౧౪౪. భణ్డనకారకవత్థు

౨౪౦. తేన ఖో పన సమయేన సమ్బహులా సన్దిట్ఠా సమ్భత్తా భిక్ఖూ కోసలేసు జనపదే అఞ్ఞతరస్మిం ఆవాసే వస్సం ఉపగచ్ఛింసు. తేసం సామన్తా అఞ్ఞే భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా వస్సం ఉపగచ్ఛింసు – మయం తేసం భిక్ఖూనం వస్సంవుట్ఠానం పవారణాయ పవారణం ఠపేస్సామాతి. అస్సోసుం ఖో తే భిక్ఖూ – ‘‘అమ్హాకం కిర సామన్తా అఞ్ఞే భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా వస్సం ఉపగతా – మయం తేసం భిక్ఖూనం వస్సంవుట్ఠానం పవారణాయ పవారణం ఠపేస్సామా’’తి. కథం ను ఖో అమ్హేహి పటిపజ్జితబ్బన్తి? భగవతో ఏతమత్థం ఆరోచేసుం.

ఇధ పన, భిక్ఖవే, సమ్బహులా సన్దిట్ఠా సమ్భత్తా భిక్ఖూ అఞ్ఞతరస్మిం ఆవాసే వస్సం ఉపగచ్ఛన్తి. తేసం సామన్తా అఞ్ఞే భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా వస్సం ఉపగచ్ఛన్తి – మయం తేసం భిక్ఖూనం వస్సంవుట్ఠానం పవారణాయ పవారణం ఠపేస్సామాతి. అనుజానామి, భిక్ఖవే, తేహి భిక్ఖూహి ద్వే తయో ఉపోసథే చాతుద్దసికే కాతుం – కథం మయం తేహి భిక్ఖూహి పఠమతరం పవారేయ్యామాతి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తం ఆవాసం ఆగచ్ఛన్తి, తేహి, భిక్ఖవే, ఆవాసికేహి భిక్ఖూహి లహుం లహుం సన్నిపతిత్వా పవారేతబ్బం, పవారేత్వా వత్తబ్బా – ‘‘పవారితా ఖో మయం, ఆవుసో; యథాయస్మన్తా మఞ్ఞన్తి తథా కరోన్తూ’’తి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా అసంవిహితా తం ఆవాసం ఆగచ్ఛన్తి, తేహి, భిక్ఖవే, ఆవాసికేహి భిక్ఖూహి ఆసనం పఞ్ఞపేతబ్బం, పాదోదకం పాదపీఠం పాదకథలికం ఉపనిక్ఖిపితబ్బం, పచ్చుగ్గన్త్వా పత్తచీవరం పటిగ్గహేతబ్బం, పానీయేన పరిపుచ్ఛితబ్బా; తేసం విక్ఖిత్వా [విక్ఖిపాపేత్వా (పటివిసోధకానం మతి), ఆచిక్ఖిత్వా (క.)] నిస్సీమం గన్త్వా పవారేతబ్బం, పవారేత్వా వత్తబ్బా – ‘‘పవారితా ఖో మయం, ఆవుసో; యథాయస్మన్తా మఞ్ఞన్తి తథా కరోన్తూ’’తి. ఏవఞ్చేతం లభేథ, ఇచ్చేతం కుసలం. నో చే లభేథ, ఆవాసికేన భిక్ఖునా బ్యత్తేన పటిబలేన ఆవాసికా భిక్ఖూ ఞాపేతబ్బా –

‘‘సుణన్తు మే, ఆయస్మన్తో [ఆయస్మన్తా (క.)], ఆవాసికా. యదాయస్మన్తానం పత్తకల్లం, ఇదాని ఉపోసథం కరేయ్యామ, పాతిమోక్ఖం ఉద్దిసేయ్యామ, ఆగమే కాళే పవారేయ్యామా’’తి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తే భిక్ఖూ ఏవం వదేయ్యుం – ‘‘సాధావుసో, ఇదానేవ నో పవారేథా’’తి, తే ఏవమస్సు వచనీయా – ‘‘అనిస్సరా ఖో తుమ్హే, ఆవుసో, అమ్హాకం పవారణాయ; న తావ మయం పవారేయ్యామా’’తి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తం కాళం అనువసేయ్యుం, ఆవాసికేన, భిక్ఖవే, భిక్ఖునా బ్యత్తేన పటిబలేన ఆవాసికా భిక్ఖూ ఞాపేతబ్బా –

‘‘సుణన్తు మే, ఆయస్మన్తో, ఆవాసికా. యదాయస్మన్తానం పత్తకల్లం, ఇదాని ఉపోసథం కరేయ్యామ, పాతిమోక్ఖం ఉద్దిసేయ్యామ, ఆగమే జుణ్హే పవారేయ్యామా’’తి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తే భిక్ఖూ ఏవం వదేయ్యుం – ‘‘సాధావుసో, ఇదానేవ నో పవారేయ్యాథా’’తి, తే ఏవమస్సు వచనీయా – ‘‘అనిస్సరా ఖో తుమ్హే, ఆవుసో, అమ్హాకం పవారణాయ, న తావ మయం పవారేయ్యామా’’తి. తే చే, భిక్ఖవే, భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తమ్పి జుణ్హం అనువసేయ్యుం, తేహి, భిక్ఖవే, భిక్ఖూహి సబ్బేహేవ ఆగమే జుణ్హే కోముదియా చాతుమాసినియా అకామా పవారేతబ్బం.

తేహి చే, భిక్ఖవే, భిక్ఖూహి పవారియమానే గిలానో అగిలానస్స పవారణం ఠపేతి, సో ఏవమస్స వచనీయో – ‘‘ఆయస్మా ఖో గిలానో. గిలానో చ అననుయోగక్ఖమో వుత్తో భగవతా. ఆగమేహి, ఆవుసో, యావ అరోగో హోసి. అరోగో ఆకఙ్ఖమానో చోదేస్ససీ’’తి. ఏవఞ్చే వుచ్చమానో చోదేతి, అనాదరియే పాచిత్తియం. తేహి చే, భిక్ఖవే, భిక్ఖూహి పవారియమానే అగిలానో గిలానస్స పవారణం ఠపేతి, సో ఏవమస్స వచనీయో – ‘‘అయం ఖో, ఆవుసో, భిక్ఖు గిలానో. గిలానో చ అననుయోగక్ఖమో వుత్తో భగవతా. ఆగమేహి, ఆవుసో, యావాయం భిక్ఖు అరోగో హోతి. అరోగం ఆకఙ్ఖమానో చోదేస్ససీ’’తి. ఏవఞ్చే వుచ్చమానో చోదేతి, అనాదరియే పాచిత్తియం. తేహి చే, భిక్ఖవే, భిక్ఖూహి పవారియమానే గిలానో గిలానస్స పవారణం ఠపేతి, సో ఏవమస్స వచనీయో – ‘‘ఆయస్మన్తా ఖో గిలానా. గిలానో చ అననుయోగక్ఖమో వుత్తో భగవతా. ఆగమేహి, ఆవుసో, యావ అరోగా హోథ. అరోగో అరోగం ఆకఙ్ఖమానో చోదేస్ససీ’’తి [యావ అరోగో హోతి, అరోగం ఆకఙ్ఖమానో చోదేస్ససీతి (క.)]. ఏవఞ్చే వుచ్చమానో చోదేతి, అనాదరియే పాచిత్తియం. తేహి చే, భిక్ఖవే, భిక్ఖూహి పవారియమానే అగిలానో అగిలానస్స పవారణం ఠపేతి, ఉభో సఙ్ఘేన సమనుయుఞ్జిత్వా సమనుగాహిత్వా [సమనుభాసిత్వా (సీ.)] యథాధమ్మం కారాపేత్వా సఙ్ఘేన పవారేతబ్బన్తి.

భణ్డనకారకవత్థు నిట్ఠితం.