౧౪౯. సబ్బనీలికాదిపటిక్ఖేపో

౨౪౬. తేన ఖో పన సమయేన ఛబ్బగ్గియా భిక్ఖూ సబ్బనీలికా ఉపాహనాయో ధారేన్తి…పే… సబ్బపీతికా ఉపాహనాయో ధారేన్తి… సబ్బలోహితికా ఉపాహనాయో ధారేన్తి… సబ్బమఞ్జిట్ఠికా [సబ్బమఞ్జేట్ఠికా (క.)] ఉపాహనాయో ధారేన్తి … సబ్బకణ్హా ఉపాహనాయో ధారేన్తి… సబ్బమహారఙ్గరత్తా ఉపాహనాయో ధారేన్తి… సబ్బమహానామరత్తా ఉపాహనాయో ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి, ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, సబ్బనీలికా ఉపాహనా ధారేతబ్బా…పే… న సబ్బపీతికా ఉపాహనా ధారేతబ్బా, న సబ్బలోహితికా ఉపాహనా ధారేతబ్బా, న సబ్బమఞ్జిట్ఠికా ఉపాహనా ధారేతబ్బా, న సబ్బకణ్హా ఉపాహనా ధారేతబ్బా, న సబ్బమహారఙ్గరత్తా ఉపాహనా ధారేతబ్బా, న సబ్బమహానామరత్తా ఉపాహనా ధారేతబ్బా. యో ధారేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ నీలకవద్ధికా [వట్టికా (సీ.)] ఉపాహనాయో ధారేన్తి, పీతకవద్ధికా ఉపాహనాయో ధారేన్తి, లోహితకవద్ధికా ఉపాహనాయో ధారేన్తి, మఞ్జిట్ఠికవద్ధికా ఉపాహనాయో ధారేన్తి, కణ్హవద్ధికా ఉపాహనాయో ధారేన్తి, మహారఙ్గరత్తవద్ధికా ఉపాహనాయో ధారేన్తి, మహానామరత్తవద్ధికా ఉపాహనాయో ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి, ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, నీలకవద్ధికా ఉపాహనా ధారేతబ్బా…పే… న పీతకవద్ధికా ఉపాహనా ధారేతబ్బా, న లోహితకవద్ధికా ఉపాహనా ధారేతబ్బా, న మఞ్జిట్ఠికవద్ధికా ఉపాహనా ధారేతబ్బా, న కణ్హవద్ధికా ఉపాహనా ధారేతబ్బా, న మహారఙ్గరత్తవద్ధికా ఉపాహనా ధారేతబ్బా, న మహానామరత్తవద్ధికా ఉపాహనా ధారేతబ్బా. యో ధారేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ ఖల్లకబద్ధా […బన్ధా (క.)] ఉపాహనాయో ధారేన్తి…పే… పుటబద్ధా ఉపాహనాయో ధారేన్తి, పాలిగుణ్ఠిమా ఉపాహనాయో ధారేన్తి, తూలపుణ్ణికా ఉపాహనాయో ధారేన్తి, తిత్తిరపత్తికా ఉపాహనాయో ధారేన్తి, మేణ్డవిసాణవద్ధికా ఉపాహనాయో ధారేన్తి, అజవిసాణవద్ధికా ఉపాహనాయో ధారేన్తి, విచ్ఛికాళికా ఉపాహనాయో ధారేన్తి, మోరపిఞ్ఛ [మోరపిఞ్జ (సీ. స్యా.)] పరిసిబ్బితా ఉపాహనాయో ధారేన్తి, చిత్రా ఉపాహనాయో ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి, ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, ఖల్లకబద్ధా ఉపాహనా ధారేతబ్బా…పే… న పుటబద్ధా ఉపాహనా ధారేతబ్బా, న పాలిగుణ్ఠిమా ఉపాహనా ధారేతబ్బా, న తూలపుణ్ణికా ఉపాహనా ధారేతబ్బా, న తిత్తిరపత్తికా ఉపాహనా ధారేతబ్బా, న మేణ్డవిసాణవద్ధికా ఉపాహనా ధారేతబ్బా, న అజవిసాణవద్ధికా ఉపాహనా ధారేతబ్బా, న విచ్ఛికాళికా ఉపాహనా ధారేతబ్బా, న మోరపిఞ్ఛపరిసిబ్బితా ఉపాహనా ధారేతబ్బా, న చిత్రా ఉపాహనా ధారేతబ్బా. యో ధారేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ సీహచమ్మపరిక్ఖటా ఉపాహనాయో ధారేన్తి…పే… బ్యగ్ఘచమ్మపరిక్ఖటా ఉపాహనాయో ధారేన్తి, దీపిచమ్మపరిక్ఖటా ఉపాహనాయో ధారేన్తి, అజినచమ్మపరిక్ఖటా ఉపాహనాయో ధారేన్తి, ఉద్దచమ్మపరిక్ఖటా ఉపాహనాయో ధారేన్తి, మజ్జారచమ్మపరిక్ఖటా ఉపాహనాయో ధారేన్తి, కాళకచమ్మపరిక్ఖటా ఉపాహనాయో ధారేన్తి, లువకచమ్మపరిక్ఖటా [ఉలూకచమ్మపరిక్ఖటా (యోజనా)] ఉపాహనాయో ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి, ‘‘సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, సీహచమ్మపరిక్ఖటా ఉపాహనా ధారేతబ్బా…పే… న బ్యగ్ఘచమ్మపరిక్ఖటా ఉపాహనా ధారేతబ్బా, న దీపిచమ్మపరిక్ఖటా ఉపాహనా ధారేతబ్బా, న అజినచమ్మపరిక్ఖటా ఉపాహనా ధారేతబ్బా, న ఉద్దచమ్మపరిక్ఖటా ఉపాహనా ధారేతబ్బా, న మజ్జారచమ్మపరిక్ఖటా ఉపాహనా ధారేతబ్బా, న కాళకచమ్మపరిక్ఖటా ఉపాహనా ధారేతబ్బా, న లువకచమ్మపరిక్ఖటా ఉపాహనా ధారేతబ్బా. యో ధారేయ్య, ఆపత్తి దుక్కటస్సాతి.

సబ్బనీలికాదిపటిక్ఖేపో నిట్ఠితో.