౧౫౪. ఉచ్చాసయనమహాసయనపటిక్ఖేపో

౨౫౪. తేన ఖో పన సమయేన ఛబ్బగ్గియా భిక్ఖూ ఉచ్చాసయనమహాసయనాని ధారేన్తి, సేయ్యథిదం – ఆసన్దిం, పల్లఙ్కం, గోనకం, చిత్తకం, పటికం, పటలికం, తూలికం, వికతికం, ఉద్ధలోమిం [ఉన్దలోమిం (క.), ఉద్దలోమిం (క.)], ఏకన్తలోమిం, కట్టిస్సం, కోసేయ్యం, కుత్తకం, హత్థత్థరం, అస్సత్థరం, రథత్థరం, అజినపవేణిం, కదలిమిగపవరపచ్చత్థరణం, సఉత్తరచ్ఛదం, ఉభతోలోహితకూపధానన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, ఉచ్చాసయనమహాసయనాని ధారేతబ్బాని, సేయ్యథిదం – ఆసన్ది, పల్లఙ్కో, గోనకో, చిత్తకో, పటికా, పటలికా, తూలికా, వికతికా, ఉద్ధలోమి, ఏకన్తలోమి, కట్టిస్సం, కోసేయ్యం, కుత్తకం, హత్థత్థరం, అస్సత్థరం, రథత్థరం, అజినపవేణి, కదలిమిగపవరపచ్చత్థరణం, సఉత్తరచ్ఛదం, ఉభతోలోహితకూపధానం. యో ధారేయ్య, ఆపత్తి దుక్కటస్సాతి.

ఉచ్చాసయనమహాసయనపటిక్ఖేపో నిట్ఠితో.