౧౫౧. అజ్ఝారామే ఉపాహనపటిక్ఖేపో

౨౪౮. తేన ఖో పన సమయేన భగవా అజ్ఝోకాసే అనుపాహనో చఙ్కమతి. సత్థా అనుపాహనో చఙ్కమతీతి, థేరాపి భిక్ఖూ అనుపాహనా చఙ్కమన్తి. ఛబ్బగ్గియా భిక్ఖూ, సత్థరి అనుపాహనే చఙ్కమమానే, థేరేసుపి భిక్ఖూసు అనుపాహనేసు చఙ్కమమానేసు, సఉపాహనా చఙ్కమన్తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ, సత్థరి అనుపాహనే చఙ్కమమానే, థేరేసుపి భిక్ఖూసు అనుపాహనేసు చఙ్కమమానేసు, సఉపాహనా చఙ్కమిస్సన్తీ’’తి. అథ ఖో తే భిక్ఖూ భగవతో ఏతమత్థం ఆరోచేసుం…పే… ‘‘సచ్చం కిర, భిక్ఖవే, ఛబ్బగ్గియా భిక్ఖూ, సత్థరి అనుపాహనే చఙ్కమమానే, థేరేసుపి భిక్ఖూసు అనుపాహనేసు చఙ్కమమానేసు, సఉపాహనా చఙ్కమన్తీ’’తి? ‘‘సచ్చం, భగవా’’తి. విగరహి బుద్ధో భగవా…పే… ‘‘కథఞ్హి నామ తే, భిక్ఖవే, మోఘపురిసా, సత్థరి అనుపాహనే చఙ్కమమానే, థేరేసుపి భిక్ఖూసు అనుపాహనేసు చఙ్కమమానేసు, సఉపాహనా చఙ్కమిస్సన్తి. ఇమే హి నామ, భిక్ఖవే, గిహీ ఓదాతవత్థవసనకా అభిజీవనికస్స సిప్పస్స కారణా ఆచరియేసు సగారవా సప్పతిస్సా సభాగవుత్తికా విహరిస్సన్తి. ఇధ ఖో తం, భిక్ఖవే, సోభేథ, యం తుమ్హే ఏవం స్వాక్ఖాతే ధమ్మవినయే పబ్బజితా సమానా ఆచరియేసు ఆచరియమత్తేసు ఉపజ్ఝాయేసు ఉపజ్ఝాయమత్తేసు అగారవా అప్పతిస్సా అసభాగవుత్తికా [సగారవా సగ్గతిస్సా సభాగవుత్తికా (క.)] విహరేయ్యాథ. నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, ఆచరియేసు ఆచరియమత్తేసు ఉపజ్ఝాయేసు ఉపజ్ఝాయమత్తేసు అనుపాహనేసు చఙ్కమమానేసు సఉపాహనేన చఙ్కమితబ్బం. యో చఙ్కమేయ్య, ఆపత్తి దుక్కటస్స. న చ, భిక్ఖవే, అజ్ఝారామే ఉపాహనా ధారేతబ్బా. యో ధారేయ్య, ఆపత్తి దుక్కటస్సా’’తి.

౨౪౯. తేన ఖో పన సమయేన అఞ్ఞతరస్స భిక్ఖునో పాదఖిలాబాధో హోతి. తం భిక్ఖూ పరిగ్గహేత్వా ఉచ్చారమ్పి పస్సావమ్పి నిక్ఖామేన్తి. అద్దసా ఖో భగవా సేనాసనచారికం ఆహిణ్డన్తో తే భిక్ఖూ తం భిక్ఖుం పరిగ్గహేత్వా ఉచ్చారమ్పి పస్సావమ్పి నిక్ఖామేన్తే, దిస్వాన యేన తే భిక్ఖూ తేనుపసఙ్కమి, ఉపసఙ్కమిత్వా తే భిక్ఖూ ఏతదవోచ – ‘‘కిం ఇమస్స, భిక్ఖవే, భిక్ఖునో ఆబాధో’’తి? ‘‘ఇమస్స, భన్తే, ఆయస్మతో పాదఖిలాబాధో; ఇమం మయం పరిగ్గహేత్వా ఉచ్చారమ్పి పస్సావమ్పి నిక్ఖామేమా’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, యస్స పాదా వా దుక్ఖా, పాదా వా ఫలితా, పాదఖిలో వా ఆబాధో [పాదఖిలాబాధో వా (స్యా.)] ఉపాహనం ధారేతు’’న్తి.

తేన ఖో పన సమయేన భిక్ఖూ అధోతేహి పాదేహి మఞ్చమ్పి పీఠమ్పి అభిరుహన్తి; చీవరమ్పి సేనాసనమ్పి దుస్సతి. భగవతో ఏతమత్థం ఆరోచేసుం. అనుజానామి, భిక్ఖవే, ‘ఇదాని మఞ్చం వా పీఠం వా అభిరుహిస్సామీ’’తి ఉపాహనం ధారేతున్తి.

తేన ఖో పన సమయేన భిక్ఖూ రత్తియా ఉపోసథగ్గమ్పి సన్నిసజ్జమ్పి గచ్ఛన్తా అన్ధకారే ఖాణుమ్పి కణ్టకమ్పి అక్కమన్తి; పాదా దుక్ఖా హోన్తి. భగవతో ఏతమత్థం ఆరోచేసుం. అనుజానామి, భిక్ఖవే, అజ్ఝారామే ఉపాహనం ధారేతుం, ఉక్కం, పదీపం, కత్తరదణ్డన్తి.

అజ్ఝారామే ఉపాహనపటిక్ఖేపో నిట్ఠితో.