౧౭౭. లిచ్ఛవీవత్థు

౨౮౯. [దీ. ని. ౨.౧౬౧ ఆదయో] అస్సోసుం ఖో వేసాలికా లిచ్ఛవీ – భగవా కిర కోటిగామం అనుప్పత్తోతి. అథ ఖో వేసాలికా లిచ్ఛవీ భద్రాని భద్రాని యానాని యోజాపేత్వా భద్రం భద్రం యానం అభిరుహిత్వా భద్రేహి భద్రేహి యానేహి వేసాలియా నియ్యాసుం భగవన్తం దస్సనాయ. అప్పేకచ్చే లిచ్ఛవీ నీలా హోన్తి నీలవణ్ణా నీలవత్థా నీలాలఙ్కారా, అప్పేకచ్చే లిచ్ఛవీ పీతా హోన్తి పీతవణ్ణా పీతవత్థా పీతాలఙ్కారా, అప్పేకచ్చే లిచ్ఛవీ లోహితా హోన్తి లోహితవణ్ణా లోహితవత్థా లోహితాలఙ్కారా, అప్పేకచ్చే లిచ్ఛవీ ఓదాతా హోన్తి ఓదాతవణ్ణా ఓదాతవత్థా ఓదాతాలఙ్కారా. అథ ఖో అమ్బపాలీ గణికా దహరానం దహరానం లిచ్ఛవీనం ఈసాయ ఈసం యుగేన యుగం చక్కేన చక్కం అక్ఖేన అక్ఖం పటివట్టేసి [పటివత్తేసి (క.)]. అథ ఖో తే లిచ్ఛవీ అమ్బపాలిం గణికం ఏతదవోచుం – ‘‘కిస్స, జే అమ్బపాలి, దహరానం దహరానం [అమ్హాకం దహరానం దహరానం (సీ. స్యా.)] లిచ్ఛవీనం ఈసాయ ఈసం యుగేన యుగం చక్కేన చక్కం అక్ఖేన అక్ఖం పటివట్టేసీ’’తి? ‘‘తథా హి పన మయా, అయ్యపుత్తా, స్వాతనాయ బుద్ధప్పముఖో భిక్ఖుసఙ్ఘో నిమన్తితో’’తి. ‘‘దేహి, జే అమ్బపాలి, అమ్హాకం ఏతం భత్తం సతసహస్సేనా’’తి. ‘‘సచేపి మే, అయ్యపుత్తా, వేసాలిం సాహారం దజ్జేయ్యాథ, నేవ దజ్జాహం తం భత్త’’న్తి. అథ ఖో తే లిచ్ఛవీ అఙ్గులిం ఫోటేసుం – ‘‘జితమ్హా వత, భో, అమ్బకాయ, పరాజితమ్హ వత, భో, అమ్బకాయా’’తి. అథ ఖో తే లిచ్ఛవీ యేన భగవా తేనుపసఙ్కమింసు. అద్దసా ఖో భగవా తే లిచ్ఛవీ దూరతోవ ఆగచ్ఛన్తే, దిస్వాన భిక్ఖూ ఆమన్తేసి – ‘‘యేహి, భిక్ఖవే, భిక్ఖూహి దేవా తావతింసా అదిట్ఠపుబ్బా, ఓలోకేథ, భిక్ఖవే, లిచ్ఛవీపరిసం; అపలోకేథ, భిక్ఖవే, లిచ్ఛవీపరిసం; ఉపసంహరథ, భిక్ఖవే, లిచ్ఛవీపరిసం తావతింసపరిస’’న్తి. అథ ఖో తే లిచ్ఛవీ యావతికా యానస్స భూమి, యానేన గన్త్వా యానా పచ్చోరోహిత్వా పత్తికావ యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. ఏకమన్తం నిసిన్నే ఖో తే లిచ్ఛవీ భగవా ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో తే లిచ్ఛవీ, భగవతా ధమ్మియా కథాయ సన్దస్సితా సమాదపితా సముత్తేజితా సమ్పహంసితా భగవన్తం ఏతదవోచుం – ‘‘అధివాసేతు నో, భన్తే, భగవా స్వాతనాయ భత్తం సద్ధిం భిక్ఖుసఙ్ఘేనా’’తి. ‘‘అధివుట్ఠోమ్హి, లిచ్ఛవీ, స్వాతనాయ అమ్బపాలియా గణికాయ భత్త’’న్తి. అథ ఖో తే లిచ్ఛవీ అఙ్గులిం ఫోటేసుం – ‘‘జితమ్హ వత, భో, అమ్బకాయ, పరాజితమ్హ వత, భో, అమ్బకాయా’’తి. అథ ఖో తే లిచ్ఛవీ భగవతో భాసితం అభినన్దిత్వా అనుమోదిత్వా ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కమింసు.

అథ ఖో భగవా కోటిగామే యథాభిరన్తం విహరిత్వా [మహాపరినిబ్బానసుత్తే అనుసన్ధి అఞ్ఞథా ఆగతో] యేన నాతికా [నాదికా (సీ. స్యా.)] తేనుపసఙ్కమి. తత్ర సుదం భగవా నాతికే విహరతి గిఞ్జకావసథే. అథ ఖో అమ్బపాలీ గణికా తస్సా రత్తియా అచ్చయేన సకే ఆరామే పణీతం ఖాదనీయం భోజనీయం పటియాదాపేత్వా భగవతో కాలం ఆరోచాపేసి – ‘‘కాలో, భన్తే, నిట్ఠితం భత్త’’న్తి. అథ ఖో భగవా పుబ్బణ్హసమయం నివాసేత్వా పత్తచీవరమాదాయ యేన అమ్బపాలియా గణికాయ పరివేసనా తేనుపసఙ్కమి; ఉపసఙ్కమిత్వా పఞ్ఞత్తే ఆసనే నిసీది సద్ధిం భిక్ఖుసఙ్ఘేన. అథ ఖో అమ్బపాలీ గణికా బుద్ధప్పముఖం భిక్ఖుసఙ్ఘం పణీతేన ఖాదనీయేన భోజనీయేన సహత్థా సన్తప్పేత్వా సమ్పవారేత్వా భగవన్తం భుత్తావిం ఓనీతపత్తపాణిం ఏకమన్తం నిసీది. ఏకమన్తం నిసిన్నా ఖో అమ్బపాలీ గణికా భగవన్తం ఏతదవోచ – ‘‘ఇమాహం, భన్తే, అమ్బవనం బుద్ధప్పముఖస్స భిక్ఖుసఙ్ఘస్స దమ్మీ’’తి. పటిగ్గహేసి భగవా ఆరామం. అథ ఖో భగవా అమ్బపాలిం గణికం ధమ్మియా కథాయ సన్దస్సేత్వా సమాదపేత్వా సముత్తేజేత్వా సమ్పహంసేత్వా ఉట్ఠాయాసనా యేన మహావనం తేనుపసఙ్కమి. తత్ర సుదం భగవా వేసాలియం విహరతి మహావనే కూటాగారసాలాయం.

లిచ్ఛవీవత్థు నిట్ఠితం.

లిచ్ఛవిభాణవారో నిట్ఠితో తతియో.