౧౫౬. గిహివికతానుఞ్ఞాతాది

౨౫౬. తేన ఖో పన సమయేన మనుస్సానం మఞ్చమ్పి పీఠమ్పి చమ్మోనద్ధాని హోన్తి, చమ్మవినద్ధాని. భిక్ఖూ కుక్కుచ్చాయన్తా నాభినిసీదన్తి. భగవతో ఏతమత్థం ఆరోచేసుం. అనుజానామి, భిక్ఖవే, గిహివికతం అభినిసీదితుం, న త్వేవ అభినిపజ్జితున్తి.

తేన ఖో పన సమయేన విహారా చమ్మవద్ధేహి ఓగుమ్ఫియన్తి [ఓగుమ్భియన్తి (క.)]. భిక్ఖూ కుక్కుచ్చాయన్తా నాభినిసీదన్తి. భగవతో ఏతమత్థం ఆరోచేసుం. అనుజానామి, భిక్ఖవే, బన్ధనమత్తం అభినిసీదితున్తి.

తేన ఖో పన సమయేన ఛబ్బగ్గియా భిక్ఖూ సఉపాహనా గామం పవిసన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, సఉపాహనేన గామో పవిసితబ్బో. యో పవిసేయ్య, ఆపత్తి దుక్కటస్సాతి.

తేన ఖో పన సమయేన అఞ్ఞతరో భిక్ఖు గిలానో హోతి, న సక్కోతి వినా ఉపాహనేన గామం పవిసితుం. భగవతో ఏతమత్థం ఆరోచేసుం. అనుజానామి, భిక్ఖవే, గిలానేన భిక్ఖునా సఉపాహనేన గామం పవిసితున్తి.

గిహివికతానుఞ్ఞాతాది నిట్ఠితా.