని తాని, ఆనన్ద, మయా భిక్ఖూనం అనుఞ్ఞాతాని దుబ్భిక్ఖే దుస్సస్సే దుల్లభపిణ్డే అన్తో వుట్ఠం అన్తో పక్కం సామం పక్కం ఉగ్గహితపటిగ్గహితకం తతో నీహటం పురేభత్తం పటిగ్గహితం వనట్ఠం పోక్ఖరట్ఠం, అజ్జాపి ను ఖో తాని భిక్ఖూ పరిభుఞ్జన్తీ’’తి? ‘‘పరిభుఞ్జన్తి భగవా’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘యాని తాని, భిక్ఖవే, మయా భిక్ఖూనం అనుఞ్ఞాతాని దుబ్భిక్ఖే దుస్సస్సే దుల్లభపిణ్డే అన్తో వుట్ఠం అన్తో పక్కం సామం పక్కం ఉగ్గహితపటిగ్గహితకం తతో నీహటం పురేభత్తం పటిగ్గహితం వనట్ఠం పోక్ఖరట్ఠం, తానాహం అజ్జతగ్గే పటిక్ఖిపామి. న, భిక్ఖవే, అన్తో వుట్ఠం అన్తో పక్కం సామం పక్కం ఉగ్గహితపటిగ్గహితకం పరిభుఞ్జితబ్బం. యో పరిభుఞ్జేయ్య, ఆపత్తి దుక్కటస్స. న చ, భిక్ఖవే, తతో నీహటం పురేభత్తం పటిగ్గహితం వనట్ఠం పోక్ఖరట్ఠం భుత్తావినా పవారితేన అనతిరిత్తం పరిభుఞ్జితబ్బం. యో పరిభుఞ్జేయ్య, యథాధమ్మో కారేతబ్బో’’తి.

తేన ఖో పన సమయేన జానపదా మనుస్సా బహుం లోణమ్పి, తేలమ్పి, తణ్డులమ్పి, ఖాదనీయమ్పి సకటేసు ఆరోపేత్వా బహారామకోట్ఠకే సకటపరివట్టం కరిత్వా అచ్ఛన్తి – యదా పటిపాటిం లభిస్సామ, తదా భత్తం కరిస్సామాతి. మహా చ మేఘో ఉగ్గతో హోతి. అథ ఖో తే మనుస్సా యేనాయస్మా ఆనన్దో తేనుపసఙ్కమింసు, ఉపసఙ్కమిత్వా ఆయస్మన్తం ఆనన్దం ఏతదవోచుం – ‘‘ఇధ, భన్తే ఆనన్ద, బహుం లోణమ్పి, తేలమ్పి, తణ్డులమ్పి, ఖాదనీయమ్పి సకటేసు ఆరోపితా తిట్ఠన్తి, మహా చ మేఘో ఉగ్గతో; కథం ను ఖో, భన్తే ఆనన్ద, పటిపజ్జితబ్బ’’న్తి? అథ ఖో ఆయస్మా ఆనన్దో భగవతో ఏతమత్థం ఆరోచేసి. ‘‘తేన హానన్ద, సఙ్ఘో పచ్చన్తిమం విహారం కప్పియభూమిం సమ్మన్నిత్వా తత్థ వాసేతు, యం సఙ్ఘో ఆకఙ్ఖతి విహారం వా అడ్ఢయోగం వా పాసాదం వా హమ్మియం వా గుహం వా. ఏవఞ్చ పన, భిక్ఖవే, సమ్మన్నితబ్బా. బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. యది సఙ్ఘస్స పత్తకల్లం, సఙ్ఘో ఇత్థన్నామం విహారం కప్పియభూమిం సమ్మన్నేయ్య, ఏసా ఞత్తి.

‘‘సుణాతు మే, భన్తే, సఙ్ఘో. సఙ్ఘో ఇత్థన్నామం విహారం కప్పియభూమిం సమ్మన్నతి. యస్సాయస్మతో ఖమతి ఇత్థన్నామస్స విహారస్స కప్పియభూమియా సమ్ముతి, సో తుణ్హస్స; యస్స నక్ఖమతి, సో భాసేయ్య.

‘‘సమ్మతో సఙ్ఘేన ఇత్థన్నామో విహారో కప్పియభూమి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

తేన ఖో పన సమయేన మనుస్సా తత్థేవ సమ్ముతియా [సమ్మతికాయ (స్యా.)] కప్పియభూమియా యాగుయో పచన్తి, భత్తాని పచన్తి, సూపాని సమ్పాదేన్తి, మంసాని కోట్టేన్తి, కట్ఠాని ఫాలేన్తి. అస్సోసి ఖో భగవా రత్తియా పచ్చూససమయం పచ్చుట్ఠాయ ఉచ్చాసద్దం మహాసద్దం కాకోరవసద్దం, సుత్వాన ఆయస్మన్తం ఆనన్దం ఆమన్తేసి – ‘‘కిం ను ఖో సో, ఆనన్ద, ఉచ్చాసద్దో మహాసద్దో కాకోరవసద్దో’’తి? ‘‘ఏతరహి, భన్తే, మనుస్సా తత్థేవ సమ్ముతియా కప్పియభూమియా యాగుయో పచన్తి, భత్తాని పచన్తి, సూపాని సమ్పాదేన్తి, మంసాని కోట్టేన్తి, కట్ఠాని ఫాలేన్తి. సో ఏసో, భగవా, ఉచ్చాసద్దో మహాసద్దో కాకోరవసద్దో’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, సమ్ముతి [సమ్మతికా (స్యా.)] కప్పియభూమి పరిభుఞ్జితబ్బా. యో పరిభుఞ్జేయ్య, ఆపత్తి దుక్కటస్స. అనుజానామి, భిక్ఖవే, తిస్సో కప్పియభూమియో – ఉస్సావనన్తికం గోనిసాదికం గహపతి’’న్తి.

తేన ఖో పన సమయేన ఆయస్మా యసోజో గిలానో హోతి. తస్సత్థాయ భేసజ్జాని ఆహరియన్తి. తాని భిక్ఖూ బహి వాసేన్తి. ఉక్కపిణ్డికాపి ఖాదన్తి, చోరాపి హరన్తి. భగవతో ఏతమత్థం ఆరోచేసుం. అనుజానామి, భిక్ఖవే, సమ్ముతిం కప్పియభూమిం పరిభుఞ్జితుం. అనుజానామి, భిక్ఖవే, చతస్సో కప్పియభూమియో – ఉస్సావనన్తికం గోనిసాదికం గహపతిం సమ్ముతిన్తి.

కప్పియభూమిఅనుజాననా నిట్ఠితా.

సీహభాణవారో నిట్ఠితో చతుత్థో.