౧౫౩. యానాదిపటిక్ఖేపో

౨౫౩. తేన ఖో పన సమయేన ఛబ్బగ్గియా భిక్ఖూ యానేన యాయన్తి, ఇత్థియుత్తేనపి పురిసన్తరేన, పురిసయుత్తేనపి ఇత్థన్తరేన. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి గఙ్గామహియాయా’’తి. భగవతో ఏతమత్థం ఆరోచేసుం. న, భిక్ఖవే, యానేన యాయితబ్బం. యో యాయేయ్య, ఆపత్తి దుక్కటస్సాతి. తేన ఖో పన సమయేన అఞ్ఞతరో భిక్ఖు కోసలేసు జనపదే సావత్థిం గచ్ఛన్తో భగవన్తం దస్సనాయ అన్తరామగ్గే గిలానో హోతి. అథ ఖో సో భిక్ఖు మగ్గా ఓక్కమ్మ అఞ్ఞతరస్మిం రుక్ఖమూలే నిసీది. మనుస్సా తం భిక్ఖుం దిస్వా ఏతదవోచుం – ‘‘కహం, భన్తే, అయ్యో గమిస్సతీ’’తి? ‘‘సావత్థిం ఖో అహం, ఆవుసో, గమిస్సామి భగవన్తం దస్సనాయా’’తి. ‘‘ఏహి, భన్తే, గమిస్సామా’’తి. ‘‘నాహం, ఆవుసో, సక్కోమి, గిలానోమ్హీ’’తి. ‘‘ఏహి, భన్తే, యానం అభిరుహా’’తి. ‘‘అలం, ఆవుసో, పటిక్ఖిత్తం భగవతా యాన’’న్తి కుక్కుచ్చాయన్తో యానం నాభిరుహి. అథ ఖో సో భిక్ఖు సావత్థిం గన్త్వా భిక్ఖూనం ఏతమత్థం ఆరోచేసి. భిక్ఖూ భగవతో ఏతమత్థం ఆరోచేసుం. అనుజానామి, భిక్ఖవే, గిలానస్స యానన్తి. అథ ఖో భిక్ఖూనం ఏతదహోసి – ‘‘ఇత్థియుత్తం ను ఖో పురిసయుత్తం ను ఖో’’తి? భగవతో ఏతమత్థం ఆరోచేసుం. అనుజానామి, భిక్ఖవే, పురిసయుత్తం హత్థవట్టకన్తి.

తేన ఖో పన సమయేన అఞ్ఞతరస్స భిక్ఖునో యానుగ్ఘాతేన బాళ్హతరం అఫాసు అహోసి. భగవతో ఏతమత్థం ఆరోచేసుం. అనుజానామి, భిక్ఖవే, సివికం పాటఙ్కిన్తి.

యానాదిపటిక్ఖేపో నిట్ఠితో.