౧౪౩. వత్థుఠపనాది

౨౩౯. ఇధ పన, భిక్ఖవే, భిక్ఖు తదహు పవారణాయ సఙ్ఘమజ్ఝే ఉదాహరేయ్య – ‘‘సుణాతు మే, భన్తే, సఙ్ఘో. ఇదం వత్థు పఞ్ఞాయతి, న పుగ్గలో. యది సఙ్ఘస్స పత్తకల్లం, వత్థుం ఠపేత్వా సఙ్ఘో పవారేయ్యా’’తి. సో ఏవమస్స వచనీయో – ‘‘భగవతా ఖో, ఆవుసో, విసుద్ధానం పవారణా పఞ్ఞత్తా. సచే వత్థు పఞ్ఞాయతి, న పుగ్గలో, ఇదానేవ నం వదేహీ’’తి.

ఇధ పన, భిక్ఖవే, భిక్ఖు తదహు పవారణాయ సఙ్ఘమజ్ఝే ఉదాహరేయ్య – ‘‘సుణాతు మే, భన్తే, సఙ్ఘో. అయం పుగ్గలో పఞ్ఞాయతి, న వత్థు. యది సఙ్ఘస్స పత్తకల్లం, పుగ్గలం ఠపేత్వా సఙ్ఘో పవారేయ్యా’’తి. సో ఏవమస్స వచనీయో – ‘‘భగవతా ఖో, ఆవుసో, సమగ్గానం పవారణా పఞ్ఞత్తా. సచే పుగ్గలో పఞ్ఞాయతి, న వత్థు, ఇదానేవ నం వదేహీ’’తి.

ఇధ పన, భిక్ఖవే, భిక్ఖు తదహు పవారణాయ సఙ్ఘమజ్ఝే ఉదాహరేయ్య – ‘‘సుణాతు మే, భన్తే, సఙ్ఘో. ఇదం వత్థు చ పుగ్గలో చ పఞ్ఞాయతి. యది సఙ్ఘస్స పత్తకల్లం, వత్థుఞ్చ పుగ్గలఞ్చ ఠపేత్వా సఙ్ఘో పవారేయ్యా’’తి. సో ఏవమస్స వచనీయో – ‘‘భగవతా ఖో, ఆవుసో, విసుద్ధానఞ్చ సమగ్గానఞ్చ పవారణా పఞ్ఞత్తా. సచే వత్థు చ పుగ్గలో చ పఞ్ఞాయతి, ఇదానేవ నం వదేహీ’’తి.

పుబ్బే చే, భిక్ఖవే, పవారణాయ వత్థు పఞ్ఞాయతి, పచ్ఛా పుగ్గలో, కల్లం వచనాయ. పుబ్బే చే, భిక్ఖవే, పవారణాయ పుగ్గలో పఞ్ఞాయతి, పచ్ఛా వత్థు, కల్లం వచనాయ. పుబ్బే చే, భిక్ఖవే, పవారణాయ వత్థు చ పుగ్గలో చ పఞ్ఞాయతి, తం చే కతాయ పవారణాయ ఉక్కోటేతి, ఉక్కోటనకం పాచిత్తియన్తి.

వత్థుఠపనాది నిట్ఠితా.