౧౪౮. దిగుణాదిఉపాహనపటిక్ఖేపో

౨౪౫. అథ ఖో భగవా భిక్ఖూ ఆమన్తేసి – ‘‘ఏవం ఖో, భిక్ఖవే, కులపుత్తా అఞ్ఞం బ్యాకరోన్తి, అత్థో చ వుత్తో, అత్తా చ అనుపనీతో. అథ చ, పనిధేకచ్చే మోఘపురిసా హసమానకం, మఞ్ఞే, అఞ్ఞం బ్యాకరోన్తి, తే పచ్ఛా విఘాతం ఆపజ్జన్తీ’’తి. అథ ఖో భగవా ఆయస్మన్తం సోణం ఆమన్తేసి – ‘‘త్వం ఖోసి, సోణ, సుఖుమాలో. అనుజానామి తే, సోణ, ఏకపలాసికం ఉపాహన’’న్తి. ‘‘అహం ఖో, భన్తే, అసీతిసకటవాహే హిరఞ్ఞం ఓహాయ అగారస్మా అనగారియం పబ్బజితో, సత్తహత్థికఞ్చ అనీకం. అథాహం భన్తే ఏకపలాసికం చే ఉపాహనం పరిహరిస్సామి, తస్స మే భవిస్సన్తి వత్తారో ‘సోణో కోళివిసో అసీతిసకటవాహే హిరఞ్ఞం ఓహాయ అగారస్మా అనగారియం పబ్బజితో, సత్తహత్థికఞ్చ అనీకం. సో దానాయం ఏకపలాసికాసు ఉపాహనాసు సత్తో’తి. సచే భగవా భిక్ఖుసఙ్ఘస్స అనుజానిస్సతి అహమ్పి పరిభుఞ్జిస్సామి; నో చే భగవా భిక్ఖుసఙ్ఘస్స అనుజానిస్సతి, అహమ్పి న పరిభుఞ్జిస్సామీ’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, ఏకపలాసికం ఉపాహనం. న, భిక్ఖవే, దిగుణా ఉపాహనా ధారేతబ్బా. న తిగుణా ఉపాహనా ధారేతబ్బా. న గుణఙ్గుణూపాహనా [గణఙ్గణూపాహనా (బహూసు)] ధారేతబ్బా. యో ధారేయ్య, ఆపత్తి దుక్కటస్సా’’తి.

దిగుణాదిఉపాహనపటిక్ఖేపో నిట్ఠితో.