౧౫౫. సబ్బచమ్మపటిక్ఖేపో

౨౫౫. తేన ఖో పన సమయేన ఛబ్బగ్గియా భిక్ఖూ – భగవతా ఉచ్చాసయనమహాసయనాని పటిక్ఖిత్తానీతి – మహాచమ్మాని ధారేన్తి, సీహచమ్మం బ్యగ్ఘచమ్మం దీపిచమ్మం. తాని మఞ్చప్పమాణేనపి ఛిన్నాని హోన్తి, పీఠప్పమాణేనపి ఛిన్నాని హోన్తి, అన్తోపి మఞ్చే పఞ్ఞత్తాని హోన్తి, బహిపి మఞ్చే పఞ్ఞత్తాని హోన్తి, అన్తోపి పీఠే పఞ్ఞత్తాని హోన్తి, బహిపి పీఠే పఞ్ఞత్తాని హోన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, మహాచమ్మాని ధారేతబ్బాని, సీహచమ్మం బ్యగ్ఘచమ్మం దీపిచమ్మం. యో ధారేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ – భగవతా మహాచమ్మాని పటిక్ఖిత్తానీతి – గోచమ్మాని ధారేన్తి. తాని మఞ్చప్పమాణేనపి ఛిన్నాని హోన్తి, పీఠప్పమాణేనపి ఛిన్నాని హోన్తి, అన్తోపి మఞ్చే పఞ్ఞత్తాని హోన్తి, బహిపి మఞ్చే పఞ్ఞత్తాని హోన్తి, అన్తోపి పీఠే పఞ్ఞత్తాని హోన్తి, బహిపి పీఠే పఞ్ఞత్తాని హోన్తి. అఞ్ఞతరోపి పాపభిక్ఖు అఞ్ఞతరస్స పాపుపాసకస్స కులూపకో హోతి. అథ ఖో సో పాపభిక్ఖు పుబ్బణ్హసమయం నివాసేత్వా పత్తచీవరమాదాయ యేన తస్స పాపుపాసకస్స నివేసనం తేనుపసఙ్కమి, ఉపసఙ్కమిత్వా పఞ్ఞత్తే ఆసనే నిసీది. అథ ఖో సో పాపుపాసకో యేన సో పాపభిక్ఖు తేనుపసఙ్కమి, ఉపసఙ్కమిత్వా తం పాపభిక్ఖుం అభివాదేత్వా ఏకమన్తం నిసీది. తేన ఖో పన సమయేన తస్స పాపుపాసకస్స వచ్ఛకో హోతి తరుణకో అభిరూపో దస్సనీయో పాసాదికో చిత్రో, సేయ్యథాపి దీపిచ్ఛాపో. అథ ఖో సో పాపభిక్ఖు తం వచ్ఛకం సక్కచ్చం ఉపనిజ్ఝాయతి. అథ ఖో సో పాపుపాసకో తం పాపభిక్ఖుం ఏతదవోచ – ‘‘కిస్స, భన్తే, అయ్యో ఇమం వచ్ఛకం సక్కచ్చం ఉపనిజ్ఝాయతీ’’తి? ‘‘అత్థో మే, ఆవుసో, ఇమస్స వచ్ఛకస్స చమ్మేనా’’తి. అథ ఖో సో పాపుపాసకో తం వచ్ఛకం వధిత్వా చమ్మం విధునిత్వా తస్స పాపభిక్ఖునో పాదాసి. అథ ఖో సో పాపభిక్ఖు తం చమ్మం సఙ్ఘాటియా పటిచ్ఛాదేత్వా అగమాసి. అథ ఖో సా గావీ వచ్ఛగిద్ధినీ తం పాపభిక్ఖుం పిట్ఠితో పిట్ఠితో అనుబన్ధి. భిక్ఖూ ఏవమాహంసు – ‘‘కిస్స త్యాయం, ఆవుసో, గావీ పిట్ఠితో పిట్ఠితో అనుబన్ధీ’’తి? ‘‘అహమ్పి ఖో, ఆవుసో, న జానామి కేన [కేనచి (క.)] మ్యాయం గావీ పిట్ఠితో పిట్ఠితో అనుబన్ధీ’’తి. తేన ఖో పన సమయేన తస్స పాపభిక్ఖునో సఙ్ఘాటి లోహితేన మక్ఖితా హోతి. భిక్ఖూ ఏవమాహంసు – ‘‘అయం పన తే, ఆవుసో, సఙ్ఘాటి కిం కతా’’తి? అథ ఖో సో పాపభిక్ఖు భిక్ఖూనం ఏతమత్థం ఆరోచేసి. ‘‘కిం పన త్వం, ఆవుసో, పాణాతిపాతే సమాదపేసీ’’తి? ‘‘ఏవమావుసో’’తి. యే తే భిక్ఖూ అప్పిచ్ఛా తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖు పాణాతిపాతే సమాదపేస్సతి, నను భగవతా అనేకపరియాయేన పాణాతిపాతో గరహితో, పాణాతిపాతా వేరమణీ పసత్థా’’తి. అథ ఖో తే భిక్ఖూ భగవతో ఏతమత్థం ఆరోచేసుం.

అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా తం పాపభిక్ఖుం పటిపుచ్ఛి – ‘‘సచ్చం కిర త్వం, భిక్ఖు, పాణాతిపాతే సమాదపేసీ’’తి? సచ్చం భగవాతి…పే… కథఞ్హి నామ త్వం, మోఘపురిస, పాణాతిపాతే సమాదపేస్ససి, నను మయా, మోఘపురిస, అనేకపరియాయేన పాణాతిపాతో గరహితో, పాణాతిపాతా వేరమణీ పసత్థా. నేతం, మోఘపురిస, అప్పసన్నానం వా పసాదాయ…పే… విగరహిత్వా ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, పాణాతిపాతే సమాదపేతబ్బం. యో సమాదపేయ్య, యథాధమ్మో కారేతబ్బో. న, భిక్ఖవే, గోచమ్మం ధారేతబ్బం. యో ధారేయ్య, ఆపత్తి దుక్కటస్స. న చ, భిక్ఖవే, కిఞ్చి చమ్మం ధారేతబ్బం. యో ధారేయ్య, ఆపత్తి దుక్కటస్సా’’తి.

సబ్బచమ్మపటిక్ఖేపో నిట్ఠితో.