౧౪౭. సోణకోళివిసవత్థు

౨౪౨. తేన సమయేన బుద్ధో భగవా రాజగహే విహరతి గిజ్ఝకూటే పబ్బతే. తేన ఖో పన సమయేన రాజా మాగధో సేనియో బిమ్బిసారో అసీతియా గామసహస్సేసు ఇస్సరియాధిపచ్చం రజ్జం కారేతి. తేన ఖో పన సమయేన చమ్పాయం సోణో నామ కోళివిసో [కోళివీసో (సీ.)] సేట్ఠిపుత్తో సుఖుమాలో హోతి. తస్స పాదతలేసు లోమాని జాతాని హోన్తి. అథ ఖో రాజా మాగధో సేనియో బిమ్బిసారో తాని అసీతి గామికసహస్సాని సన్నిపాతాపేత్వా కేనచిదేవ కరణీయేన సోణస్స కోళివిసస్స సన్తికే దూతం పాహేసి – ఆగచ్ఛతు సోణో, ఇచ్ఛామి సోణస్స ఆగతన్తి. అథ ఖో సోణస్స కోళివిసస్స మాతాపితరో సోణం కోళివిసం ఏతదవోచుం – ‘‘రాజా తే, తాత సోణ, పాదే దక్ఖితుకామో. మా ఖో త్వం, తాత సోణ, యేన రాజా తేన పాదే అభిప్పసారేయ్యాసి. రఞ్ఞో పురతో పల్లఙ్కేన నిసీద. నిసిన్నస్స తే రాజా పాదే దక్ఖిస్సతీ’’తి. అథ ఖో సోణం కోళివిసం సివికాయ ఆనేసుం. అథ ఖో సోణో కోళివిసో యేన రాజా మాగధో సేనియో బిమ్బిసారో తేనుపసఙ్కమి, ఉపసఙ్కమిత్వా రాజానం మాగధం సేనియం బిమ్బిసారం అభివాదేత్వా రఞ్ఞో పురతో పల్లఙ్కేన నిసీది. అద్దసా ఖో రాజా మాగధో సేనియో బిమ్బిసారో సోణస్స కోళివిసస్స పాదతలేసు లోమాని జాతాని. అథ ఖో రాజా మాగధో సేనియో బిమ్బిసారో తాని అసీతి గామికసహస్సాని దిట్ఠధమ్మికే అత్థే అనుసాసిత్వా ఉయ్యోజేసి – ‘‘తుమ్హే ఖ్వత్థ, భణే, మయా దిట్ఠధమ్మికే అత్థే అనుసాసితా; గచ్ఛథ, తం భగవన్తం పయిరుపాసథ; సో నో భగవా సమ్పరాయికే అత్థే అనుసాసిస్సతీ’’తి.

అథ ఖో తాని అసీతి గామికసహస్సాని యేన గిజ్ఝకూటో పబ్బతో తేనుపసఙ్కమింసు. తేన ఖో పన సమయేన ఆయస్మా సాగతో భగవతో ఉపట్ఠాకో హోతి. అథ ఖో తాని అసీతి గామికసహస్సాని యేనాయస్మా సాగతో తేనుపసఙ్కమింసు, ఉపసఙ్కమిత్వా ఆయస్మన్తం సాగతం ఏతదవోచుం – ‘‘ఇమాని, భన్తే, అసీతి గామికసహస్సాని ఇధూపసఙ్కన్తాని భగవన్తం దస్సనాయ; సాధు మయం, భన్తే, లభేయ్యామ భగవన్తం దస్సనాయా’’తి. ‘‘తేన హి తుమ్హే ఆయస్మన్తో ముహుత్తం ఇధేవ తావ హోథ, యావాహం భగవన్తం పటివేదేమీ’’తి. అథ ఖో ఆయస్మా సాగతో తేసం అసీతియా గామికసహస్సానం పురతో పేక్ఖమానానం పాటికాయ నిముజ్జిత్వా భగవతో పురతో ఉమ్ముజ్జిత్వా భగవన్తం ఏతదవోచ – ‘‘ఇమాని, భన్తే, అసీతి గామికసహస్సాని ఇధూపసఙ్కన్తాని భగవన్తం దస్సనాయ; యస్స దాని, భన్తే, భగవా కాలం మఞ్ఞతీ’’తి. ‘‘తేన హి త్వం, సాగత, విహారపచ్ఛాయాయం ఆసనం పఞ్ఞపేహీ’’తి. ‘‘ఏవం, భన్తే’’తి ఖో ఆయస్మా సాగతో భగవతో పటిస్సుణిత్వా పీఠం గహేత్వా భగవతో పురతో నిముజ్జిత్వా తేసం అసీతియా గామికసహస్సానం పురతో పేక్ఖమానానం పాటికాయ ఉమ్ముజ్జిత్వా విహారపచ్ఛాయాయం ఆసనం పఞ్ఞపేతి. అథ ఖో భగవా విహారా నిక్ఖమిత్వా విహారపచ్ఛాయాయం పఞ్ఞత్తే ఆసనే నిసీది. అథ ఖో తాని అసీతి గామికసహస్సాని యేన భగవా తేనుపసఙ్కమింసు, ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. అథ ఖో తాని అసీతి గామికసహస్సాని ఆయస్మన్తంయేవ సాగతం సమన్నాహరన్తి, నో తథా భగవన్తం. అథ ఖో భగవా తేసం అసీతియా గామికసహస్సానం చేతసా చేతోపరివితక్కమఞ్ఞాయ ఆయస్మన్తం సాగతం ఆమన్తేసి – ‘‘తేన హి త్వం, సాగత, భియ్యోసోమత్తాయ ఉత్తరిమనుస్సధమ్మం ఇద్ధిపాటిహారియం దస్సేహీ’’తి. ‘‘ఏవం, భన్తే’’తి ఖో ఆయస్మా సాగతో భగవతో పటిస్సుణిత్వా వేహాసం అబ్భుగ్గన్త్వా ఆకాసే అన్తలిక్ఖే చఙ్కమతిపి, తిట్ఠతిపి, నిసీదతిపి, సేయ్యమ్పి కప్పేతి, ధూమాయతిపి [ధూపాయతిపి (సీ.), పధూపాయతిపి (స్యా.)] పజ్జలతిపి, అన్తరధాయతిపి. అథ ఖో ఆయస్మా సాగతో ఆకాసే అన్తలిక్ఖే అనేకవిహితం ఉత్తరిమనుస్సధమ్మం ఇద్ధిపాటిహారియం దస్సేత్వా భగవతో పాదేసు సిరసా నిపతిత్వా భగవన్తం ఏతదవోచ – ‘‘సత్థా మే, భన్తే, భగవా; సావకోహమస్మి. సత్థా మే, భన్తే, భగవా; సావకోహమస్మీ’’తి. అథ ఖో తాని అసీతి గామికసహస్సాని ‘‘అచ్ఛరియం వత భో! అబ్భుతం వత భో! సావకోపి నామ ఏవం మహిద్ధికో భవిస్సతి, ఏవం మహానుభావో, అహో నూన సత్థా’’తి భగవన్తంయేవ సమన్నాహరన్తి, నో తథా ఆయస్మన్తం సాగతం.

అథ ఖో భగవా తేసం అసీతియా గామికసహస్సానం చేతసా చేతోపరివితక్కమఞ్ఞాయ అనుపుబ్బిం కథం కథేసి, సేయ్యథిదం – దానకథం సీలకథం సగ్గకథం, కామానం ఆదీనవం ఓకారం సంకిలేసం, నేక్ఖమ్మే ఆనిసంసం పకాసేసి. యదా తే భగవా అఞ్ఞాసి కల్లచిత్తే, ముదుచిత్తే, వినీవరణచిత్తే, ఉదగ్గచిత్తే, పసన్నచిత్తే, అథ యా బుద్ధానం సాముక్కంసికా ధమ్మదేసనా, తం పకాసేసి – దుక్ఖం, సముదయం, నిరోధం, మగ్గం. సేయ్యథాపి నామ సుద్ధం వత్థం అపగతకాళకం సమ్మదేవ రజనం పటిగ్గణ్హేయ్య, ఏవమేవం తేసం అసీతియా గామికసహస్సానం తస్మింయేవ ఆసనే విరజం వీతమలం ధమ్మచక్ఖుం ఉదపాది – ‘‘యంకిఞ్చి సముదయధమ్మం, సబ్బం తం నిరోధధమ్మ’’న్తి. తే దిట్ఠధమ్మా పత్తధమ్మా విదితధమ్మా పరియోగాళ్హధమ్మా తిణ్ణవిచికిచ్ఛా విగతకథంకథా వేసారజ్జప్పత్తా అపరప్పచ్చయా సత్థుసాసనే భగవన్తం ఏతదవోచుం – ‘‘అభిక్కన్తం, భన్తే, అభిక్కన్తం, భన్తే. సేయ్యథాపి, భన్తే, నిక్కుజ్జితం వా ఉక్కుజ్జేయ్య, పటిచ్ఛన్నం వా వివరేయ్య, మూళ్హస్స వా మగ్గం ఆచిక్ఖేయ్య, అన్ధకారే వా తేలపజ్జోతం ధారేయ్య – ‘‘చక్ఖుమన్తో రూపాని దక్ఖన్తీ’’తి, ఏవమేవం భగవతా అనేకపరియాయేన ధమ్మో పకాసితో. ఏతే మయం, భన్తే, భగవన్తం సరణం గచ్ఛామ. ధమ్మఞ్చ, భిక్ఖుసఙ్ఘఞ్చ. ఉపాసకే నో భగవా ధారేతు అజ్జతగ్గే పాణుపేతే సరణం గతే’’తి.

సోణస్స పబ్బజ్జా

౨౪౩. అథ ఖో సోణస్స కోళివిసస్స ఏతదహోసి ‘‘యథా యథా ఖో అహం భగవతా ధమ్మం దేసితం ఆజానామి, నయిదం సుకరం అగారం అజ్ఝావసతా ఏకన్తపరిపుణ్ణం ఏకన్తపరిసుద్ధం సఙ్ఖలిఖితం బ్రహ్మచరియం చరితుం; యంనూనాహం కేసమస్సుం ఓహారేత్వా కాసాయాని వత్థాని అచ్ఛాదేత్వా అగారస్మా అనగారియం పబ్బజేయ్య’’న్తి. అథ ఖో తాని అసీతి గామికసహస్సాని భగవతో భాసితం అభినన్దిత్వా అనుమోదిత్వా ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కమిసుం. అథ ఖో సోణో కోళివిసో అచిరపక్కన్తేసు తేసు అసీతియా గామికసహస్సేసు యేన భగవా తేనుపసఙ్కమి, ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సోణో కోళివిసో భగవన్తం ఏతదవోచ – ‘‘యథా యథాహం, భన్తే, భగవతా ధమ్మం దేసితం ఆజానామి, నయిదం సుకరం అగారం అజ్ఝావసతా ఏకన్తపరిపుణ్ణం ఏకన్తపరిసుద్ధం సఙ్ఖలిఖితం బ్రహ్మచరియం చరితుం. ఇచ్ఛామహం, భన్తే, కేసమస్సుం ఓహారేత్వా కాసాయాని వత్థాని అచ్ఛాదేత్వా అగారస్మా అనగారియం పబ్బజితుం. పబ్బాజేతు మం, భన్తే, భగవా’’తి. అలత్థ ఖో సోణో కోళివిసో భగవతో సన్తికే పబ్బజ్జం, అలత్థ ఉపసమ్పదం. అచిరుపసమ్పన్నో చ పనాయస్మా సోణో సీతవనే విహరతి. తస్స అచ్చారద్ధవీరియస్స చఙ్కమతో పాదా భిజ్జింసు. చఙ్కమో లోహితేన ఫుటో హోతి, సేయ్యథాపి గవాఘాతనం. [ఇతో పరం యావ ఇమస్స వత్థుస్స అవసానం తావ పాఠో అ. ని. ౬.౫౫ ఆదయో] అథ ఖో ఆయస్మతో సోణస్స రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘యే ఖో కేచి భగవతో సావకా ఆరద్ధవీరియా విహరన్తి, అహం తేసం అఞ్ఞతరో. అథ చ పన మే నానుపాదాయ ఆసవేహి చిత్తం విముచ్చతి. సంవిజ్జన్తి ఖో పన మే కులే భోగా; సక్కా భోగే చ భుఞ్జితుం, పుఞ్ఞాని చ కాతుం. యంనూనాహం హీనాయావత్తిత్వా భోగే చ భుఞ్జేయ్యం, పుఞ్ఞాని చ కరేయ్య’’న్తి. అథ ఖో భగవా ఆయస్మతో సోణస్స చేతసా చేతోపరివితక్కమఞ్ఞాయ – సేయ్యథాపి నామ బలవా పురిసో సమిఞ్జితం వా బాహం పసారేయ్య, పసారితం వా బాహం సమిఞ్జేయ్య ఏవమేవ – గిజ్ఝకూటే పబ్బతే అన్తరహితో సీతవనే పాతురహోసి. అథ ఖో భగవా సమ్బహులేహి భిక్ఖూహి సద్ధిం సేనాసనచారికం ఆహిణ్డన్తో యేనాయస్మతో సోణస్స చఙ్కమో తేనుపసఙ్కమి. అద్దసా ఖో భగవా ఆయస్మతో సోణస్స చఙ్కమం లోహితేన ఫుటం, దిస్వాన భిక్ఖూ ఆమన్తేసి – ‘‘కస్స న్వాయం, భిక్ఖవే, చఙ్కమో లోహితేన ఫుటో, సేయ్యథాపి గవాఘాతన’’న్తి? ‘‘ఆయస్మతో, భన్తే, సోణస్స అచ్చారద్ధవీరియస్స చఙ్కమతో పాదా భిజ్జింసు. తస్సాయం చఙ్కమో లోహితేన ఫుటో, సేయ్యథాపి గవాఘాతన’’న్తి.

అథ ఖో భగవా యేనాయస్మతో సోణస్స విహారో తేనుపసఙ్కమి, ఉపసఙ్కమిత్వా పఞ్ఞత్తే ఆసనే నిసీది. ఆయస్మాపి ఖో సోణో భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం సోణం భగవా ఏతదవోచ – ‘‘నను తే, సోణ, రహోగతస్స పటిసల్లీనస్స ఏవం చేతసో పరివితక్కో ఉదపాది – ‘యే ఖో కేచి భగవతో సావకా ఆరద్ధవీరియా విహరన్తి, అహం తేసం అఞ్ఞతరో. అథ చ పన మే నానుపాదాయ ఆసవేహి చిత్తం విముచ్చతి. సంవిజ్జన్తి ఖో పన మే కులే భోగా; సక్కా భోగే చ భుఞ్జితుం, పుఞ్ఞాని చ కాతుం. యంనూనాహం హీనాయావత్తిత్వా భోగే చ భుఞ్జేయ్యం, పుఞ్ఞాని చ కరేయ్య’’’న్తి? ‘‘ఏవం, భన్తే’’తి. ‘‘తం కిం మఞ్ఞసి, సోణ, కుసలో త్వం పుబ్బే అగారికభూతో వీణాయ తన్తిస్సరే’’తి? ‘‘ఏవం, భన్తే’’తి. ‘‘తం కిం మఞ్ఞసి, సోణ, యదా తే వీణాయ తన్తియో అచ్చాయతా హోన్తి, అపి ను తే వీణా తస్మిం సమయే సరవతీ వా హోతి, కమ్మఞ్ఞా వా’’తి? ‘‘నో హేతం, భన్తే’’తి. ‘‘తం కిం మఞ్ఞసి, సోణ, యదా తే వీణాయ తన్తియో అతిసిథిలా హోన్తి, అపి ను తే వీణా తస్మిం సమయే సరవతీ వా హోతి, కమ్మఞ్ఞా వా’’తి? ‘‘నో హేతం, భన్తే’’తి. ‘‘తం కిం మఞ్ఞసి, సోణ, యదా తే వీణాయ తన్తియో నేవ అచ్చాయతా హోన్తి నాతిసిథిలా, సమే గుణే పతిట్ఠితా, అపి ను తే వీణా తస్మిం సమయే సరవతీ వా హోతి, కమ్మఞ్ఞా వా’’తి? ‘‘ఏవం, భన్తే’’తి. ‘‘ఏవమేవ ఖో, సోణ, అచ్చారద్ధవీరియం ఉద్ధచ్చాయ సంవత్తతి, అతిలీనవీరియం కోసజ్జాయ సంవత్తతి. తస్మాతిహ త్వం, సోణ, వీరియసమతం అధిట్ఠహ, ఇన్ద్రియానఞ్చ సమతం పటివిజ్ఝ, తత్థ చ నిమిత్తం గణ్హాహీ’’తి. ‘‘ఏవం, భన్తే’’తి ఖో ఆయస్మా సోణో భగవతో పచ్చస్సోసి. అథ ఖో భగవా ఆయస్మన్తం సోణం ఇమినా ఓవాదేన ఓవదిత్వా – సేయ్యథాపి నామ బలవా పురిసో సమ్మిఞ్జితం వా బాహం పసారేయ్య, పసారితం వా బాహం సమిఞ్జేయ్య ఏవమేవ – సీతవనే ఆయస్మతో సోణస్స సమ్ముఖే అన్తరహితో గిజ్ఝకూటే పబ్బతే పాతురహోసి. అథ ఖో ఆయస్మా సోణో అపరేన సమయేన వీరియసమతం అధిట్ఠాసి, ఇన్ద్రియానఞ్చ సమతం పటివిజ్ఝి, తత్థ చ నిమిత్తం అగ్గహేసి. అథ ఖో ఆయస్మా సోణో, ఏకో వూపకట్ఠో అప్పమత్తో ఆతాపీ పహితత్తో విహరన్తో, న చిరస్సేవ – యస్సత్థాయ కులపుత్తా సమ్మదేవ అగారస్మా అనగారియం పబ్బజన్తి – తదనుత్తరం బ్రహ్మచరియపరియోసానం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహాసి. ‘ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయా’తి అభిఞ్ఞాసి. అఞ్ఞతరో చ పనాయస్మా సోణో అరహతం అహోసి.

౨౪౪. అథ ఖో ఆయస్మతో సోణస్స అరహత్తప్పత్తస్స ఏతదహోసి – ‘‘యంనూనాహం భగవతో సన్తికే అఞ్ఞం బ్యాకరేయ్య’’న్తి. అథ ఖో ఆయస్మా సోణో యేన భగవా తేనుపసఙ్కమి, ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా సోణో భగవన్తం ఏతదవోచ – యో సో, భన్తే, భిక్ఖు అరహం ఖీణాసవో వుసితవా కతకరణీయో ఓహితభారో అనుప్పత్తసదత్థో పరిక్ఖీణభవసఞ్ఞోజనో సమ్మదఞ్ఞా విముత్తో, సో ఛట్ఠానాని అధిముత్తో హోతి – నేక్ఖమ్మాధిముత్తో హోతి, పవివేకాధిముత్తో హోతి, అబ్యాపజ్జాధిముత్తో హోతి, ఉపాదానక్ఖయాధిముత్తో హోతి, తణ్హక్ఖయాధిముత్తో హోతి, అసమ్మోహాధిముత్తో హోతి.

‘‘సియా ఖో పన, భన్తే, ఇధేకచ్చస్స ఆయస్మతో ఏవమస్స – ‘కేవలం సద్ధామత్తకం నూన అయమాయస్మా నిస్సాయ నేక్ఖమ్మాధిముత్తో’తి, న ఖో పనేతం, భన్తే, ఏవం దట్ఠబ్బం. ఖీణాసవో, భన్తే, భిక్ఖు, వుసితవా, కతకరణీయో, కరణీయమత్తానం అసమనుపస్సన్తో కతస్స వా పటిచయం ఖయా రాగస్స వీతరాగత్తా నేక్ఖమ్మాధిముత్తో హోతి, ఖయా దోసస్స వీతదోసత్తా నేక్ఖమ్మాధిముత్తో హోతి, ఖయా మోహస్స వీతమోహత్తా నేక్ఖమ్మాధిముత్తో హోతి.

‘‘సియా ఖో పన, భన్తే, ఇధేకచ్చస్స ఆయస్మతో ఏవమస్స – ‘లాభసక్కారసిలోకం నూన అయమాయస్మా నికామయమానో పవివేకాధిముత్తో’తి. న ఖో పనేతం, భన్తే, ఏవం దట్ఠబ్బం. ఖీణాసవో, భన్తే, భిక్ఖు, వుసితవా, కతకరణీయో, కరణీయమత్తానం [కరణీయం అత్తనో (అఙ్గుత్తరపాళియం)] అసమనుపస్సన్తో కతస్స వా పటిచయం, ఖయా రాగస్స వీతరాగత్తా పవివేకాధిముత్తో హోతి, ఖయా దోసస్స వీతదోసత్తా పవివేకాధిముత్తో హోతి, ఖయా మోహస్స వీతమోహత్తా పవివేకాధిముత్తో హోతి.

‘‘సియా ఖో పన, భన్తే, ఇధేకచ్చస్స ఆయస్మతో ఏవమస్స – ‘సీలబ్బతపరామాసం నూన అయమాయస్మా సారతో పచ్చాగచ్ఛన్తో అబ్యాపజ్జాధిముత్తో’తి. న ఖో పనేతం, భన్తే, ఏవం దట్ఠబ్బం. ఖీణాసవో, భన్తే, భిక్ఖు, వుసితవా, కతకరణీయో, కరణీయమత్తానం అసమనుపస్సన్తో కతస్స వా పటిచయం, ఖయా రాగస్స వీతరాగత్తా అబ్యాపజ్జాధిముత్తో హోతి, ఖయా దోసస్స వీతదోసత్తా అబ్యాపజ్జాధిముత్తో హోతి, ఖయా మోహస్స వీతమోహత్తా అబ్యాపజ్జాధిముత్తో హోతి.

‘‘ఖయా రాగస్స వీతరాగత్తా ఉపాదానక్ఖయాధిముత్తో హోతి, ఖయా దోసస్స వీతదోసత్తా ఉపాదానక్ఖయాధిముత్తో హోతి, ఖయా మోహస్స వీతమోహత్తా ఉపాదానక్ఖయాధిముత్తో హోతి.

‘‘ఖయా రాగస్స వీతరాగత్తా తణ్హక్ఖయాధిముత్తో హోతి, ఖయా దోసస్స వీతదోసత్తా తణ్హక్ఖయాధిముత్తో హోతి, ఖయా మోహస్స వీతమోహత్తా తణ్హక్ఖయాధిముత్తో హోతి.

‘‘ఖయా రాగస్స వీతరాగత్తా అసమ్మోహాధిముత్తో హోతి, ఖయా దోసస్స వీతదోసత్తా అసమ్మోహాధిముత్తో హోతి, ఖయా మోహస్స వీతమోహత్తా అసమ్మోహాధిముత్తో హోతి.

‘‘ఏవం సమ్మా విముత్తచిత్తస్స, భన్తే, భిక్ఖునో భుసా చేపి చక్ఖువిఞ్ఞేయ్యా రూపా చక్ఖుస్స ఆపాథం ఆగచ్ఛన్తి, నేవస్స చిత్తం పరియాదియన్తి. అమిస్సీకతమేవస్స చిత్తం హోతి, ఠితం, ఆనేఞ్జప్పత్తం, వయఞ్చస్సానుపస్సతి. భుసా చేపి సోతవిఞ్ఞేయ్యా సద్దా…పే… ఘానవిఞ్ఞేయ్యా గన్ధా… జివ్హావిఞ్ఞేయ్యా రసా… కాయవిఞ్ఞేయ్యా ఫోట్ఠబ్బా… మనోవిఞ్ఞేయ్యా ధమ్మా మనస్స ఆపాథం ఆగచ్ఛన్తి, నేవస్స చిత్తం పరియాదియన్తి; అమిస్సీకతమేవస్స చిత్తం హోతి, ఠితం, ఆనేఞ్జప్పత్తం, వయఞ్చస్సానుపస్సతి. సేయ్యథాపి, భన్తే, సేలో పబ్బతో అచ్ఛిద్దో అసుసిరో ఏకగ్ఘనో, పురత్థిమాయ చేపి దిసాయ ఆగచ్ఛేయ్య భుసా వాతవుట్ఠి, నేవ నం సఙ్కమ్పేయ్య న సమ్పకమ్పేయ్య న సమ్పవేధేయ్య; పచ్ఛిమాయ చేపి దిసాయ ఆగచ్ఛేయ్య భుసా వాతవుట్ఠి…పే… ఉత్తరాయ చేపి దిసాయ…పే… దక్ఖిణాయ చేపి దిసాయ ఆగచ్ఛేయ్య భుసా వాతవుట్ఠి, నేవ నం సఙ్కమ్పేయ్య న సమ్పకమ్పేయ్య న సమ్పవేధేయ్య, ఏవమేవ ఖో, భన్తే, ఏవం సమ్మా విముత్తచిత్తస్స భిక్ఖునో భుసా చేపి చక్ఖువిఞ్ఞేయ్యా రూపా చక్ఖుస్స ఆపాథం ఆగచ్ఛన్తి, నేవస్స చిత్తం పరియాదియన్తి; అమిస్సీకతమేవస్స చిత్తం హోతి, ఠితం, ఆనేఞ్జప్పత్తం, వయఞ్చస్సానుపస్సతి. భుసా చేపి సోతవిఞ్ఞేయ్యా సద్దా…పే… ఘానవిఞ్ఞేయ్యా గన్ధా… జివ్హావిఞ్ఞేయ్యా రసా… కాయవిఞ్ఞేయ్యా ఫోట్ఠబ్బా… మనోవిఞ్ఞేయ్యా ధమ్మా మనస్స ఆపాథం ఆగచ్ఛన్తి, నేవస్స చిత్తం పరియాదియన్తి; అమిస్సీకతమేవస్స చిత్తం హోతి, ఠితం, ఆనేఞ్జప్పత్తం, వయఞ్చస్సానుపస్సతీ’’తి.

నేక్ఖమ్మం అధిముత్తస్స, పవివేకఞ్చ చేతసో;

అబ్యాపజ్జాధిముత్తస్స, ఉపాదానక్ఖయస్స చ.

తణ్హక్ఖయాధిముత్తస్స, అసమ్మోహఞ్చ చేతసో;

దిస్వా ఆయతనుప్పాదం, సమ్మా చిత్తం విముచ్చతి.

తస్స సమ్మావిముత్తస్స, సన్తచిత్తస్స భిక్ఖునో;

కతస్స పటిచయో నత్థి, కరణీయం న విజ్జతి.

సేలో యథా ఏకగ్ఘనో, వాతేన న సమీరతి;

ఏవం రూపా రసా సద్దా, గన్ధా ఫస్సా చ కేవలా.

ఇట్ఠా ధమ్మా అనిట్ఠా చ, న పవేధేన్తి తాదినో;

ఠితం చిత్తం విప్పముత్తం, వయఞ్చస్సానుపస్సతీతి.

సోణకోళివిసవత్థు నిట్ఠితం.